Bommarillu : సినీ ఇండస్ట్రీలో భారీ ప్రమోషన్స్ తో బయటకు వచ్చిన సినిమాలు కూడా అంచనాల‌ను తారుమారు చేస్తూ బాక్సాఫీస్ వద్ద డిజాస్టర్ గా నిలిచిపోతాయి. అదేవిధంగా ఒకసారి ఎలాంటి అంచనాలు లేకుండా వచ్చిన చిత్రాలే బాక్సాఫీస్ వద్ద బ్లాక్ బస్టర్ గా నిలుస్తాయి. ఏ అంచనాలు లేకుండా సినీ పరిశ్రమలో అడుగుపెట్టి ఒక్క సినిమాతో హిట్ అందుకొని రాత్రికి రాత్రే స్టార్ డమ్ సంపాదించుకున్న హీరోలు ఎంతో మంది ఉన్నారు. 2006 సంవత్సరంలో సిద్ధార్థ్, జెనీలియా జంటగా వచ్చిన చిత్రం బొమ్మరిల్లు. ఈ చిత్రంతో సిద్ధార్థ్ క్రేజ్ యూత్ లో ఒక్కసారిగా పెరిగిపోయింది.
అదేవిధంగా హా.. హ.. హాసిని అంటూ జెనీలియా క్యారెక్టర్ ప్రేక్షకులను ఎంతగానో మెప్పించింది. ఈ చిత్రానికి దర్శకత్వం వహించిన భాస్కర్ కు సైతం బొమ్మరిల్లు భాస్కర్ అనే పేరును ముద్ర వేసింది. బొమ్మరిల్లు చిత్రానికి దేవిశ్రీ ప్రసాద్ అందించిన సంగీతం ఇప్పటికి కూడా వినేవాళ్లకు ఎంతో హాయిగా అనిపిస్తుంది. దిల్ రాజు నిర్మాణ సారథ్యంలో ఆరు కోట్ల రూపాయల బడ్జెట్ తో తెరకెక్కిన బొమ్మరిల్లు చిత్రం అప్పట్లో ఘన విజయాన్ని సాధించి రూ.50 కోట్ల వసూళ్లు రాబట్టింది.
అయితే బొమ్మరిల్లు చిత్రానికి ముందుగా నిర్మాత దిల్ రాజు, దర్శకుడు భాస్కర్ ఒక హీరోను అనుకోవటం జరిగిందట. అతను ఇంకెవరో కాదు హీరో నవదీప్. నిర్మాత దిల్ రాజు బొమ్మరిల్లు చిత్రంతో నవదీప్ ని తెలుగు తెరకు పరిచయం చేద్దామని అనుకున్నారు. కానీ నవదీప్ అప్పటికే జై చిత్రంతో తెలుగు తెరకు ఎంట్రీ ఇచ్చి, గౌతమ్ ఎస్ఎస్సి, మొదటి సినిమా, ప్రేమంటే ఇంతే చిత్రాలలో బిజీగా ఉన్నాడు. దానితో నవదీప్ డేట్స్ అడ్జస్ట్ కాక బొమ్మరిల్లు చిత్రానికి నో చెప్పడం జరిగింది.
నవదీప్ నో చెప్పడంతో బొమ్మరిల్లు చిత్రం కాస్త సిద్ధార్థ్ ని వరించింది. ఈ చిత్రంతో సిద్ధార్థ్ సక్సెస్ ని అందుకొని ఓవర్ నైట్ లో యూత్ లో క్రేజ్ ఉన్న హీరో గా గుర్తింపు సంపాదించుకున్నాడు. ఏ చిత్రాల కోసమైతే నవదీప్ బొమ్మరిల్లు చిత్రాన్ని వదులుకున్నాడో ఆ చిత్రాలు కాస్తా బాక్సాఫీస్ వద్ద అనుకున్న మేరకు విజయం సాధించలేకపోయాయి. అప్పుడప్పుడూ నవదీప్ కూడా బొమ్మరిల్లు చిత్రాన్ని వదులుకుని తప్పు చేశాను అంటూ కొన్ని సందర్భాల్లో బాధ పడుతూ ఉండేవాడట. అందుకే అంటారు.. త‌ల‌రాత ఎలా రాసి ఉంటే అలా జ‌రుగుతుందని. అది అక్ష‌రాలా స‌త్యం అని చెప్ప‌వ‌చ్చు.
