Heart Health : రాబోయే కొద్ది రోజుల్లో చలి మొదలవుతుంది. ఉష్ణోగ్రత తగ్గడంతో ప్రజలకు గుండె సంబంధిత సమస్యలు కూడా మొదలవుతాయి. మారుతున్న కాలంలో గుండెపై ప్రత్యేక శ్రద్ధ తీసుకోవాలని వైద్యులు చెబుతున్నారు. ఒక వ్యక్తికి ఏదైనా సమస్య ఉంటే అప్పుడు వైద్యుల సలహా తీసుకోవాలి. సకాలంలో చికిత్స చేస్తే గుండె జబ్బులను సులభంగా నియంత్రించవచ్చు. చలికాలంలో ఉష్ణోగ్రతలు తగ్గుముఖం పడతాయని, దానివల్ల రక్తనాళాలు కుంచించుకుపోతాయని, శరీరంలో రక్తప్రసరణ సరిగా జరగదని.. ఢిల్లీలోని రాజీవ్ గాంధీ సూపర్ స్పెషాలిటీ హాస్పిటల్ కార్డియాలజీ విభాగానికి చెందిన డాక్టర్ అజిత్ జైన్ చెబుతున్నారు.
రక్త సరఫరా తగ్గడం వల్ల గుండెకు ఆక్సిజన్ తక్కువగా చేరుతుంది. దీంతో శరీరానికి రక్తం, ఆక్సిజన్‌ను అందించడానికి గుండె చాలా కష్టపడాల్సి వస్తుంది. దీనివల్ల గుండె సంబంధిత సమస్యలు మొదలవుతాయి. కోవిడ్ (కరోనా వైరస్) తర్వాత గుండె జబ్బులు ఉన్నవారు లేదా గుండె సంబంధిత వ్యాధులు ఉన్నవారు జాగ్రత్తగా ఉండాలని వైద్యులు చెబుతున్నారు.
గుండె ఆరోగ్యం పట్ల చాలా జాగ్రత్తగా ఉండాలి. ఎందుకంటే కోవిడ్ తర్వాత అధిక రక్తపోటు, గుండె ఆగిపోవడం వంటి కేసులు చాలా మందిలో కనిపించాయి. అందుకే ఆందోళన ఎక్కువైందని.. గత కొన్నేళ్లుగా యువతకు కూడా గుండె జబ్బులు రావడం మొదలైందని సర్ గంగా రామ్ ఆస్పత్రి కార్డియాలజీ విభాగం డాక్టర్ ఎస్సీ మంచంద చెబుతున్నారు.
గతంలో 50 ఏళ్లు పైబడిన వారు గుండె సంబంధిత సమస్యలతో వైద్యం కోసం వచ్చేవారని, ఇప్పుడు 30 నుంచి 35 ఏళ్లలోపు రోగులు వస్తున్నారన్నారు. గత కొన్ని నెలలుగా యువకులకు ఇలాంటి అనేక గుండె శస్త్రచికిత్సలు జరిగాయి. అందుకే ఇప్పుడు గుండె జబ్బుల పట్ల ప్రజలు మరింత అప్రమత్తంగా ఉండాలి. ఎందుకంటే మారుతున్న జీవనశైలి, తప్పుడు ఆహారపు అలవాట్లు, కోవిడ్ కారణంగా పెద్ద సంఖ్యలో ప్రజలు గుండె సమస్యలతో బాధపడుతున్నారు. ఇలాంటి పరిస్థితుల్లో మారుతున్న సీజన్‌లో జాగ్రత్తలు తీసుకోకపోతే రాబోయే కాలంలో హృద్రోగుల సంఖ్య వేగంగా పెరుగుతుంది.. అని చెబుతున్నారు.
గుండెను ఆరోగ్యంగా ఉంచుకోవాలంటే.. రెగ్యులర్ గా చెకప్‌లు చేయించుకోవాలి. ఒక వ్యక్తి గుండె జబ్బుకు చెందిన ఏవైనా లక్షణాలను అనుభవిస్తే అతను వెంటనే పరీక్షలు చేయించుకోవాలని వైద్యులు చెబుతున్నారు. ఆరోగ్యంగా ఉన్నవారు ప్రతి ఆరు నెలలకు ఒకసారి తమ శరీరాన్నంతా పరీక్షించుకోవాలి. పరీక్షలలో కొలెస్ట్రాల్ పెరిగినట్లు తేలితే.. వైద్యుడిని సంప్రదించిన తర్వాత చికిత్స ప్రారంభించాలి.
శ్వాస తీసుకోవడంలో ఇబ్బంది, ఛాతిలో నొప్పి, అధిక రక్తపోటు, బలహీనత.. వంటి లక్షణాలు కనిపిస్తే ఏమాత్రం అశ్రద్ధ చేయరాదు. అవి గుండె సంబంధ లక్షణాలు అయి ఉండేందుకు ఎక్కువగా అవకాశాలు ఉంటాయి. కనుక గుండెను ఆరోగ్యంగా ఉంచుకోవాలి. అందుకు గాను.. రోజూ వ్యాయామం చేయాలి. సూర్యరశ్మి తగిలేలా చూసుకోవాలి. జంక్ ఫుడ్ తినకండి. క్రమం తప్పకుండా మందులు తీసుకోండి. నిరంతరం వైద్యుల సూచనలు పాటించండి. దీంతో గుండెను ఆరోగ్యంగా ఉంచుకోవచ్చు.
