Chettinad Tomato Chutney : చెట్టినాడ్ ట‌మాట చ‌ట్నీ.. చెట్టినాడ్ స్టైల్ లో చేసే ఈ ట‌మాట చ‌ట్నీ చాలా రుచిగా ఉంటుంది. అల్పాహారాల‌తో తిన‌డానికి, చ‌పాతీ తిన‌డానికైనా ఇది చాలా చ‌క్క‌గా ఉంటుంది. దీనిని త‌యారు చేయ‌డం కూడా చాలా సుల‌భం. వెరైటీ రుచులు కావాల‌నుకునే వారు ఇలా చెట్టినాడ్ ట‌మాట చ‌ట్నీని త‌యారు చేసి తీసుకోవ‌చ్చు. ఒక్క‌సారి రుచి చూస్తే మ‌ళ్లీ ఇదే చ‌ట్నీ కావాలంటారు. ఎంతో రుచిగా, కారం, పుల్ల‌గా ఉండే ఈ చెట్టినాడ్ స్టైల్ ట‌మాట చ‌ట్నీని ఎలా త‌యారు చేసుకోవాలి.. త‌యారీకి కావ‌ల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.
చెట్టినాడ్ ట‌మాట చ‌ట్నీ త‌యారీకి కావ‌ల్సిన ప‌దార్థాలు..
నూనె – ఒక టేబుల్ స్పూన్, పొడుగ్గా త‌రిగిన ఉల్లిపాయ – పెద్ద‌ది ఒక‌టి, పొట్టు తీసిన వెల్లుల్లి రెబ్బ‌లు – 10, ఇంగువ – అర టీ స్పూన్, ఉప్పు – త‌గినంత, త‌రిగిన ట‌మాటాలు – 3, ఎండుమిర్చి – 7, కాశ్మీరి చిల్లీ కారం – ఒక టీ స్పూన్, చింత‌పండు – 2 టీ స్పూన్స్, నీళ్లు – 2 టేబుల్ స్పూన్స్, బెల్లం – కొద్దిగా.
తాళింపుకు కావ‌ల్సిన ప‌దార్థాలు..
నూనె- 2 టేబుల్ స్పూన్స్, ఆవాలు – అర టీ స్పూన్, మిన‌ప‌ప్పు – అర టీ స్పూన్, క‌రివేపాకు – ఒక రెమ్మ.
చెట్టినాడ్ ట‌మాట చ‌ట్నీ త‌యారీ విధానం..
ముందుగా క‌ళాయిలో నూనె వేసి వేడి చేయాలి. త‌రువాత ఉల్లిపాయ ముక్క‌లు, వెల్లుల్లి రెబ్బ‌లు వేసి వేయించాలి. ఇవి కొద్దిగా వేగిన త‌రువాత ఇంగువ, ఉప్పు, ట‌మాట ముక్క‌లు, ఎండుమిర్చి, కాశ్మీరి చిల్లీ కారం, చింత‌పండు, నీళ్లు పోసి క‌ల‌పాలి. త‌రువాత మూత పెట్టి ముక్క‌లు మెత్త‌గా అయ్యే వ‌ర‌కు ఉడికించి స్టవ్ ఆఫ్ చేసి పూర్తిగా చ‌ల్లార‌నివ్వాలి. త‌రువాత వీటిని జార్ లోకి తీసుకోవాలి. ఇందులోనే బెల్లం కూడా వేసి మెత్త‌గా మిక్సీ ప‌ట్టుకోవాలి. త‌రువాత తాళింపుకు క‌ళాయిలో నూనె వేసి వేడి చేయాలి. త‌రువాత ఆవాలు, మిన‌ప‌ప్పు వేసి వేయించాలి. త‌రువాత క‌రివేపాకు వేసి వేయించాలి. త‌రువాత మిక్సీ ప‌ట్టుకున్న ప‌చ్చ‌డిని వేసి క‌ల‌పాలి. దీనిని మరో 2 నిమిషాల పాటు క‌లుపుతూ ఉడికించి స్టవ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే ట‌మాట చ‌ట్నీ త‌యార‌వుతుంది. దీనిని అన్నం, చ‌పాతీ, రోటీ, అల్పాహారాల‌తో తింటే చాలా రుచిగా ఉంటుంది. ఈ విధంగా త‌యారు చేసిన ట‌మాట చ‌ట్నీని అంద‌రూ లొట్ట‌లేసుకుంటూ ఇష్టంగా తింటారు.
