Chicken Ka Salan : చికెన్ కా సాలన్.. చికెన్ తో చేసే ఈ కర్రీ చాలా రుచిగా ఉంటుంది. చింతపండు పులుసు వేసి చేసే ఈ కర్రీ తిన్నా కొద్ది తినాలనిపించేంత రుచిగా ఉంటుంది. ఒక్కసారి దీనిని రుచి చూస్తే మళ్లీ మళ్లీ ఇదే కావాలంటారు. దీనిని తయారు చేయడం కూడా చాలా సులభం. తరుచూ చికెన్ తో చేసే వంటకాలతో పాటు దీనిని కూడా తయారు చేసి తీసుకోవచ్చు. ఎంతో రుచిగా, పుల్ల పుల్లగా ఉండే ఈ చికెన్ కా సాలన్ కర్రీని ఎలా తయారు చేసుకోవాలో ఇప్పుడు తెలుసుకుందాం.
చికెన్ కా సాలన్ తయారీకి కావల్సిన పదార్థాలు..
పల్లీలు – పావు కప్పు, ధనియాలు – 2 టీ స్పూన్స్, జీలకర్ర – ఒక టీ స్పూన్, నువ్వులు – 2 టేబుల్ స్పూన్స్, ఎండు కొబ్బరి పొడి – 2 టేబుల్ స్పూన్స్, నూనె – పావు కప్పు, ఆవాలు – ఒక టీ స్పూన్, పొడుగ్గా సన్నగా తరిగిన ఉల్లిపాయలు – 2, కరివేపాకు – 2 రెమ్మలు, తరిగిన పచ్చిమిర్చి – 3, అల్లం వెల్లుల్లి పేస్ట్ – ఒక టేబుల్ స్పూన్, పసుపు – పావు టీ స్పూన్, ఉప్పు – తగినంత, కారం – 2 టేబుల్ స్పూన్స్, నీళ్లు – పావు కప్పు, అరగంట పాటు ఉప్పు నీటిలో నానబెట్టిన చికెన్ – అర కిలో, చింతపండు పులుసు – అర కప్పు, తరిగిన కొత్తిమీర – కొద్దిగా.
చికెన్ కా సాలన్ తయారీ విధానం..
ముందుగా కళాయిలో పల్లీలు వేసి వేయించాలి. తరువాత ధనియాలు, జీలకర్ర వేసి వేయించాలి. తరువాత నువ్వులు, ఎండు కొబ్బరి పొడి వేసి వేయించాలి. ఇవన్నీ చక్కగా వేగిన తరువాత స్టవ్ ఆఫ్ చేసి చల్లారనివ్వాలి. తరువాత వీటిని జార్ లో వేసి మెత్తని పేస్ట్ లాగా చేసుకోవాలి. తరువాత కళాయిలో నూనె వేసి వేడి చేయాలి. నూనె వేడయ్యాక ఆవాలు, ఉల్లిపాయ ముక్కలు వేసి వేయించాలి. తరువాత పచ్చిమిర్చి, కరివేపాకు వేసి వేయించాలి. తరువాత అల్లం వెల్లుల్లి పేస్ట్ వేసి వేయించాలి. దీనిని పచ్చి వాసన పోయే వరకు వేయించిన తరువాత పసుపు, ఉప్పు, కారం వేసి నూనె పైకి తేలే వరకు వేయించాలి. తరువాత మిక్సీ పట్టుకున్న పేస్ట్ వేసి కలపాలి. తరువాత నీళ్లు పోసి కలపాలి. దీనిపై మూత పెట్టి నూనె పైకి తేలే వరకు వేయించిన తరువాత చికెన్ వేసి కలపాలి.
దీనిని 4 నిమిషాల పాటు వేయించిన తరువాత పావు లీటర్ నీళ్లు పోసి కలపాలి. దీనిపై మూత పెట్టి మరో 5 నిమిషాల పాటు ఉడికించిన తరువాత చింతపండు పులుసు పోసి కలపాలి. తరువాత మూత పెట్టి మంటను చిన్నగా చేసి చికెన్ ను ఉడికించాలి. చికెన్ మెత్తగా ఉడికి నూనె పైకితేలిన తరువాత కొత్తిమీర చల్లుకుని స్టవ్ ఆఫ్ చేసుకోవాలి. ఇలా చేయడం వల్ల ఎంతో రుచిగా ఉండే చికెన్ కా సాలన్ తయారవుతుంది. దీనిని అన్నంతో తింటే చాలా రుచిగా ఉంటుంది. చికెన్ తో చేసిన ఈ కర్రీని అందరూ ఎంతో ఇష్టంగా తింటారు.
