Chicken Manchurian : మనకు రెస్టారెంట్ లలో, ఫాస్ట్ ఫుడ్ సెంటర్లల్లో లభించే పదార్థాల్లో చికెన్ మంచూరియా ఒకటి. చికెన్ తో చేసుకోదగిన వివిధ రకాల వంటకాల్లో ఇది ఒకటి. చికెన్ మంచూరియా చాలా రుచిగా ఉంటుంది. చాలా మంది దీనిని రుచి చూసే ఉంటారు. రెస్టారెంట్ లలో లభించే విధంగా అదే రుచితో ఈ చికెన్ మంచూరియాను మనం ఇంట్లోనే తయారు చేసుకోవచ్చు. రుచిగా, చాలా తేలికగా అయ్యేలా ఈ చికెన్ మంచూరియాను ఎలా తయారు చేసుకోవాలో ఇప్పుడు తెలుసుకుందాం.
చికెన్ మంచూరియా తయారీకి కావల్సిన పదార్థాలు..
బోన్ లెప్ చికెన్ క్యూబ్స్ – 300 గ్రా., కోడిగుడ్డు – ఒకటి, మైదా – 2 టేబుల్ స్పూన్స్, కార్న్ ఫ్లోర్ – 2 టేబుల్ స్పూన్స్, ఉప్పు – రెండు చిటికెలు, నూనె – డీప్ ప్రైకు సరిపడా, వెల్లుల్లి తరుగు – ఒక టీ స్పూన్, చిన్నగా తరిగిన పచ్చిమిర్చి – 1, అల్లం తరుగు – ఒక టీ స్పూన్, ఉల్లిపాయ తరుగు – 2 టేబుల్ స్పూన్స్, లైట్ సోయా సాస్ – ఒక టీ స్పూన్, వెనిగర్ – ఒక టీ స్పూన్, తెల్ల మిరియాల పొడి – అర టీ స్పూన్, నల్ల మిరియాల పొడి – అర టీ స్పూన్, చైనీస్ చిల్లీ పేస్ట్ – ఒక టేబుల్ స్పూన్, నీళ్లు – పావు కప్పు, తరిగిన స్ప్రింగ్ ఆనియన్స్ – 2 టేబుల్ స్పూన్స్.
చికెన్ మంచూరియా తయారీ విధానం..
ముందుగా ఒక గంట పాటు చికెన్ ముక్కలను ఉప్పు నీటిలో వేసి నానబెట్టాలి. తరువాత వీటిని నీళ్లు లేకుండా చేసుకుని ఒక గిన్నెలోకి తీసుకోవాలి. తరువాత ఇందులో చిటికెడు ఉప్పు, మైదాపిండి, కార్న్ ఫ్లోర్, 2 టేబుల్ స్పూన్ల నీళ్ల పోసి పిండి ముక్కలకు పట్టేలా బాగా కలుపుకోవాలి. తరువాత కళాయిలో నూనె పోసి వేడి చేయాలి. నూనె వేడయ్యాక చికెన్ ముక్కలను వేసి వేయించాలి. వీటిని మధ్యస్థ మంటపై లైట్ గోల్డెన్ కలర్ వచ్చే వరకు వేయించుకుని ప్లేట్ లోకి తీసుకోవాలి. తరువాత కళాయిలో 3 టేబుల్ స్పూన్ల నూనె వేసి వేడి చేయాలి. నూనె వేడయ్యాక అల్లం తరుగు, పచ్చిమిర్చి తరుగు, వెల్లుల్లి తరుగు వేసి పెద్ద మంటపై వేయించాలి. తరువాత ఉల్లిపాయ తరుగు వేసి పచ్చి వాసన పోయే వరకు వేయించాలి.
తరువాత నీళ్లు, స్ప్రింగ్ ఆనియన్స్ తప్ప మిగిలిన పదార్థాలన్నీ వేసి బాగా కలపాలి. తరువాత నీళ్లు పోసి నూనె పైకి తేలే వరకు పెద్ద మంటపై ఉడికించాలి. తరువాత వేయించిన చికెన్ ను వేసి కలపాలి. సాసెస్ అన్నీ ముక్కలకు పట్టేలా పెద్ద మంటపై కలుపుతూ వేయించాలి. చివరగా స్ప్రింగ్ ఆనియన్స్ ను చల్లుకుని స్టవ్ ఆఫ్ చేసుకోవాలి. ఇలా చేయడం వల్ల ఎంతో రుచిగా ఉండే చికెన్ మంచూరియా తయారవుతుంది. బయట రెస్టారెంట్ లకు, ఫాస్ట్ ఫుడ్ సెంటర్లకు వెళ్లే పని లేకుండా ఇలా చికెన్ మంచూరియాను ఇంట్లోనే తయారు చేసుకోవచ్చు. దీనిని అందరూ ఎంతో ఇష్టంగా తింటారు. వీకెండ్స్ లో, స్పెషల్ డేస్ లో ఇలా చికెన్ మంచూరియాను తయారు చేసుకుని తినవచ్చు.
