Crispy Mokkajonna Garelu : మొక్కజొన్న కంకులను కూడా మనం ఆహారంగా తీసుకుంటూ ఉంటాము. ఇవి మన ఆరోగ్యానికి ఎంతో మేలు చేస్తాయి. మొక్కజొన్న కంకులను ఉడికించి, వేయించి, కాల్చుకుని తింటూ ఉంటాము. అలాగే మొక్కజొన్న కంకులతో మనం గారెలను కూడా తయారు చేస్తూ ఉంటాము. మొక్కజొన్న గారెలు చాలా రుచిగా ఉంటాయి. చాలా మంది వీటిని ఇష్టంగా తింటారు. క్రిస్పీగా ఉండే గారెలు తిన్నా కొద్ది తినాలనిపించేంత రుచిగా ఉంటాయి. స్నాక్స్ గా తీసుకోవడానికి ఇవి చాలా చక్కగా ఉంటాయి. వీటిని తయారు చేయడం కూడా చాలా సులభం. మొక్కజొన్న గారెలను రుచిగా, క్రిస్పీగా ఎలా తయారు చేసుకోవాలి.. తయారీకి కావల్సిన పదార్థాలు ఏమిటి.. అన్న వివరాలను ఇప్పుడు తెలుసుకుందాం.
మొక్కజొన్న గారెల తయారీకి కావల్సిన పదార్థాలు..
నానబెట్టిన ముదురు మొక్కజొన్న గింజలు – 2 కప్పులు, ఎండుమిర్చి – 2, పచ్చిమిర్చి – 2, ఉప్పు – తగినంత, అల్లం – అర ఇంచు ముక్క, వెల్లుల్లి రెబ్బలు – 4, జీలకర్ర – అర టీ స్పూన్, శనగపిండి – ఒక టేబుల్ స్పూన్, బియ్యంపిండి – ఒక టేబుల్ స్పూన్, చిన్నగాతరిగిన కరివేపాకు – ఒక రెమ్మ, తరిగిన కొత్తిమీర – 2 టేబుల్ స్పూన్స్, తరిగిన పుదీనా – 2 టేబుల్ స్పూన్స్, ఉల్లిపాయ ముక్కలు – అర కప్పు, ధనియాల పొడి – అర టీ స్పూన్, గరం మసాలా – పావు టీ స్పూన్, చాట్ మసాలా – పావు టీ స్పూన్, పసుపు – పావు టీ స్పూన్, నూనె – డీప్ ఫ్రైకు సరిపడా.
![Crispy Mokkajonna Garelu : మొక్కజొన్న గారెలను ఇలా చేయండి.. కరకరలాడుతూ సూపర్గా వస్తాయి..! Crispy Mokkajonna Garelu recipe very tasty snacks to make](https://i0.wp.com/ayurvedam365.com/wp-content/uploads/2023/12/mokkajonna-garelu.jpg?resize=1920%2C1080&ssl=1)
మొక్కజొన్న గారెల తయారీ విధానం..
ముందుగా నానబెట్టిన మొక్కజొన్న గింజలను వడకట్టి జార్ లో వేసుకోవాలి. ఇందులోనే ఎండుమిర్చి, పచ్చిమిర్చి, ఉప్పు, అల్లం, వెల్లుల్లి రెబ్బలు, జీలకర్ర వేసి మెత్తగా మిక్సీ పట్టుకోవాలి. అవసరమైతే కొద్దిగా నీటిని పోసి మిక్సీ పట్టుకుని గిన్నెలోకి తీసుకోవాలి. తరువాత ఇందులో నూనె తప్ప మిగిలిన పదార్థాలన్నీ వేసి బాగా కలుపుకోవాలి. తరువాత కళాయిలో నూనె పోసి వేడి చేయాలి. నూనె వేడయ్యాక పిండిని తీసుకుని గారెలుగా వత్తుకుని నూనెలో వేసుకోవాలి. గారెలు మరీ మందంగా, మరీ పలుచగా కాకుండా వత్తుకోవాలి. తరువాత ఈ గారెలను మధ్యస్థ మంటపై క్రిస్పీగా అయ్యే వరకు కాల్చుకుని ప్లేట్ లోకి తీసుకోవాలి. ఇలా చేయడం వల్ల ఎంతో రుచిగా, క్రిస్పీగా ఉండే మొక్కజొన్న గారెలు తయారవుతాయి. వీటిని అందరూ ఎంతో ఇష్టంగా తింటారు. స్నాక్స్ తినాలనిపించినప్పుడు ఇలా వేడి వేడిగా మొక్కజొన్న గారెలను తయారు చేసి తీసుకోవచ్చు.