Dosakaya Pappu : మ‌నం వంటింట్లో ర‌క‌ర‌కాల ప‌ప్పు కూర‌ల‌ను తయారు చేస్తూ ఉంటాం. మ‌నం తయారు చేయ‌డానికి వీలుగా ఉండే ప‌ప్పు కూర‌ల్లో దోస‌కాయ ప‌ప్పు కూడా ఒకటి. దోస‌కాయ ప‌ప్పు చాలా రుచిగా ఉంటుంది. దీనిని తయారు చేయ‌డం కూడా చాలా తేలిక. బ్యాచిలర్స్, వంట‌రాని వారు కూడా ఈ ప‌ప్పును సుల‌భంగా తయారు చేసుకోవ‌చ్చు. దోస‌కాయ ప‌ప్పును రుచిగా, సుల‌భంగా ఎలా తయారు చేసుకోవాలి.. అన్న వివ‌రాల‌ను ఇప్పుడు తెలుసుకుందాం.
దోస‌కాయ ప‌ప్పు త‌యారీకి కావ‌ల్సిన ప‌దార్థాలు..
కందిప‌ప్పు – 150 గ్రా., త‌రిగిన దోస‌కాయ‌లు – పావుకిలో, త‌రిగిన ఉల్లిపాయ – 1, త‌రిగిన ప‌చ్చిమిర్చి – 2, త‌రిగిన ట‌మాటాలు – 2, తాళింపు దినుసులు – ఒక టేబుల్ స్పూన్, ఎండుమిర్చి – 2, ఉప్పు – త‌గినంత, ప‌సుపు – అర టీ స్పూన్, కారం – ఒక టేబుల్ స్పూన్, క‌రివేపాకు – ఒక రెమ్మ, నూనె – ఒక టేబుల్ స్పూన్, క‌చ్చా ప‌చ్చాగా దంచిన వెల్లుల్లి రెబ్బ‌లు – 4, నాన‌బెట్టిన చింత‌పండు – చిన్న నిమ్మ‌కాయంత, త‌రిగిన కొత్తిమీర – కొద్దిగా.
దోస‌కాయ ప‌ప్పు త‌యారీ విధానం..
ముందుగా కుక్క‌ర్ లో కందిప‌ప్పు వేసి శుభ్రంగా క‌డ‌గాలి. త‌రువాత ఇందులో దోస‌కాయ ముక్క‌లు, ప‌సుపు, ట‌మాట ముక్క‌లు, ఒక గ్లాస్ నీళ్లు, ఒక టీ స్పూన్ నూనె పోసి మూత పెట్టాలి. ఈ ప‌ప్పును 3 విజిల్స్ వ‌చ్చే వ‌ర‌కు ఉడికించుకుని స్ట‌వ్ ఆఫ్ చేసుకోవాలి. త‌రువాత మూత తీసి ప‌ప్పును మెత్త‌గా చేసుకోవాలి. త‌రువాత ఇందులో చింత‌పండు ర‌సం, ఉప్పు, కారం వేసి క‌ల‌పాలి. ఇప్పుడు క‌ళాయిలో నూనె వేసి వేడి చేయాలి. నూనె వేడ‌య్యాక తాళింపు దినుసులు, ఎండుమిర్చి, ఇంగువ, వెల్లుల్లి రెబ్బ‌లు వేసి వేయించాలి. త‌రువాత ఉల్లిపాయ ముక్క‌లు, ప‌చ్చిమిర్చి, క‌రివేపాకు వేసి వేయించాలి. తాళింపు చ‌క్క‌గా వేగిన త‌రువాత ముందుగా ఉడికించుకున్న ప‌ప్పును వేసి క‌ల‌పాలి.
దీనిని మ‌రో రెండు నిమిషాల పాటు ఉడికించిన త‌రువాత కొత్తిమీర వేసి క‌ల‌పాలి. దీనిని మ‌రో నిమిషం పాటు ఉడికించి స్ట‌వ్ ఆఫ్ చేసుకోవాలి. ఇలా చేయ‌డం వల్ల ఎంతో రుచిగా ఉండే దోస‌కాయ ప‌ప్పు త‌యార‌వుతుంది. దీనిని అన్నం, చ‌పాతీ, రోటీ, పుల్కా వంటి వాటితో క‌లిపి తింటే చాలా రుచిగా ఉంటుంది. లొట్ట‌లేసుకుంటూ ఇంట్లో అంద‌రూ ఈ ప‌ప్పును ఇష్టంగా తింటారు. దోస‌కాయ‌తో ఈ విధంగా ప‌ప్పును తయారు చేసుకుని తిన‌డం వల్ల రుచితో పాటు ఆరోగ్యాన్ని కూడా సొంతం చేసుకోవ‌చ్చు.
