Egg Pudina Masala Curry : కోడిగుడ్లు మన ఆరోగ్యానికి ఎంతో మేలు చేస్తాయన్న సంగతి మనకు తెలిసిందే. కోడిగుడ్లతో రకరకాల వంటకాలను తయారు చేసుకుని తింటూ ఉంటాము. ఈ కోడిగుడ్లతో చేసుకోదగిన వెరైటీ వంటకాల్లో ఎగ్ పుదీనా మసాలా కర్రీ కూడా ఒకటి. ఈ కర్రీ చాలా రుచిగా ఉంటుంది. ఇది మనకు ఎక్కువగా ధాబాలలో లభిస్తూ ఉంటుంది. ఈ మసాలా కర్రీని మనం ఇంట్లో కూడా చాలా సులభంగా తయారు చేసుకోవచ్చు. ఎంతో రుచిగా, కమ్మగా ఉండే ఈ ఎగ్ పుదీనా మసాలా కర్రీని ఎలా తయారు చేసుకోవాలో ఇప్పుడు తెలుసుకుందాం.
ఎగ్ పుదీనా మసాలా కర్రీ తయారీకి కావల్సిన పదార్థాలు..
ఉడికించిన కోడిగుడ్లు – 4, తరిగిన కొత్తిమీర – అర కప్పు, తరిగిన పుదీనా – అర కప్పు,పచ్చిమిర్చి – 4, ఉడికించిన పాలకూర – 5 స్పూన్స్, పెరుగు – పావు కప్పు, నూనె – 4 టేబుల్ స్పూన్స్, ఆవాలు – అర టీ స్పూన్, ఎండుమిర్చి – 3, తరిగిన వెల్లుల్లి రెబ్బలు – 4, జీలకర్ర – అర టీ స్పూన్, తరిగిన ఉల్లిపాయలు – 2, అల్లం వెల్లుల్లి పేస్ట్ – ఒక టీ స్పూన్, ఉప్పు – తగినంత, గరం మసాలా – అర టీ స్పూన్, ధనియాల పొడి – ఒక టీ స్పూన్, జీలకర్ర పొడి – ఒక టీ స్పూన్, కారం – ఒక టీ స్పూన్, టమాటాలు – పెద్దవి మూడు, నీళ్లు – 200 ఎమ్ ఎల్.
![Egg Pudina Masala Curry : కోడిగడ్లను ఒక్కసారి ఇలా వెరైటీగా కర్రీ చేయండి.. రుచి చూస్తే విడిచిపెట్టరు..! Egg Pudina Masala Curry recipe in telugu make like this](https://i0.wp.com/ayurvedam365.com/wp-content/uploads/2023/07/egg-pudina-masala-curry.jpg?resize=1200%2C675&ssl=1)
ఎగ్ పుదీనా మసాలా కర్రీ తయారీ విధానం..
ముందుగా ఒక జార్ లో కొత్తిమీర, పుదీనా, పచ్చిమిర్చి, పాలకూర, పెరుగు వేసి మెత్తగా మిక్సీ పట్టుకోవాలి. తరువాత కళాయిలో నూనె వేసి వేడి చేయాలి. నూనె వేడయ్యాక ఆవాలు, ఎండుమిర్చి, వెల్లుల్లి రెబ్బలు, జీలకర్ర వేసి వేయించాలి. తరువాత ఉల్లిపాయలు వేసి వేయించాలి. ఉల్లిపాయ ముక్కలు వేగిన తరువాత అల్లం వెల్లుల్లి పేస్ట్ వేసి వేయించాలి. దీనిని పచ్చి వాసన పోయే వరకు వేయించిన తరువాత ఉప్పు, కారం, గరం మసాలా, ధనియాల పొడి, జీలకర్ర పొడి వేసి ఒక నిమిషం పాటు వేయించాలి. తరువాత టమాటాలను ఫ్యూరీలాగా చేసి వేసుకోవాలి.
దీనిని నూనె పైకి తేలే వరకు వేయించిన తరువాత ముందుగా మిక్సీ పట్టుకున్న పేస్ట్ వేసి కలపాలి. దీనిని ఒక నిమిషం పాటు వేయించిన తరువాత వేయించిన గుడ్లు వేసి కలపాలి. తరువాత నీళ్లు పోసి కలిపి మూత పెట్టి ఉడికించాలి. దీనిని నూనె పైకి తేలే వరకు ఉడికించి స్టవ్ ఆఫ్ చేసుకోవాలి. ఇలా చేయడం వల్ల ఎంతో రుచిగా ఉండే ఎగ్ పుదీనా మసాలా కర్రీ తయారవుతుంది. దీనిని అన్నం, చపాతీ, రోటీ, నాన్ వంటి వాటితో తింటే చాలా రుచిగా ఉంటుంది. దీనిని అందరూ ఎంతో ఇష్టంగా తింటారు. కోడిగుడ్లతో ఎప్పుడూ ఒకేరకం కూరలు కాకుండా ఇలా కూడా తయారు చేసుకుని తినవచ్చు.