Village Style Tomato Green Chilli Chutney : మనం టమాటాలతో రకరకాల పచ్చళ్లను తయారు చేస్తూ ఉంటాము. టమాటాలతో చేసే పచ్చళ్లు చాలా రుచిగా ఉంటాయి. అందులో భాగంగా కింద చెప్పిన విధంగా తయారు చేసే పచ్చడి కూడా చాలారుచిగా ఉంటుంది. టమాటాలు, పచ్చిమిర్చి కలిపి చేసే ఈ పచ్చడి చాలా రుచిగా ఉంటుంది. దీనిని ఎక్కువగా గ్రామాల్లో తయారు చేస్తారు. అన్నంతో, అల్పాహారాలతో తినడానికి ఇది చాలా చక్కగా ఉంటుంది. ఈ పచ్చడిని తయారు చేయడం చాలా సులభం. లొట్టలేసుకుంటూ తినాలనిపించేంత రుచిగా ఉండే టమాట పచ్చిమిర్చి పచ్చడిని ఎలా తయారు చేసుకోవాలో ఇప్పుడు తెలుసుకుందాం.
టమాట పచ్చిమిర్చి పచ్చడి తయారీకి కావల్సిన పదార్థాలు..
నూనె – ఒక టేబుల్ స్పూన్, పచ్చిమిర్చి – 10 నుండి 15, జీలకర్ర – అర టీ స్పూన్, కరివేపాకు – ఒక రెమ్మ, కొత్తిమీర – గుప్పెడు, తరిగిన టమాటాలు – 3 లేదా 4( పెద్దవి), చింతపండు – ఒక రెమ్మ, పసుపు – పావు టీ స్పూన్, తరిగిన ఉల్లిపాయ – 1, వెల్లుల్లి రెబ్బలు – 10, ఉప్పు – తగినంత.
![Village Style Tomato Green Chilli Chutney : విలేజ్ స్టైల్లో టమాటా పచ్చి మిర్చి పచ్చడి.. ఇలా చేసి అన్నంలో తింటే సూపర్గా ఉంటుంది..! Village Style Tomato Green Chilli Chutney recipe in telugu](https://i0.wp.com/ayurvedam365.com/wp-content/uploads/2023/11/village-style-tomato-green-chilli-chutney.jpg?resize=1200%2C675&ssl=1)
టమాట పచ్చిమిర్చి పచ్చడి తయారీ విధానం..
ముందుగా కళాయిలో నూనె వేసి వేడి చేయాలి. నూనె వేడయ్యాక పచ్చిమిర్చి, జీలకర్ర, కరివేపాకు, కొత్తిమీర వేసి వేయించాలి. పచ్చిమిర్చి కొద్దిగా వేగిన తరువాత టమాట ముక్కలు, పసుపు, చింతపండు వేసి కలపాలి. వీటిని మధ్యస్థ మంటపై టమాట ముక్కలు మెత్తగా అయ్యే వరకు వేయించాలి. తరువాత ఉల్లిపాయ ముక్కలు వేసి కలిపి స్టవ్ ఆఫ్ చేసుకోవాలి. ఇవన్నీ చల్లారిన తరువాత జార్ ను తీసుకుని అందులో ముందుగా పచ్చిమిర్చి, చింతపండును వేసుకోవాలి. తరువాత వెల్లుల్లి రెబ్బలు, ఉప్పు వేసి బరకగా మిక్సీ పట్టుకోవాలి. తరువాత టమాట ముక్కలు, ఉల్లిపాయ ముక్కలు వేసి మరలా బరకగా మిక్సీ పట్టుకుని గిన్నెలోకి తీసుకోవాలి. ఇలా చేయడం వల్ల ఎంతో రుచిగా ఉండే టమాట పచ్చిమిర్చి పచ్చడి తయారవుతుంది. ఈ పచ్చడిని తాళింపు కూడా వేసుకోవచ్చు. వేడి వేడి అన్నం, నెయ్యితో తింటే ఈ పచ్చడి చాలా రుచిగా ఉంటుంది. అన్నంతో పాటు అల్పాహారాలతో కూడా ఈ పచ్చడిని తినవచ్చు.