Coffee For Fatty Liver : మ‌న శ‌రీరంలో అది పెద్ద అవ‌యవాల్లో కాలేయం కూడా ఒక‌టి. కాలేయం మ‌న శ‌రీరంలో అనేక ముఖ్య‌మైన విధుల‌ను నిర్వ‌ర్తిస్తుంది. హార్మోన్లను ఉత్ప‌త్తి చేయ‌డంలో, శ‌రీరాన్ని డిటాక్సిఫికేష‌న్ చేయ‌డంలో ఇలా అనేక ర‌కాల విధుల‌ను కాలేయం నిర్వ‌ర్తిస్తుంది. కాలేయ ఆరోగ్యాన్ని కాపాడుకోవ‌డం కూడా చాలా అవ‌స‌రం. కాలేయ ఆరోగ్యం దెబ్బ‌తింటే మ‌న శ‌రీరం తీవ్ర అనారోగ్యానికి గురి అవుతుంది. క‌నుక మ‌నం ఎల్ల‌ప్పుడూ కాలేయ ఆరోగ్యాన్ని జాగ్ర‌త్త‌గా చూసుకోవాలి. కానీ మారిన జీవన‌విధానం, ఆహారపు అల‌వాట్ల కార‌ణంగా మనలో చాలా మంది ఫ్యాటీ లివ‌ర్ స‌మ‌స్య‌ల‌తో బాధ‌ప‌డుతున్నారు. అధిక బ‌రువు, జంక్ ఫుడ్ ను ఎక్కువ‌గా తీసుకోవ‌డం, నూనెలో వేయించిన ప‌దార్థాల‌ను ఎక్కువ‌గా తీసుకోవ‌డం వల్ల కాలేయంలో కొవ్వు ఎక్కువ‌గా పేరుకుపోతుంది. ఫ్యాటీ లివ‌ర్ లో కూడా రెండు ర‌కాలు ఉంటాయి. ఆల్క‌హాలిక్ మ‌రియు నాన్ ఆల్కాహాలిక్ ఫ్యాటీ లివ‌ర్. ఫ్యాటీ లివ‌ర్ స‌మ‌స్య‌తో బాధ‌ప‌డుతున్న‌ప్పుడు మనలో కొన్ని ల‌క్ష‌ణాలు క‌నిపిస్తాయి.
పొట్ట‌లో కుడివైపున నొప్పి, క‌ళ్లు మ‌రియు చ‌ర్మం ప‌సుపు రంగులో మార‌డం, దుర‌ద, క‌డుపులో వాపు, పాదాలల్లో నీళ్లు చేర‌డం, మూత్రం ప‌సుపు రంగులో రావ‌డం, అల‌స‌ట, వాంతులు, విరోచ‌నాలు వంటి ల‌క్ష‌ణాలు మనలో క‌నిపిస్తాయి. ఈ ల‌క్ష‌ణాలు మనలో క‌నిపించిన వెంట‌నే వైద్యున్ని సంప్ర‌దించ‌డం చాలా అవ‌స‌రం. అంతేకాకుండా నాన్ ఆల్క‌హాలిక్ ఫ్యాటీ లివ‌ర్ స‌మ‌స్య‌తో బాధ‌ప‌డే వారికి కాఫీ ఎంతో మేలు చేస్తుంద‌ని నిపుణులు చెబుతున్నారు. కాఫీలో క్లోరోజెనిక్ యాసిడ్ తో పాటు పాలీఫినాల్స్, కెఫిన్, మిథైల్క్సాంథైన్, లిపిడ్లు, పొటాషియం, మెగ్నీషియం వంటి పోష‌కాలు ఉంటాయి. కాలేయంలో చేరిన కొవ్వును తొల‌గించ‌డంలో కాఫీ మ‌న‌కు ఎంతో స‌హాయ‌పడుతుంద‌ని నిపుణులు చెబుతున్నారు. కాలేయ ఆరోగ్యానికి కాఫీ మేలు చేసేదే అయిన‌ప్ప‌టికి దీనిని త‌క్కువ మోతాదులో మాత్రమే తీసుకోవాలి. రోజుకు 2 నుండి 3 క‌ప్పుల కాఫీని మాత్రమే తీసుకోవాల‌ని నిపుణులు చెబుతున్నారు.
కాలేయ స‌మ‌స్య‌ల‌తో బాధ‌ప‌డే వారు కాఫీతో పాటుగా కాలేయ ఆరోగ్యానికి మేలు చేసే ఆహారాల‌ను కూడా తీసుకోవాలి. కాలేయ ఆరోగ్యాన్ని కాపాడ‌డంలో వెల్లుల్లి మ‌న‌కు ఎంతో స‌హాయ‌ప‌డుతుంది. కాలేయాన్ని సంర‌క్షించే ఎంజైమ్ లు వెల్లుల్లిలో ఎక్కువ‌గా ఉంటాయి. అలాగే ఆకుప‌చ్చ కూర‌గాయ‌ల‌ను, ఆకుకూర‌ల‌ను ఎక్కువ‌గా తీసుకోవాలి. ఇవి కాలేయ ఆరోగ్యానికి ఎంతో మేలు చేస్తాయి. అలాగే విట‌మిన్ సి ఎక్కువ‌గా ఉండే సిట్ర‌స్ జాతి పండ్ల‌ను తీసుకోవాలి. వీటిలో ఉండే యాంటీ ఆక్సిడెంట్లు కాలేయ ఆరోగ్యాన్ని కాపాడ‌డంలో ఉత్త‌మంగా ప‌ని చేస్తాయి. ఈ విధంగా త‌గిన ఆహారాల‌ను తీసుకుంటూ జీవ‌న‌శైలిలో మార్పు చేసుకోవ‌డం వల్ల కాలేయ ఆరోగ్యాన్ని కాపాడుకోవ‌చ్చ‌ని నిపుణులు తెలియ‌జేస్తున్నారు.
