Holy Basil : భారతీయులు ఎంతో పురాతన కాలం నుంచి తులసిని ఔషధ, పూజ మొక్కగా ఉపయోగిస్తున్నారు. తులసి ఆకులతో అనేక అనారోగ్య సమస్యలను నయం చేసుకోవచ్చు. ఆయుర్వేద ప్రకారం తులసిలో అనేక అద్భుతమైన ఔషధగుణాలు ఉంటాయి. అయితే ఏయే అనారోగ్యాలకు తులసి ఆకులను ఎలా వాడాలి ? అన్న విషయాలను ఇప్పుడు తెలుసుకుందాం.
1. చాలా మందిని అధిక కఫం సమస్య వేధిస్తుంటుంది. గొంతులో కఫం బాగా ఉండడం వల్ల సరిగ్గా మాట్లాడలేకపోతుంటారు. ఎక్కువ సేపు మాట్లిడితే దగ్గు వస్తుంది. కానీ తులసి ఆకులతో ఈ సమస్య నుంచి బయట పడవచ్చు. అందుకు గాను రోజూ ఉదయాన్నే పరగడుపునే నాలుగు తులసి ఆకులను నోట్లో వేసుకుని నేరుగా అలాగే నమిలి మింగేయాలి. ఇలా రోజూ చేస్తుంటే శరీరంలో ఉన్న కఫం దెబ్బకు పోతుంది. ఊపిరితిత్తుల్లోని కఫం కూడా బయటకు వచ్చేస్తుంది.
2. జీర్ణాశయం, పేగుల్లో ఉండే సూక్ష్మ క్రిములను నాశనం చేసే శక్తి తులసి ఆకులకు ఉంటుంది. కనుక రోజూ ఉదయాన్నే పరగడుపునే నాలుగు తులసి ఆకులను నోట్లో వేసుకుని నమిలి మింగితే.. జీర్ణవ్యవస్థలో ఉండే క్రిములన్నీ నాశనం అవుతాయి. జీర్ణవ్యవస్థ ఆరోగ్యం మెరుగు పడుతుంది. ఇన్‌ఫెక్షన్లు రాకుండా ఉంటాయి.
3. తులసి ఆకులను పరగడుపునే తినడం వల్ల రక్తం బాగా తయారవుతుంది. రక్తహీనత సమస్య నుంచి బయట పడవచ్చు. అలాగే నాలుగైదు తులసి ఆకులను తీసుకుని మెత్తగా దంచి పేస్ట్‌లా చేయాలి. దాన్ని ఒక గుళిక (మాత్ర)గా తయారు చేసుకుని రోజూ ఉదయం, సాయంత్రం భోజనానికి ముందు ఒక మాత్ర చొప్పున వేసుకోవాలి. దీంతో జీర్ణ సమస్యలు ఉండవు. గ్యాస్‌, మలబద్దకం, అజీర్ణం తగ్గుతాయి. అలాగే ఆకలి కూడా పెరుగుతుంది.
4. తులసి ఆకులను సేకరించి బాగా కడిగి శుభ్రం చేయాలి. అనంతరం వాటిని నీడలో ఎండబెట్టి పొడి చేయాలి. ఆ పొడిని కొద్దిగా తీసుకుని అందులో నీళ్లు కలిపి మెత్తని పేస్ట్‌లా తయారు చేసుకోవాలి. దీంతో రోజూ దంతాలను తోముకోవాలి. ఇలా రోజూ చేస్తుంటే దంతాలపై ఉండే గార, పసుపు దనం పోతాయి. దంతాలు తెల్లగా మారి మెరుస్తాయి. అలాగే చిగుళ్ల నుంచి కారే రక్తస్రావం తగ్గుతుంది. చిగుళ్లు ఆరోగ్యంగా మారుతాయి. ఇన్‌ఫెక్షన్ల నుంచి ఉపశమనం లభిస్తుంది. నోట్లో సూక్ష్మ క్రిములు చనిపోతాయి. నోటి దుర్వాసన తగ్గుతుంది. నోరు, దంతాలు, చిగుళ్లు ఆరోగ్యంగా ఉంటాయి.
5. దగ్గు, జలుబు, జ్వరం ఉన్నప్పుడు ఒక టీస్పూన్‌ తులసి ఆకుల రసంలో అంతే మోతాదులో తేనె కలిపి రోజుకు మూడు పూటలా తీసుకోవాలి. దీంతో ఆయా సమస్యల నుంచి త్వరగా ఉపశమనం లభిస్తుంది.
6. నాలుగైదు తులసి ఆకులు, నాలుగైదు పుదీనా ఆకులను నీటిలో వేసి మరిగించి ఆ నీటిని రోజుకు రెండు సార్లు.. ఉదయం, సాయంత్రం.. ఒక కప్పు మోతాదులో తాగుతుండాలి. దీని వల్ల జ్వరం తగ్గుతుంది. శరీర ఉష్ణోగ్రత వెంటనే అదుపులోకి వస్తుంది.
7. తులసి ఆకులను నీటిలో వేసి మరిగించి ఆ నీటిని రోజుకు మూడు సార్లు.. పూటకు ఒక కప్పు చొప్పున తాగుతుండాలి. దీంతో గొంతు నొప్పి, దగ్గు తగ్గుతాయి.
8. ఉదయాన్నే ఒక టీస్పూన్‌ తేనె, అంతే మోతాదులో తులసి ఆకుల రసం కలిపి సేవిస్తుంటే.. గొంతు బొంగురు తగ్గుతుంది. మృదువైన కంఠ స్వరం వస్తుంది.
9. తులసి ఆకుల రసం, ఉల్లిపాయ రసం, అల్లం రసం, తేనెలను కలిపి ఈ మిశ్రమాన్ని ఆరు టీస్పూన్‌ల మోతాదులో రోజుకు రెండు సార్లు.. ఉదయం, సాయంత్రం.. తాగాలి. దీని వల్ల విరేచనాలు తగ్గుతాయి.
10, రాత్రి పూట ఒక గ్లాస్‌ పలుచని మజ్జిగలో కాస్త తులసి ఆకుల రసం వేసి బాగా కలిపి తీసుకోవాలి. రోజూ ఇలా చేస్తే శరీరంలోని కొవ్వు కరుగుతుంది. అధిక బరువు తగ్గుతారు.
11. రాత్రి పూట ఒక టీస్పూన్‌ తులసి ఆకుల రసంతోపాటు అంతే మోతాదులో చక్కెర లేదా తేనెను కలిపి తీసుకుంటే నిద్ర బాగా పడుతుంది. నిద్రలేమి నుంచి బయట పడవచ్చు.
