Farting : మన శరీరంలో అనేక రకాల వ్యవస్థల్లో జీర్ణవ్యవస్థ ఒకటి. మనం తినే ఆహారాలు, తాగే ద్రవాలను జీర్ణం చేస్తుంది. వాటిల్లో ఉండే పోషకాలను గ్రహించి శరీరానికి అందేలా చేస్తుంది. ఈ క్రమంలోనే జీర్ణక్రియలో భాగంగా అప్పుడప్పుడు జీర్ణాశయం, పేగుల్లో గ్యాస్ ఉత్పత్తి అవుతుంది. అది అపానవాయువు రూపంలో బయటకు వస్తుంది.
అయితే నలుగురిలో ఉన్నప్పుడు అపాన వాయువు వదిలేందుకు చాలా మంది సిగ్గు పడుతుంటారు. కానీ అలా సిగ్గు పడాల్సిన పనిలేదు. ఎందుకంటే అపాన వాయువును వదలడం అన్నది చాలా సహజసిద్ధమైన ప్రక్రియ. కనుక ఆ పనిచేస్తే సిగ్గుతో తలదించుకోవాల్సిన పనిలేదు. వాస్తవానికి అపానవాయువును వదలడం అన్నది చాలా మంచి పని. దీంతో మనకు ఆరోగ్యకరమైన ప్రయోజనాలు కలుగుతాయి. అవేమిటంటే..
1. మనం తినే ఆహారాలు, తాగే ద్రవాలను బట్టి మన జీర్ణాశయంలో అవి జీర్ణం అయ్యేందుకు సమయం పడుతుంది. అయితే అజీర్ణం వచ్చినప్పుడు గ్యాస్ ఎక్కువగా ఉత్పత్తి అవుతుంది. దీంతో అపాన వాయువు ఎక్కువగా వస్తుంది. అలా ఆ వాయువు ఎక్కువగా వస్తుంటే.. తిన్న ఆహారం సరిగ్గా జీర్ణం కాలేదని అర్థం. అలా కాకుండా సాధారణ స్థాయిలో ఎప్పుడో ఒకసారి ఆ వాయువు వస్తుంటే.. మనం తిన్న ఆహారం సరిగ్గానే జీర్ణమవుతుందని అర్థం. ఈ విధంగా ఆ వాయువు విడుదల సంఖ్యను అర్థం చేసుకుంటే.. మనకు అనారోగ్య సమస్యలు ఉన్నవీ లేనివీ ఇట్టే తెలిసిపోతుంది. దీంతో జాగ్రత్త పడవచ్చు. ఇందుకుగాను అపానవాయువు ఎంతో దోహదపడుతుంది.
2. జీర్ణాశయంలో గ్యాస్ చేరడం వల్ల కడుపునొప్పి వస్తుంది. అయితే అపానవాయువును వదిలితే గ్యాస్ పోయి నొప్పి తగ్గుతుంది. కనుక కడుపునొప్పిని తగ్గించేందుకు కూడా అపానవాయువు ఎంతగానో ఉపయోగపడుతుంది.
3. పెద్దపేగు ఆరోగ్యంగా ఉండేందుకు గాను మనకు అప్పుడప్పుడు అపాన వాయువు వస్తుండాలి. దీంతో పెద్ద పేగు సరిగ్గా పనిచేస్తుంది. అందులోని వ్యర్థాలు ఎప్పటికప్పుడు సులభంగా బయటకు వచ్చేస్తాయి. కనుక పెద్ద పేగు ఆరోగ్యానికి కూడా అపాన వాయువు ఉపయోగపడుతుందని చెప్పవచ్చు.
4. జీర్ణాశయంలో ఎక్కువగా చేరే గ్యాస్ను బయటకు పంపేందుకు అపాన వాయువు ఉపయోగపడుతుంది. దీంతో గ్యాస్ తగ్గుతుంది.
5. కొన్ని రకాల ఆహారాలు కొందరికి పడవు. దాన్నే ఫుడ్ అలర్జీ అంటారు. ఇలాంటప్పుడు కొందరికి అపాన వాయువు ఎక్కువగా వస్తుంది. దీంతో మళ్లీ ఆ ఆహారాలను తినకూడదని అర్థం. కనుక ఆ వాయువు ఇందుకు కూడా పనిచేస్తుంది.
6. రోజుకు 14 నుంచి 20 సార్లు అపాన వాయువు వదలడం ఆరోగ్యకరమేనని వైద్య నిపుణులు చెబుతున్నారు. దీంతో జీర్ణవ్యవస్థ ఆరోగ్యంగా ఉన్నట్లు అర్థం చేసుకోవాలి. రోజుకు 20 సార్లకు మించి ఆ వాయువు వస్తుంటే కనుక జీర్ణవ్యవస్థ అనారోగ్యం బారిన పడినట్లు అర్థం చేసుకోవాలి. ఇలా అపానవాయువు మనకు ఎన్నో విధాలుగా ప్రయోజనాలను అందిస్తుంది.
7. అపాన వాయువు కొన్ని సార్లు వాసన వస్తుంది. ఇలా గనక వస్తుంటే అలాంటి వారి జీర్ణవ్యవస్థలో సమస్యలు ఉన్నాయని అర్థం చేసుకోవాలి. సాధారణంగా అజీర్ణం, మలబద్దకం సమస్యలు ఉన్నవారిలో, రోజూ మల విసర్జన చేయని వారిలో ఇలా అపానవాయువు వాసనతో వస్తుంది. కనుక ఆ సమస్యల నుంచి బయట పడితే అపానవాయువు సాధారణంగానే వస్తుంది. దీని వల్ల కంగారు పడాల్సిన పనిలేదు.