Heart Attack Symptoms : ప్రస్తుత తరుణంలో గుండె జబ్బులు అనేవి చాలా మందికి కామన్ అయిపోయాయి. చిన్న వయస్సులోనే హార్ట్ ఎటాక్ ల బారిన పడుతున్నారు. ఇందుకు అనేక కారణాలు ఉంటున్నాయి. అయితే కారణాలు ఏమైనప్పటికీ హార్ట్ ఎటాక్, కార్డియాక్ అరెస్ట్ వంటివి వస్తే గుండెకు తీవ్రమైన నష్టం జరుగుతుంది. హార్ట్ ఎటాక్ వచ్చిన వారు బతికే అవకాశాలు ఉంటాయి. కానీ కార్డియాక్ అరెస్ట్ వస్తే మాత్రం బతికే అవకాశాలు కేవలం 5 శాతం మాత్రమే ఉంటాయని వైద్య నిపుణులు చెబుతున్నారు.
గుండెకు అనుసంధానం అయి ఉండే రక్తనాళాల్లో ఏవైనా అడ్డంకులు ఏర్పడితే అప్పుడు గుండెకు ఆక్సిజన్, రక్తం సరిగ్గా సరఫరా కావు. దీంతో హార్ట్ ఎటాక్ వస్తుంది. అలా కాకుండా గుండె మీద ఒత్తిడి పడడం లేదా గుండె పంపింగ్ వ్యవస్థలో లోపాలు ఉన్నా.. కార్డియాక్ అరెస్ట్ వస్తుంది. దీంతో గుండె కొట్టుకోవడం సడెన్గా ఆగిపోతుంది. ఈ స్థితిలో బాధితులు బతకడం చాలా కష్టమే అని చెప్పవచ్చు.
అయితే గుండె సమస్యలు ఉన్నవారిలో సహజంగానే కొన్ని లక్షణాలు కనిపిస్తుంటాయి. వాటిని ముందుగానే గుర్తిస్తే పరిస్థితి తీవ్రతరం కాకుండా ప్రాణాలను రక్షించుకోవచ్చు. మరి ఆ లక్షణాలు ఏమిటంటే..
1. గుండె దగ్గర పట్టేసినట్లు ఉండడం, గుండెల్లో మంట, సూదులతో పొడిచినట్లు ఉండడం.. వంటివి గుండె పోటు వచ్చేముందు కనిపించే లక్షణాలు.
2. గుండె సమస్యలు ఉన్నా లేదా హార్ట్ ఎటాక్ బారిన పడేందుకు కొంత సమయం ముందు అయినా సరే.. నోరు పొడిగా మారి ఎండిపోతుంది. దాహం విపరీతంగా అవుతుంది. శరీరం మొత్తం తడిసిపోయేలా చెమటలు పడుతుంటాయి. కొందరు స్పృహ తప్పి పడిపోతారు.
3. గుండె సమస్యలు ఉన్నవారిలో కఫం ఎక్కువగా వస్తుంది. శరీరం బిగుసుకుపోయినట్లు అనిపిస్తుంది. కొందరికి వాంతి వచ్చినట్లు వికారంగా ఉంటుంది. కొందరికి చీకటిగా ఉన్నట్లు అనిపిస్తుంది.
4. గుండె ఉన్న భాగంలో నొప్పిగా ఉండడం, ఛాతిలో నొప్పిగా ఉండడం, భుజాల్లో నుంచి నొప్పి దవడలు, చేతులకు వ్యాప్తి చెందడం, కదలలేని స్థితిలో ఉండడం, ఊపిరి సరిగ్గా ఆడకపోవడం.. వంటి లక్షణాలు అన్నీ గుండె పోటు వచ్చే ముందు కనిపిస్తాయి.
కనుక ఈ లక్షణాలు ఎవరిలో అయినా ఉంటే ఏమాత్రం ఆలస్యం చేయకుండా వెంటనే డాక్టర్ను కలసి పరీక్షలు చేయించుకోవాలి. ఏదైనా సమస్య ఉన్నట్లు తేలితే వెంటనే చికిత్స తీసుకోవాలి. దీంతో గుండెను సంరక్షించుకోవచ్చు.