Aloo Tomato Capsicum : బంగాళాదుంప‌ల‌ను కూడా ఆహారంగా తీసుకుంటూ ఉంటాం. వీటితో ర‌క‌ర‌కాల వంట‌కాల‌ను త‌యారు చేస్తూ ఉంటాం. బంగాళాదుంపలతో చేసే వంట‌కాల‌ను తిన‌డం వ‌ల్ల రుచితో పాటు ఆరోగ్యాన్ని కూడా పొంద‌వ‌చ్చు. బంగాళాదుంపలతో ఇత‌ర కూర‌గాయ‌ల‌ను క‌లిపి కూర‌లు వండుతూ ఉంటాం. అందులో భాగంగా ఆలూ టమాట క్యాప్సికం మ‌సాలా క‌ర్రీని ఎలా త‌యారు చేసుకోవాలి… త‌యారీకి కావ‌ల్సిన ప‌దార్థాలు ఏమిటి..అన్న వివ‌రాల‌ను ఇప్పుడు తెలుసుకుందాం.
ఆలూ టమాట క్యాప్సికం మ‌సాలా క‌ర్రీ త‌యారీకి కావ‌ల్సిన ప‌దార్థాలు..
త‌రిగిన ట‌మాటాలు – 2, ఉడికించిన బంగాళాదుంప‌లు – 2, త‌రిగిన క్యాప్సికం – 2, త‌రిగిన ఉల్లిపాయ – 1, త‌రిగిన ప‌చ్చిమిర్చి – 2, అల్లం వెల్లుల్లి పేస్ట్ – ఒక టేబుల్ స్పూన్, గ‌రం మ‌సాలా – ఒక టేబుల్ స్పూన్, ప‌సుపు – అర టీ స్పూన్, కారం – ఒక టేబుల్ స్పూన్, ఉప్పు – త‌గినంత, నూనె – 2 టేబుల్ స్పూన్స్, క‌రివేపాకు – ఒక రెమ్మ, త‌రిగిన కొత్తిమీర – కొద్దిగా.
మ‌సాలా పేస్ట్ త‌యారీకి కావ‌ల్సిన ప‌దార్థాలు..
ప‌ల్లీలు – ఒక టేబుల్ స్పూన్, ధ‌నియాలు – ఒక టేబుల్ స్పూన్, సాజీరా – ఒక టీ స్పూన్, ల‌వంగాలు – 5, దాల్చిన చెక్క – ఒక ఇంచు ముక్క, యాల‌కులు – 3, బిర్యానీ ఆకు – 1, జీడిప‌ప్పు – 6, నువ్వులు – ఒక టేబుల్ స్పూన్, ఎండు కొబ్బ‌రి పొడి – ఒక టేబుల్ స్పూన్.
ఆలూ టమాట క్యాప్సికం మ‌సాలా క‌ర్రీ త‌యారీ విధానం..
ముందుగా క‌ళాయిలో నువ్వులు త‌ప్ప మ‌సాలా పేస్ట్ కు కావ‌ల్సిన మిగిలిన ప‌దార్థాలు వేసి దోర‌గా వేయించాలి. త‌రువాత నువ్వులు, ఎండు కొబ్బ‌రి పొడి వేసి ఒక నిమిషం పాటు వేయించి చ‌ల్లారే వ‌ర‌కు ఉంచాలి. త‌రువాత వీటిని ఒక జార్ లోకి తీసుకుని మెత్త‌గా పొడిగా చేసుకోవాలి. త‌రువాత త‌గిన‌న్ని నీళ్లు పోసి పేస్ట్ గా చేసుకోవాలి. ఇప్పుడు క‌ళాయిలో నూనె పోసి వేడి చేయాలి. నూనె వేడ‌య్యాక క్యాప్సికం ముక్క‌ల‌ను వేసి 2 నిమిషాల పాటు వేయించి వేరే ప్లేట్ లోకి తీసుకోవాలి. త‌రువాత అదే నూనెలో ప‌చ్చిమిర్చి, ఉల్లిపాయ ముక్క‌లు, క‌రివేపాకు వేసి వేయించాలి. త‌రువాత అల్లం వెల్లుల్లి పేస్ట్ వేసి వేయించాలి. త‌రువాత టమాట ముక్క‌లు వేసి మూత పెట్టి అవి మెత్త‌గా అయ్యే వ‌ర‌కు వేయించాలి. టమాట ముక్క‌లు మెత్త‌గా అయిన త‌రువాత అందులో మిక్సీ ప‌ట్టుకున్న మ‌సాలా పేస్ట్, ఉప్పు, కారం, ప‌సుపు, గ‌రం మ‌సాలా వేసి క‌ల‌పాలి.
దీనిని నూనె పైకి తేలే వ‌ర‌కు బాగా వేయించాలి. ఇలా వేయించిన త‌రువాత బంగాళాదుంప ముక్క‌లు, వేయించిన క్యాప్సికం ముక్క‌లు, ఒక గ్లాస్ నీళ్లు వేసి క‌ల‌పాలి. త‌రువాత దీనిపై మూత పెట్టి 10 నిమిషాల పాటు ఉడికించాలి. చివ‌ర‌గా దీనిపై కొత్తిమీర‌ను చ‌ల్లి స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే ఆలూ టమాట క్యాప్సికం మ‌సాలా క‌ర్రీ త‌యార‌వుతుంది. దీనిని అన్నం, చ‌పాతీ, రోటీ, పుల్కా వంటి వాటితో క‌లిపి తింటే చాలా రుచిగా ఉంటుంది. ఇంట్లో కూర‌గ‌యాలు లేన‌ప్పుడు, వంట ఏం చేయాలో తోచ‌న‌ప్పుడు ఇలా ఆలూ టమాట క్యాప్సికం మ‌సాలా క‌ర్రీని త‌యారు చేసుకుని తిన‌వ‌చ్చు. దీనిని అంద‌రూ ఇష్టంగా తింటారు.
