Dhaba Style Egg Keema Curry : మనకు ధాబాల్లలో లభించే ఎగ్ వెరైటీలల్లో ఎగ్ కీమా ఒకటి. ఎగ్ కీమా చాలా రుచిగా ఉంటుంది. దీనిని చాలా మంది ఇష్టంగా తింటారు. చపాతీ, రోటీ, పుల్కా వంటి వాటితో తినడానికి ఇది చాలా చక్కగా ఉంటుంది. ఈ ఎగ్ కీమాను ధాబా స్టైల్ లో మనం కూడా తయారు చేసుకోవచ్చు. వీకెండ్స్ లో, స్పెషల్ డేస్ లో ఇలా ఎగ్ కీమాను తయారు చేసి తీసుకోవచ్చు. దీనిని తయారు చేయడం చాలా సులభం. వంటరాని వారు, మొదటిసారి చేసే వారు కూడా ఈ ఎగ్ కీమాను సులభంగా తయారు చేసుకోవచ్చు. ఇంట్లోనే ధాబా స్టైల్ ఎగ్ కీమాను ఎలా తయారు చేసుకోవాలి.. అన్న వివరాలను ఇప్పుడు తెలుసుకుందాం.
ధాబా స్టైల్ ఎగ్ కీమా తయారీకి కావల్సిన పదార్థాలు..
నూనె – 2 లేదా 3 టేబుల్ స్పూన్స్, జీలకర్ర – ఒక టీ స్పూన్, ఎండుమిర్చి – 2, బిర్యానీ ఆకు – 1, చిన్నగా తరిగిన ఉల్లిపాయలు – 3, వెల్లుల్లి తరుగు – ఒక టీస్పూన్, అల్లం తరుగు – ఒక టీ స్పూన్, చిన్నగా తరిగిన టమాటాలు – 2, పసుపు – పావు టీస్పూన్, ఉప్పు – తగినంత, ధనియాల పొడి – ఒక టేబుల్ స్పూన్, కారం – ఒక టీ స్పూన్, గరం మసాలా – ఒక టీ స్పూన్, కసూరిమెంతి – అర టీ స్పూన్, బటర్ – 2 టేబుల్ స్పూన్స్, చిన్నగా తరిగిన పచ్చిమిర్చి – 2, కోడిగుడ్డు – 1, ఉడికించిన కోడిగుడ్లు – 3, నీళ్లు – తగినన్ని, తరిగిన కొత్తిమీర – కొద్దిగా.
ధాబా స్టైల్ ఎగ్ కీమా తయారీ విధానం..
ముందుగా కళాయిలో నూనె వేసి వేడి చేయాలి. తరువాత జీలకర్ర, ఎండుమిర్చి, బిర్యానీ ఆకు వేసి వేయించాలి. తరువాత ఉల్లిపాయలు వేసి వేయించాలి. ఇవి సగానికి పైగా వేగిన తరువాత వెల్లుల్లి తరుగు, అల్లం తరుగు వేసి వేయించాలి. తరువాత టమాట ముక్కలు, పసుపు, ఉప్పు వేసి కలపాలి. టమాట ముక్కలు మగ్గిన తరువాత కొద్దిగా నీళ్లు పోసి మెత్తగా అయ్యే వరకు ఉడికించాలి. తరువాత కారం, ధనియాలు పొడి, గరం మసాలా, కసూరిమెంతి వేసి నూనె పైకి తేలే వరకు బాగా ఉడికించి స్టవ్ ఆఫ్ చేసుకోవాలి. తరువాత మరో కళాయిలో బటర్ వేసి వేడి చేయాలి. బటర్ వేడయ్యాక గుడ్డును పగలకొట్టి వేసుకోవాలి. తరువాత పచ్చిమిర్చి కూడా వేసి వేయించాలి.
గుడ్డు వేగిన తరువాత చిన్న చిన్న ముక్కలుగా కట్ చేసుకోవాలి. తరువాత ఉడికించిన కోడిగుడ్లను తురిమి వేసుకోవాలి. వీటిని కొద్దిగా రంగు మారు వరకు వేయించిన తరువాత ముందుగా తయారు చేసుకున్న కూర వేసి కలపాలి. తరువాత తగినన్నినీళ్లు పోసుకుని నూనె పైకి తేలే వరకు ఉడికించి కొత్తిమీర చల్లుకుని స్టవ్ ఆఫ్ చేసుకోవాలి. ఇలా చేయడం వల్ల ఎంతో రుచిగా ఉండే ఎగ్ కీమా తయారవుతుంది. దీనిని వేడి వేడిగా తింటే చాలా రుచిగా ఉంటుంది. చపాతీ, రోటీ, నాన్ వంటి వాటితో దీనిని తింటే మరింత రుచిగా ఉంటుంది.
