Dhaba Style Kaju Paneer Masala : ధాబా స్టైల్‌లో కాజు ప‌నీర్ మ‌సాలా ఇలా చేయండి.. ఎంతో టేస్టీగా ఉంటుంది..!

Dhaba Style Kaju Paneer Masala : మ‌న‌కు ధాబాల్ల‌లో ల‌భించే ప‌నీర్ వెరైటీల‌లో కాజు ప‌నీర్ మ‌సాలా క‌ర్రీ కూడా ఒక‌టి. ఈ క‌ర్రీ చాలా రుచిగా ఉంటుంది. నాన్, బ‌ట‌ర్ నాన్ వంటి వాటితో తిన‌డానికి ఇది చాలా చ‌క్క‌గా ఉంటుంది. ఈ క‌ర్రీని చాలా మంది రుచి చూసే ఉంటారు. దీనిని ఇష్ట‌ప‌డ‌ని వారు ఉండ‌ర‌నే చెప్ప‌వ‌చ్చు. ఈ కాజు ప‌నీర్ మ‌సాలా కర్రీని ధాబా స్టైల్ లో మ‌నం కూడా త‌యారు చేసుకోవ‌చ్చు. దీనిని త‌యారు చేయ‌డం చాలా తేలిక‌. వీకెండ్స్ లో, స్పెషల్ డేస్ లో ఇలా ప‌నీర్ తో రుచిగా క‌ర్రీని త‌యారు చేసి తీసుకోవ‌చ్చు. ఎంతో రుచిగా ఉండే ఈ కాజు ప‌నీర్ మ‌సాలా క‌ర్రీని ధాబా స్టైల్ లో ఎలా త‌యారు చేసుకోవాలి.. అన్న వివ‌రాల‌ను ఇప్పుడు తెలుసుకుందాం.

ధాబా స్టైల్ కాజు ప‌నీర్ మ‌సాలా క‌ర్రీ త‌యారీకి కావ‌ల్సిన ప‌దార్థాలు..

నూనె – 2 టేబుల్ స్పూన్స్, జీడిప‌ప్పు – పావు క‌ప్పు, జీల‌క‌ర్ర – ఒక టీ స్పూన్, చిన్న‌గా త‌రిగిన పెద్ద ఉల్లిపాయ – 1, త‌రిగిన ప‌చ్చిమిర్చి – 3, అల్లం వెల్లుల్లి పేస్ట్ – ఒక టేబుల్ స్పూన్, వేయించిన జీల‌క‌ర్ర పొడి – ఒక టీ స్పూన్, కారం – ఒక టేబుల్ స్పూన్, ధ‌నియాల పొడి – ఒక టీ స్పూన్, గ‌రం మ‌సాలా – అర టీ స్పూన్, పసుపు- అర టీ స్పూన్, పెద్ద ట‌మాటాలు – 2, నీళ్లు – 150 ఎమ్ ఎల్, చిలికిన పెరుగు – 2 టేబుల్ స్పూన్స్, ప‌నీర్ క్యూబ్స్ – పావుకిలో, ప్రెష్ క్రీమ్ – 2 టేబుల్ స్పూన్స్, కొత్తిమీర త‌రుగు – 2 టేబుల్ స్పూన్స్, నెయ్యి – ఒక టేబుల్ స్పూన్.

ధాబా స్టైల్ కాజు ప‌నీర్ మ‌సాలా క‌ర్రీ త‌యారీ విధానం..

ముందుగా క‌ళాయిలో నూనె వేసి వేడి చేయాలి. నూనె వేడ‌య్యాక జీడిప‌ప్పు వేసి ఎర్ర‌గా అయ్యే వ‌ర‌కు వేయించి ప్లేట్ లోకి తీసుకోవాలి. త‌రువాత మరో 2 టేబుల్ స్పూన్ల నూనె వేసి వేడి చేయాలి. తరువాత ఉల్లిపాయ ముక్క‌లు వేసి అవి ఎర్ర‌గా అయ్యే వ‌ర‌కు వేయించాలి. ఉల్లిపాయ ముక్క‌లు స‌గానికి పైగా వేగిన త‌రువాత ప‌చ్చిమిర్చి, అల్లం వెల్లుల్లి పేస్ట్ వేసి వేయించాలి. ఉల్లిపాయ ముక్క‌లు చ‌క్క‌గా వేగిన త‌రువాత జీల‌క‌ర్ర పొడి, కారం, ధ‌నియాల పొడి, గ‌రం మ‌సాలా, ప‌సుపు వేసి క‌ల‌పాలి. మ‌సాలాలు చ‌క్క‌గా వేగిన త‌రువాత ట‌మాటాల‌ను ఫ్యూరీలాగా చేసి వేసుకోవాలి.

దీనిని నూనె పైకి తేలే వ‌ర‌కు వేయించిన త‌రువాత నీళ్లు క‌ల‌పాలి. త‌రువాత పెరుగు వేసి క‌ల‌పాలి. పెరుగు అంతా కూర‌లో క‌లిసే వ‌ర‌కు బాగా కలిపిన త‌రువాత నూనె పైకి తేలే వ‌ర‌కు ఉడికించాలి. త‌రువాత పనీర్, వేయించిన జీడిప‌ప్పు వేసి క‌ల‌పాలి. దీనిని మ‌ధ్య మ‌ధ్య‌లో క‌లుపుతూ నూనె పైకి తేలే వ‌ర‌కు ఉడికించాలి. ఇలా ఉడికించిన త‌రువాత ఫ్రెష్ క్రీమ్, కొత్తిమీర త‌రుగు, నెయ్యి వేసి క‌లిపి స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే ధాబా స్టైల్ కాజు ప‌నీర్ మ‌సాలా క‌ర్రీ త‌యార‌వుతుంది. దీనిని అంద‌రూ ఎంతో ఇష్టంగా తింటారు. చ‌పాతీ, రోటీ వంటి వాటితో తింటే ఇది చాలా రుచిగా ఉంటుంది.