Dhaba Style Tomato Curry : మనకు ధాబాలలో లభించే వివిధ రకాల రుచికరమైన వంటకాల్లో టమాట కర్రీ కూడా ఒకటి. ఈ కర్రీ చాలా రుచిగా ఉంటుంది. రోటీ, చపాతీ, పుల్కా, నాన్ వంటి వాటితో తింటే ఈ కర్రీ చాలా రుచిగా ఉంటుంది. టమాట కర్రీని ఇష్టపడని వారు కూడా ఇలా చేసిన కర్రీని ఇష్టంగా తింటారు. ఈ కర్రీని మనం ఇంట్లో కూడా చాలా సులభంగా తయారు చేసుకోవచ్చు. మొదటిసారి చేసే వారుకూడా ఈ కర్రీని సులభంగా తయారు చేయవచ్చు. ఎంతో రుచిగా, కమ్మగా ధాబా స్టైల్ లో టమాట కర్రీని ఎలా తయారు చేసుకోవాలి.. అన్న వివరాలను ఇప్పుడు తెలుసుకుందాం.
ధాబా స్టైల్ టమాట కర్రీ తయారీకి కావల్సిన పదార్థాలు..
నూనె – 50 గ్రా., ఆవాలు – అర టీస్పూన్, జీలకర్ర – అర టీ స్పూన్, ఎండుమిర్చి – 3, చిన్నగా తరిగిన ఉల్లిపాయలు – 100 గ్రా., చిన్నగా తరిగిన పచ్చిమిర్చి – 2, అల్లం వెల్లుల్లి పేస్ట్ – ఒక టేబుల్ స్పూన్, గరం మసాలా – అర టీ స్పూన్, కారం – ఒక టేబుల్ స్పూన్, ఉప్పు – తగినంత, జీలకర్ర పొడి- ఒక టీ స్పూన్, ధనియాల పొడి – ఒక టీ స్పూన్, టమాట ఫ్యూరీ – 200 గ్రా., కరివేపాకు – రెండు రెమ్మలు, పెద్ద ముక్కలుగా తరిగిన టమాటాలు – పావుకిలో, నీళ్లు – 200 ఎమ్ ఎల్, తరిగిన కొత్తిమీర – కొద్దిగా.
ధాబా స్టైల్ టమాట కర్రీ తయారీ విధానం..
ముందుగా కళాయిలో నూనె వేసి వేడి చేయాలి. తరువాత ఆవాలు, జీలకర్ర, ఎండుమిర్చి వేసి వేయించాలి. తరువాత ఉల్లిపాయలు, పచ్చిమిర్చి వేసి వేయించాలి. ఉల్లిపాయ ముక్కలు వేగిన తరువాత అల్లం వెల్లుల్లి పేస్ట్ వేసి పచ్చి వాసన పోయే వరకు వేయించాలి. తరువాత గరం మసాలా, కారం, ఉప్పు, జీలకర్ర పొడి, ధనియాల పొడి వేసి కలపాలి. తరువాత టమాట ఫ్యూరీ వేసి వేయించాలి. దీనిని నూనె పైకి తేలే వరకు ఉడికించిన తరువాత టమాట ముక్కలు వేసి కలపాలి.ఈ ముక్కలను పచ్చి వాసన పోయే వరకు వేయించిన తరువాత నీళ్లు పోసి కలపాలి.
తరువాత చిన్న మంటపై నూనె పైకి తేలే వరకు ఉడికించి కొత్తిమీర చల్లుకుని స్టవ్ ఆఫ్ చేసుకోవాలి. ఇలా చేయడం వల్ల ఎంతో రుచిగా ఉండే టమాట కర్రీ తయారవుతుంది. దీనిని అన్నం, చపాతీ, రోటీ వంటి వాటితో తింటే చాలా రుచిగా ఉంటుంది. తరచూ ఒకే స్టైల్ లో కాకుండా ఇలా ధాబా స్లైల్ లో మరింత రుచిగా తయారు చేసుకుని తినవచ్చు. ఈ కర్రీని అందరూ ఎంతో ఇష్టంగా తింటారు.
