Guthi Vankaya Vepudu : మనం గుత్తి వంకాయలతో రకరకాల వంటకాలను తయారు చేస్తూ ఉంటాము. గుత్తి వంకాయలతో చేసే వంటకాలు చాలా రుచిగా ఉంటాయి. చాలా మంది వీటిని ఇష్టంగా తింటారు. గుత్తి వంకాయలతో ఎక్కువగా మనం మసాలా వంటకాలను తయారు చేస్తూ ఉంటాము. అయితే తరుచూ చేసే మసాలా కూరలే కాకుండా గుత్తి వంకాయలతో మనం వేపుడును కూడా తయారు చేసుకోవచ్చు. గుత్తి వంకాయలతో చేసే ఈ వేపుడు చాలా రుచిగా ఉంటుంది. దీనిని తయారు చేసుకోవడం కూడా చాలా సులభం. గుత్తి వంకాయలతో తరుచూ ఒకేరకం వంటకాలే కాకుండా ఇలా వెరైటీగా వేపుడును కూడా తయారు చేసుకోవచ్చు. గుత్తి వంకాయలతో రుచిగా వేపుడును ఎలా తయారు చేసుకోవాలో ఇప్పుడు తెలుసుకుందాం.
గుత్తి వంకాయ వేపుడు తయారీకి కావల్సిన పదార్థాలు..
గుత్తి వంకాయలు – అరకిలో, నూనె – 3 టేబుల్ స్పూన్స్, తరిగిన కొత్తిమీర – కొద్దిగా.
మసాలా పొడి తయారీకి కావల్సిన పదార్థాలు..
శనగపప్పు – ఒక టేబుల్ స్పూన్, మినపగుళ్లు -అర టీ స్పూన్, ధనియాలు – అర టేబుల్ స్పూన్, జీలకర్ర – ఒక టీ స్పూన్, ఎండుమిర్చి – 10 నుండి 12, ఎండుకొబ్బరి తురుము – పావు కప్పు, కరివేపాకు – 2 రెమ్మలు, పల్లీలు – 2 టేబుల్ స్పూన్స్, ఉప్పు – తగినంత, పసుపు – పావు టీ స్పూన్, వెల్లుల్లి రెబ్బలు – 5, నూనె – ఒక టీ స్పూన్.
గుత్తి వంకాయ వేపుడు తయారీ విధానం..
ముందుగా వంకాయలను నాలుగు ముక్కలుగా కట్ చేసి ఉప్పు నీటిలో వేసి పక్కకు ఉంచాలి. తరువాత కళాయిలో పల్లీలు వేసి వేయించాలి. వీటిని దోరగా వేయించి ప్లేట్ లోకి తీసుకోవాలి.తరువాత అదే కళాయిలో శనగపప్పు వేసి వేయించాలి. ఇవి కొద్దిగా వేగిన తరువాత మినపగుళ్లు, ధనియాలు, జీలకర్ర వేసి వేయించాలి. వీటిని దోరగా వేయించి ప్లేట్ లోకి తీసుకోవాలి. తరువాత ఎండుమిర్చి, కరివేపాకు, ఎండు కొబ్బరి తురుము వేసి వేయించి ప్లేట్ లోకి తీసుకోవాలి. ఇవన్నీ చల్లారిన తరువాత ఒక జార్ లోకి వీటిని తీసుకోవాలి. ముందుగా జార్ లో వేయించిన శనగపప్పు దినుసులు వేసి మెత్తగా మిక్సీ పట్టుకోవాలి. తరువాత ఎండుమిర్చి, ఎండుకొబ్బరి వేసి మిక్సీ పట్టుకోవాలి.
తరువాత పల్లీలతో పాటు మిగిలిన పదార్థాలు వేసి మెత్తగా మిక్సీ పట్టుకుని పక్కకు ఉంచాలి. ఇప్పుడు ఈపొడిని వంకాయలల్లోకి స్టఫ్ చేసుకోవాలి. తరువాత కళాయిలో నూనె వేసి వేడి చేయాలి. నూనె వేడయ్యాక వంకాయలు వేసి మూత పెట్టి చిన్న మంటపై వేయించాలి. వీటిని మధ్య మధ్యలో అటూ ఇటూ కదుపుతూ వంకాయలు మెత్తగా అయ్యే వరకు మగ్గించాలి. వంకాయలు మెత్తగా మగ్గిన తరువాత మిగిలిన పొడిని కూడా చల్లుకోవాలి. దీనిని ఒక నిమిషం పాటు వేయించి కొత్తిమీర చల్లుకుని స్టవ్ ఆఫ్ చేసుకోవాలి. ఇలా చేయడం వల్ల ఎంతో రుచిగా ఉండే గుత్తి వంకాయ వేపుడు తయారవుతుంది. దీనిని అన్నంతో తింటే చాలా రుచిగా ఉంటుంది. ఈ విధంగా తయారు చేసిన వంకాయ వేపుడును అందరూ ఎంతో ఇష్టంగా తింటారు.
