Jalebi : జిలేబి.. ఈ పేరు విన‌గానే చాలా మంది నోట్లో నీళ్లు ఊరుతాయి. జిలేబి రుచి గురించి ప్ర‌త్యేకంగా చెప్ప‌వ‌ల‌సిన ప‌ని లేదు. జిలేబీని ఇష్ట‌ప‌డ‌ని వారు ఉండ‌రు అని చెప్ప‌వ‌చ్చు. ఇవి మ‌న‌కు బ‌య‌ట విరివిరిగా ల‌భిస్తాయి. బ‌య‌ట కొనే ప‌నే లేకుండా అదే రుచితో వీటిని మ‌నం ఇంట్లో కూడా త‌యారు చేసుకోవ‌చ్చు. జిలేబీని రుచిగా, స‌లుభంగా ఇంట్లో ఎలా త‌యారు చేసుకోవాలో ఇప్పుడు తెలుసుకుందాం.
జిలేబి త‌యారీకి కావ‌ల్సిన ప‌దార్థాలు..
మైదా పిండి – 100 గ్రా., పంచ‌దార – 150 గ్రా., బేకింగ్ సోడా – పావు టీ స్పూన్, నీళ్లు – ఒక క‌ప్పు, ఆరెంజ్ ఫుడ్ క‌ల‌ర్ – చిటికెడు, నూనె – డీప్ ఫ్రైకు స‌రిప‌డా.
జిలేబి త‌యారీ విధానం..
ముందుగా ఒక గిన్నెలో మైదా పిండిని తీసుకోవాలి. త‌రువాత అందులో బేకింగ్ సోడాను వేసి క‌ల‌పాలి. ఇప్పుడు త‌గిన‌న్ని నీళ్లు పోసి పిండిని ప‌లుచ‌గా క‌లుపుకోవాలి. త‌రువాత దీనిపై మూత‌ను ఉంచి 12 గంట‌ల పాటు నాన‌బెట్టాలి. 12 గంట‌ల త‌రువాత పిండిని మ‌రోసారి బాగా క‌ల‌పాలి. త‌రువాత ఇందులో చిటికెడు ఫుడ్ క‌ల‌ర్ ను నీటిలో క‌లిపి వేయాలి. ఈ పిండిని మ‌రోసారి బాగా క‌లిపి ప‌క్క‌కు పెట్టుకోవాలి. ఇప్పుడు స్ట‌వ్ మీద గిన్నెను ఉంచి అందులో పంచ‌దార, నీళ్లు పోసి వేడి చేయాలి. పంచ‌దార క‌రిగే వ‌ర‌కు తిప్పుతూ ఉండాలి. పంచ‌దార క‌రిగిన త‌రువాత దీనిని లేత తీగ పాకం వ‌చ్చే ఉడికించాలి.
త‌రువాత అందులో ఫుడ్ క‌ల‌ర్, పావు టీ స్పూన్ నిమ్మ‌ర‌సం వేసి క‌లిపి స్ట‌వ్ ఆఫ్ చేసుకోవాలి. త‌రువాత క‌ళాయిలో నూనె పోసి వేడి చేయాలి. నూనె కాగిన త‌రువాత మందంగా ఉండే ప్లాస్టిక్ క‌వ‌ర్ లేదా మందంగా ఉండే కాట‌న్ వ‌స్త్రాన్ని తీసుకుని అందులో పిండిని వేసి మూట క‌ట్టాలి. త‌రువాత ఆ మూట‌కు ఒక ప‌క్క‌న చిన్న రంధ్రాన్ని చేసి జిలేబి వ‌త్తుకోవాలి. ఇలా త‌గిన‌న్ని జిలేబీలు వ‌త్తుకుని వాటిని నూనెలో కాల్చుకోవాలి. వీటిని మ‌ధ్య‌స్థ మంట‌పై రెండువైపులా ఎర్ర‌గా అయ్యే వ‌ర‌కు కాల్చుకుని ముందుగా త‌యారు చేసిన పంచ‌దార మిశ్ర‌మంలో వేయాలి. వీటిని పంచ‌దార మిశ్ర‌మంలో 30 సెక‌న్ల పాటు నాన‌బెట్టి ప్లేట్ లోకి తీసుకోవాలి.
ఇలా చేయ‌డం వ‌ల్ల అచ్చం బ‌య‌ట ల‌భించే విధంగా ఉండే జిలేబీలు త‌యార‌వుతాయి. జిలేబీలు వేయ‌డానికి ప్లాస్టిక్ క‌వ‌ర్ కు బ‌దులుగా సాస్ బాటిల్స్ ను, వాట‌ర్ బాటిల్ మూత‌కు రంధ్రాన్ని చేసి కూడా ఉప‌యోగించ‌వ‌చ్చు. నేరుగా జిలేబీలు వేయ‌డం రాని వారు ముందుగా ప్లేట్ మీద వేయ‌డం నేర్చుకుని త‌రువాత నూనెలో వేయాలి. బ‌య‌ట కొనుగోలు చేసే ప‌నిలేకుండా ఇంట్లోనే ఇలా ఎంతో రుచిగా ఉండే జిలేబీలను త‌యారు చేసుకుని తిన‌వ‌చ్చు.
