Paneer Bhurji : పనీర్ మన ఆరోగ్యానికి ఎంతో మేలు చేస్తుంది. దీనితో ర‌క‌ర‌కాల వంట‌కాల‌ను త‌యారు చేసి తీసుకుంటూ ఉంటాము. పనీర్ తో చేసుకోద‌గిన రుచిక‌ర‌మైన వంట‌కాల్లో పనీర్ బుర్జీ కూడా ఒక‌టి. చ‌పాతీ వంటి వాటితో తిన‌డానికి ఇది చాలా చ‌క్క‌గా ఉంటుంది. పనీర్ బుర్జీని త‌యారు చేసుకోవ‌డం చాలా సుల‌భం. వంట‌రాని వారు కూడా ఈ పనీర్ బుర్జీని 5 నిమిషాల్లో త‌యారు చేసుకోవ‌చ్చు. రుచితో పాటు ఆరోగ్యాన్ని అందించే ఈ పనీర్ బుర్జీని రెస్టారెంట్ స్టైల్ లో ఎలా త‌యారు చేసుకోవాలి.. అన్న వివ‌రాల‌ను ఇప్పుడు తెలుసుకుందాం.
పనీర్ బుర్జీ త‌యారీకి కావ‌ల్సిన ప‌దార్థాలు..
నూనె – 2 టేబుల్ స్పూన్స్, చిన్న‌గా త‌రిగిన ఉల్లిపాయ‌లు – 2, చిన్న‌గా త‌రిగిన ప‌చ్చిమిర్చి – 2 లేదా త‌గిన‌న్ని, చిన్న‌గా త‌రిగిన ట‌మాట – 1, పనీర్ తురుము – 150 గ్రా., ప‌సుపు – పావు టీ స్పూన్, ఉప్పు – త‌గినంత, త‌రిగిన కొత్తిమీర – కొద్దిగా, గ‌రం మ‌సాలా – అర టీ స్పూన్.
పనీర్ బుర్జీ త‌యారీ విధానం..
ముందుగా క‌ళాయిలో నూనె వేసి వేడి చేయాలి. నూనె వేడ‌య్యాక ఉల్లిపాయ ముక్క‌లు వేసి వేయించాలి. ఇవి స‌గానికి పైగా వేగిన త‌రువాత ప‌చ్చిమిర్చి వేసి వేయించాలి. ఉల్లిపాయ ముక్క‌లు వేగిన త‌రువాత ట‌మాట ముక్క‌లు వేసి మెత్త‌గా అయ్యే వ‌ర‌కు వేయించాలి. ట‌మాట ముక్క‌లు పూర్తిగా వేగిన త‌రువాత పనీర్ తురుము వేసి వేయించాలి. వీటిని ఒక నిమిషం పాటు వేయించిన త‌రువాత ప‌సుపు, ఉప్పు వేసి మ‌రో నిమిషం పాటు వేయించాలి. త‌రువాత గ‌రం మ‌సాలా వేసి క‌ల‌పాలి. చివ‌ర‌గా కొత్తిమీర వేసి స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే పనీర్ బుర్జీ తయార‌వుతుంది. దీనిని చ‌పాతీ, రోటీ, నాన్ వంటి వాటితో తింటే చాలా రుచిగా ఉంటుంది. ఈ విధంగా ఇంట్లోనే చాలా సుల‌భంగా రెస్టారెంట్ స్టైల్ లో పనీర్ బుర్జీని త‌యారు చేసి తీసుకోవ‌చ్చు.
