Semiya Pulao : మ‌నం సేమియాతో ర‌క‌ర‌కాల వంట‌కాల‌ను త‌యారు చేస్తూ ఉంటాం. సేమియాతో చేసే వంట‌కాలు చాలా రుచిగా ఉంటాయి. చాలా మంది వీటిని ఇష్టంగా తింటారు. ఈ సేమియాతో చేసుకోద‌గిన వంట‌కాల్లో సేమియా పులావ్ కూడా ఒక‌టి. సేమియా పులావ్ చాలా రుచిగా ఉంటుంది. దీనిని త‌యారు చేయ‌డం కూడా చాలా సుల‌భం. మ‌సాలా దినుసులు వేసి చేసే ఈ పులావ్ ను ఎవ‌రైనా చాలా సుల‌భంగా త‌యారు చేయ‌వ‌చ్చు. ఎంతో రుచిగా ఉండే ఈ సేమియా పులావ్ ను ఎలా త‌యారు చేసుకోవాలి.. త‌యారీకి కావ‌ల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.
సేమియా పులావ్ త‌యారీకి కావ‌ల్సిన ప‌దార్థాలు..
సేమియా – ఒక క‌ప్పు, నెయ్యి – ఒక టేబుల్ స్పూన్, నూనె -2 టేబుల్ స్పూన్స్, ల‌వంగాలు – 4, దాల్చిన చెక్క – ఒక ఇంచు ముక్క, యాల‌కులు – 4, బిర్యానీ ఆకు – 1, సాజీరా – ఒక టీ స్పూన్, పొడుగ్గా తరిగిన ఉల్లిపాయ – 1, తరిగిన ప‌చ్చిమిర్చి – 3, ప‌చ్చి బ‌ఠాణీ – పావు క‌ప్పు, తరిగిన క్యాప్సికం – 1, తరిగిన క్యారెట్ – 1, ప‌సుపు – పావు టీ స్పూన్, అల్లం వెల్లుల్లి పేస్ట్ – ఒక టీ స్పూన్, ఉప్పు – త‌గినంత, గ‌రం మ‌సాలా – అర టీ స్పూన్, నీళ్లు – రెండు క‌ప్పులు, తరిగిన ట‌మాట – 1, తరిగిన కొత్తిమీర – అర క‌ట్ట, తరిగిన పుదీనా – అర క‌ట్ట, నిమ్మ‌ర‌సం – ఒక టీ స్పూన్.
సేమియా పులావ్ త‌యారీ విధానం..
ముందుగా క‌ళాయిలో నెయ్యి వేసి వేడి చేయాలి. నెయ్యి వేడ‌య్యాక సేమియా వేసి చిన్న మంట‌పై మాడిపోకుండా వేయించాలి. త‌రువాత సేమియాను ప్లేట్ లోకి తీసుకోవాలి. త‌రువాత అదే క‌ళాయిలో నూనె వేసి వేడి చేయాలి. నూనె వేడ‌య్యాక ల‌వంగ‌లు, దాల్చిన చెక్క, యాల‌కులు, సాజీరా, బిర్యానీ ఆకు వేసి వేయించాలి. త‌రువాత ఉల్లిపాయ ముక్క‌లు వేసి వేయించాలి. ఇవి స‌గానికి పైగా వేగిన త‌రువాత ప‌చ్చిమిర్చి వేసి వేయించాలి. ఉల్లిపాయ ముక్క‌లు చ‌క్క‌టి రంగు వ‌చ్చిన త‌రువాత బ‌ఠానీ, క్యారెట్, క్యాప్సికం ముక్క‌లు వేసి 70 శాతం వ‌ర‌కు వేయించాలి. ఇలా వేయించిన త‌రువాత ప‌సుపు, ఉప్పు, గ‌రం మ‌సాలా వేసి క‌ల‌పాలి. త‌రువాత అల్లం వెల్లుల్లి పేస్ట్ వేసి ప‌చ్చి వాస‌న పోయే వ‌ర‌కు వేయించాలి. త‌రువాత నీళ్లు పోసి క‌ల‌పాలి.
దీనిపై మూత పెట్టి నీళ్ల‌ను చ‌క్క‌గా మ‌రిగించాలి. నీళ్లు బాగా మరిగిన త‌రువాత వేయించిన సేమియా, ట‌మాట ముక్క‌లు, కొత్తిమీర, పుదీనా వేసి క‌ల‌పాలి. త‌రువాత దీనిపై మూత పెట్టి 8 నిమిషాల పాటు ఉడికించి స్ట‌వ్ ఆఫ్ చేసుకోవాలి. త‌రువాత నిమ్మ‌ర‌సం వేసి క‌లిపి మూత పెట్టి 15 నిమిషాల పాటు క‌దిలించ‌కుండా అలాగే ఉంచి ఆ త‌రువాత స‌ర్వ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే సేమియా పులావ్ త‌యార‌వుతుంది. అల్పాహారంగా లేదా స్నాక్స్ గా సేమియాతో ఇలా పులావ్ ను త‌యారు చేసుకుని తిన‌వ‌చ్చు. ఈ సేమియా పులావ్ ను అంద‌రూ ఎంతో ఇష్టంగా తింటారు.
