Tomato Salan : మ‌నం అప్పుడ‌ప్పుడూ బిర్యానీ, పులావ్ వంటి వంట‌కాల‌ను త‌యారు చేస్తూ ఉంటాం. బిర్యానీ కానీ, పులావ్ కానీ చాలా రుచిగా ఉంటాయి. వీటిని నేరుగా స‌లాన్ ను మాత్రమే బిర్యానీ తిన‌డానికి త‌యారు చేస్తూ ఉంటారు. కేవ‌లం మిర్చి కా స‌లాన్ నే కాకుండా మ‌నం ట‌మాట స‌లాన్ ను కూడా త‌యార చేసుకుని బిర్యానీతో క‌లిపి తిన‌వ‌చ్చు. ట‌మాట స‌లాన్ తో బిర్యానీని తింటే బిర్యానీ రుచి మ‌రింత పెరుగుతుంది. ఈ ట‌మాట స‌లాన్ ను ఎవ‌రైనా కూడా చాలా సుల‌భంగా త‌యారు చేయ‌వ‌చ్చు. రుచిగా ట‌మాట స‌లాన్ ను ఎలా త‌యారు చేసుకోవాలి.. త‌యారీకి కావ‌ల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.
ట‌మాట స‌లాన్ త‌యారీకి కావ‌ల్సిన ప‌దార్థాలు..
పెద్ద ముక్క‌లుగా త‌రిగిన ట‌మాటాలు – 200 గ్రా., ప‌చ్చిమిర్చి – 8, ఎండుకొబ్బ‌రి ముక్క‌లు – 3 టేబుల్ స్పూన్స్, దాల్చిన చెక్క – ఒక ఇంచు ముక్క, ల‌వంగాలు – 3, యాల‌కులు – 2, ప‌ల్లీలు – 2 టేబుల్ స్పూన్స్, నువ్వులు – 2 టేబుల్ స్పూన్స్, గ‌రం మ‌సాలా – ఒక టీ స్పూన్, అల్లం వెల్లుల్లి పేస్ట్ – ఒక టీ స్పూన్, తాళింపు దినుసులు – ఒక టీ స్పూన్, నాన‌బెట్టిన చింతపండు – నిమ్మ‌కాయంత, ధ‌నియాల పొడి – ఒక టీ స్పూన్, కారం – ఒక టేబుల్ స్పూన్, పసుపు – అర టీ స్పూన్, నూనె – 2 టేబుల్ స్పూన్స్, త‌రిగిన కొత్తిమీర – కొద్దిగా, కరివేపాకు – ఒక రెమ్మ, ఉప్పు – త‌గినంత.
ట‌మాట స‌లాన్ త‌యారీ విధానం..
ముందుగా క‌ళాయిలో ప‌ల్లీలు వేసి వేయించాలి. ప‌ల్లీలు వేగిన త‌రువాత నువ్వులు, ఎండు కొబ్బ‌రి, దాల్చిన చెక్క, ల‌వంగాలు, యాల‌కులు వేసి వేయించాలి. ఇవ‌న్నీ చ‌క్క‌గా వేగిన త‌రువాత వీటిని జార్ లోకి తీసుకుని మిక్సీ ప‌ట్టుకోవాలి. త‌రువాత ఇందులో అర గ్లాస్ నీళ్లు పోసి మెత్త‌గా మిక్సీ ప‌ట్టుకుని ప‌క్క‌కు ఉంచాలి. ఇప్పుడు క‌ళాయిలో నూనె వేసి వేడి చేయాలి. నూనె వేడ‌య్యాక ప‌చ్చిమిర్చి వేసి వేయించాలి. ప‌చ్చిమిర్చి వేగిన త‌రువాత వీటిని ప్లేట్ లోకి తీసుకుని ప‌క్క‌కు ఉంచాలి. త‌రువాత అదే నూనెలో తాళింపు దినుసులు వేసి వేయించాలి. త‌రువాత అల్లం వెల్లుల్లి పేస్ట్, కరివేపాకు వేసి వేయించాలి. త‌రువాత ముందుగా మిక్సీ ప‌ట్టుకున్న పేస్ట్, ఉప్పు, కారం, పసుపు, ధ‌నియాల పొడి, గ‌రం మ‌సాలా వేసి కలపాలి.
దీనిని నూనె పైకి తేలే వ‌ర‌కు బాగా వేయించాలి. త‌రువాత ట‌మాట ముక్క‌లు, చింతపండు ర‌సం, వేయించిన ప‌చ్చిమిర్చి, అర గ్లాస్ నీళ్లు పోసి కలపాలి. త‌రువాత మూత పెట్టి మ‌ధ్య‌స్థ మంట‌పై 20 నిమిషాల పాటు ఉడికించాలి. ఇలా ఉడికించిన త‌రువాత కొత్తిమీర వేసి కలపాలి. దీనిని మ‌రో 5 నిమిషాల పాటు ఉడికించి స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే ట‌మాట కా స‌లాన్ త‌యార‌వుతుంది. దీనిని బిర్యానీ, పులావ్ తో క‌లిపి తింటే చాలా రుచిగా ఉంటుంది.
