Tomato Ulli Karam : ప్రతి ఒక్కరి వంటగదిలో ఉండే కూరగాయల్లో టమాటాలు కూడా ఒకటి. వంటల్లో మనం టమాటాలను విరివిరిగా ఉపయోగిస్తూ ఉంటాం. టమాటాలు మన ఆరోగ్యానికి, అందానికి ఎంతో మేలు చేస్తాయి. టమాటాలతో రకరకాల వంటకాలు, పచ్చళ్లు తయారు చేస్తూ ఉంటాం. టమాటాలతో చేసుకోదగిన రుచికరమైన వంటకాల్లో టమాట ఉల్లికారం కూడా ఒకటి. ఉల్లిపాయ కారం వేసి చేసే ఈ కూర చాలా రుచిగా ఉంటుంది. వంట చేయడానికి సమయం తక్కువగా ఉన్నప్పుడు టమాట ఉల్లికారాన్ని తయారు చేసుకుని తినవచ్చు. దీనిని తయారు చేయడం కూడా చాలా సులభం. ఎవరైనా దీనిని సులభంగా తయారు చేసుకోవచ్చు. టమాట ఉల్లికారాన్ని ఎలా తయారు చేసుకోవాలి.. తయారీకి కావల్సిన పదార్థాలు ఏమిటి.. అన్న వివరాలను ఇప్పుడు తెలుసుకుందాం.
టమాట ఉల్లికారం తయారీకి కావల్సిన పదార్థాలు..
తరిగిన ఉల్లిపాయలు – 3 ( మధ్యస్థంగా ఉన్నవి), తరిగిన టమాటాలు – 4, తరిగిన పచ్చిమిర్చి – 2, వెల్లుల్లి – 4, కారం – ఒక టేబుల్ స్పూన్, పసుపు – అర టీ స్పూన్, ఉప్పు – తగినంత, తాళింపు దినుసులు – ఒక టేబుల్ స్పూన్, నూనె – 2 టేబుల్ స్పూన్స్, కరివేపాకు – ఒక రెమ్మ.
టమాట ఉల్లికారం తయారీ విధానం..
ముందుగా జార్ లో ఉల్లిపాయ ముక్కలు, కారం, వెల్లుల్లి రెబ్బలు, కొద్దిగా ఉప్పు వేసి బరకగా మిక్సీ పట్టుకోవాలి. తరువాత కళాయిలో నూనె వేసి వేడి చేయాలి. నూనె వేడయ్యాక తాళింపు దినుసులు వేసి వేయించాలి. తరువాత ఎండుమిర్చి, కరివేపాకు వేసి వేయించాలి. తరువాత పచ్చిమిర్చి, మిక్సీ పట్టుకున్న కారం వేసి కలపాలి. దీనిని నూనె పైకి తేలే వరకు వేయించిన తరువాత టమాట ముక్కలు, ఉప్పు వేసి కలపాలి. తరువాత దీనిపై మూత పెట్టి మధ్యస్థ మంటపై టమాట ముక్కలను మెత్తగా ఉడికించాలి.
టమాట ముక్కలు ఉడికిన తరువాత పసుపు వేసి కలపాలి. దీనిని నూనె పైకి తేలే వరకు ఉడికించి స్టవ్ ఆఫ్ చేసుకోవాలి. ఇలా చేయడం వల్ల ఎంతో రుచిగా ఉండే టమాట ఉల్లికారం తయారవుతుంది. దీనిని అన్నంతో కలిపి తింటే చాలా రుచిగా ఉంటుంది. టమాటాలతో తరచూ చేసే వంటకాలతో పాటు అప్పటికప్పుడు ఇలా టమాట ఉల్లికారాన్ని కూడా తయారు చేసుకుని తినవచ్చు. దీనిని అందరూ ఎంతో ఇష్టంగా తింటారు.
