అది 1997 సెప్టెంబర్ నెల.. చైనాలోని షాన్‌డాంగ్ ప్రావిన్స్‌లోని ఓ చిన్న గ్రామం. ఆ రోజు సెలవు కావడంతో పిల్లలంతా ఇంటి ముందు ఆడుకుంటున్నారు. అలా ఆడుకుంటుండగా.. కిడ్నాపర్లు ఓ రెండేళ్ల బాలుణ్ని ఎత్తుకెళ్లారు. ఈ విషయం తెలిసి ఆ పిల్లాడి తండ్రి గువో గాంగ్‌టాంగ్ తల్లడిల్లాపోయాడు. కొడుకు కోసం ఊరంతా వెతికినప్పటికీ ఫలితం లేకపోయింది. అప్పట్లో చైనాలో పిల్లలను కిడ్నాప్ చేసి.. అమ్ముకోవడం అనేది చాలా సాధారణమైన వ్యవహారంగా ఉండేది. తన కొడుకును కూడా ఎవరో కిడ్నాప్ చేసి అమ్మేసి ఉంటారని గువోకు అర్థమైంది. కానీ ఎలాగైనా సరే తన కొడుకును తిరిగి దక్కించుకోవాలనే నిర్ణయానికి వచ్చాడు. అలా అనుకున్నదే తడవుగా మోటార్ సైకిల్‌ను బయటకు తీసి.. దానికి తన కొడుకు ఫొటో ఉన్న జెండాను తగిలించి ఊరూరా తిరగడం మొదలుపెట్టాడు.
కొడుకు ఆచూకీ కనిపెట్టడం కోసం గువో 20కిపైగా ప్రావిన్సులు జల్లెడపట్టాడు. ఈ క్రమంలో ఏకంగా 5 లక్షల కిలోమీటర్లు ప్రయాణించాడు. 1997లో వెతుకులాట ప్రారంభించిన గువో.. తన సుదీర్ఘ ప్రయాణంలో ఎన్నో సార్లు ప్రమాదాల బారిన పడి ఎముకలు విరగొట్టుకున్నాడు. కొన్నిసార్లు దారి దోపిడీకి గురయ్యాడు. కొడుకును వెతకడం కోసం పది మోటార్ బైకులను మార్చిన గువో.. తన దగ్గరున్న డబ్బంతా ఖర్చు చేశాడు. కొన్నిసార్లు డబ్బులు లేకపోవడంతో ఇతరుల ముందు చేయి చాపాల్సి వచ్చినప్పటికీ అతడు సిగ్గు పడలేదు. వంతెనల కింద నిద్రిస్తూ, దొరికింది తింటూ.. తన వెతుకులాటను కొనసాగించాడు.
గువో పోరాటాన్ని మొదట్లో చాలా మంది తేలిగ్గా తీసుకున్నారు. పిచ్చొడు అని నవ్వుకున్నారు. కానీ ఎవరేమనుకున్నా పట్టించుకోకుండా.. గువో ఏళ్ల తరబడి తన కొడుకు కోసం లక్షల కిలోమీటర్లు తిరుగుతుండటం అందర్నీ ఆశ్చర్యానికి గురి చేసింది. గువో వెతుకులాట ఆ నోటా, ఈ నోటా పడి.. చివరకు అధికారుల, నాయకుల చెవిన పడింది. కొడుకు కోసం పిచ్చివాడిలా ఎక్కడెక్కడో తిరుగుతున్న గువోకు 2021లో చైనా ప్రభుత్వం నుంచి ఓ ఫోన్ కాల్ వచ్చింది.
ఈ ఏడాది పోలీసులు చేపట్టిన డీఎన్ఏ డ్రైవ్‌లో నీ కొడుకు ఆచూకీ తెలిసింది, అతడు ఫలానా చోట ఉన్నాడు అని అధికారులు చెప్పారు. వెంటనే గువో వారు చెప్పిన చోట వాలిపోయాడు. రెండేళ్ల వయసులో తప్పిపోయిన తన కొడుకును.. 26 ఏళ్ల యువకుడిగా చూసుకొని మురిసిపోయాడు. అతణ్ని హత్తుకొని ఆనంద బాష్పాలు రాల్చాడు. ఇన్నాళ్లు తను పడిన కష్టాన్ని మర్చిపోయేలా.. గుండెల్లో గూడుకట్టుకున్న బాధను కన్నీటి రూపంలో బయటకు పంపించాడు. అది చూసి అక్కడున్న వారి కళ్లు చెమ్మగిల్లాయి.
