ఇప్పుడు ప్రైవసీ విషయంలోఓ చాలా జాగ్రత్తగా ఉండాల్సిన పరిస్థితి ఉంది. అయితే ప్రైవసీలో భాగంగా వినియోగదారులు తమ మొబైల్లు, ఇతర గాడ్జెట్లలో జీపీఎస్ నిలిపివేస్తారు. తద్వారా గూగుల్ లేదా మరెవరూ వాటిని ట్రాక్ చేయలేరు అని అనుకుంటున్నారు. కానీ, జీపీఎస్ లేకుండా కూడా గూగుల్ మీ లొకేషన్ను ట్రాక్ చేయగలదు. జీపీఎస్ లేకుండా కూడా మీ లొకేషన్ని ట్రాక్ చేయడానికి గూగుల్ వివిధ పద్ధతులను ఉపయోగిస్తుంది. జీపీఎస్ లేకుండా గూగుల్ లొకేషన్ని ఎలా, ఎన్ని విధాలుగా ట్రాక్ చేస్తుందో, వాటిని ఎలా డీల్ చేయాలో చూద్దాం. గూగుల్ వై-ఫై నెట్వర్క్ ద్వారా మీ కచ్చితమైన లొకేషన్ చాలా సులభంగా ట్రాక్ చేయగలదు. వాస్తవానికి, మీరు మీ డివైజ్ వై-ఫైకి కనెక్ట్ చేసినప్పుడు గూగుల్ మిమ్మల్ని అక్కడి నుంచి ట్రాక్ చేస్తుంది.
యూజర్ డివైజ్ల నుంచి సేకరించిన వై-ఫై నెట్వర్క్ లొకేషన్ల సమగ్ర డేటాబేస్ను గూగుల్ సేకరిస్తుంది. ఈ సమాచారం జీపీఎస్ లేకుండా కూడా లొకేషన్ ట్రాకింగ్ ఖచ్చితత్వాన్ని మెరుగుపరుస్తుంది. మీ పరికరం సమీపంలోని సెల్ టవర్లతో కమ్యూనికేట్ చేస్తుంది. బహుళ టవర్ల నుంచి సిగ్నల్ బలాన్ని విశ్లేషించడం ద్వారా, గూగుల్ మీ లోకేషన్ని అంచనా వేయగలదు బహిరంగ ప్రదేశాల్లో సమీప పరికరాలు లేదా స్టోర్స్లోని బీకన్ల నుంచి బ్లూటూత్ సంకేతాలను గూగుల్ గుర్తించగలదు. ఈ సామర్థ్యం నిర్దిష్ట ప్రదేశాలకు మీ లొకేషన్ని అంచనా వేయడానికి అనుమతిస్తుంది. ఇంటర్నెట్కు కనెక్ట్ చేయడం వల్ల మీ పరికరానికి ఒక IP అడ్రెస్ కేటాయించడం జరుగుతుంది. ఇది మీ ఇంటర్నెట్ సర్వీస్ ప్రొవైడర్ భౌగోళిక ప్రాంతం ఆధారంగా మీ లొకేషన్ అంచనాను అందిస్తుంది.
గూగుల్ ట్రాకర్స్ని ఎలా ఆపాలి అనేది చూస్తే. ఇందుకోసం మీ గూగుల్ బ్రౌజర్ సెట్టింగ్లకు వెళ్లండి. మీరు మై యాక్టివిటీపై క్లిక్ చేసినప్పుడు గూగుల్ యాక్టివిటీ ఆప్షన్ కనిపిస్తుంది.ఆ పక్కన మీరు వెబ్, యాప్ యాక్టివిటీ, యూట్యూబ్ హిస్టరీ, లొకేషన్ హిస్టరీని చూడవచ్చు. మీరు ఈ అన్ని ఆప్షన్లకు వెళ్లడం ద్వారా గూగుల్ ట్రాకింగ్ను నిలిపివేయొచ్చు. పైన చెప్పిన విధంగా మీరు మీ గూగుల్ ట్రాకింగ్ని ఆఫ్ చేసి సేఫ్గా ఉండండి.
