Punugula Kurma : పునుగుల కుర్మా.. పెస‌ర‌ప‌ప్పు పునుగుల‌తో చేసే ఈ కుర్మా చాలా రుచిగా ఉంటుంది. చాలా మంది ఈ కూర‌ను రుచి చూసే ఉంటారు. ఎక్కువ‌గా కర్రీ పాయింట్ ల‌లో, హోట‌ల్స్ లో దీనిని స‌ర్వ్ చేస్తూ ఉంటారు. ఈ పునుగుల కుర్మాను మ‌నం కూడా చాలా సుల‌భంగా త‌యారు చేసుకోవ‌చ్చు. ఇంట్లో కూర‌గాయ‌లు లేన‌ప్పుడు ఈ పునుగుల కుర్మాను త‌యారు చేసి తీసుకోవ‌చ్చు. ఈ క‌ర్రీని త‌యారు చేయ‌డం చాలా సుల‌భం. ఎంతో రుచిగా, క‌మ్మ‌గా ఉండే పునుగుల కుర్మాను ఎలా త‌యారు చేసుకోవాలి.. త‌యారీకి కావ‌ల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.
పునుగుల కుర్మా త‌యారీకి కావ‌ల్సిన ప‌దార్థాలు..
3 గంట‌ల పాటు నాన‌బెట్టిన పొట్టు పెస‌ర‌ప‌ప్పు – ఒక క‌ప్పు, ఉప్పు – త‌గినంత, నాన‌బెట్టిన జీడిప‌ప్పు – 5, నాన‌బెట్టిన గ‌స‌గ‌సాలు -ఒక టేబుల్ స్పూన్, ఉడికించిన ట‌మాటాలు – 3, చింత‌పండు – ఒక రెమ్మ, నూనె – 7 నుండి 8 టీ స్పూన్స్, దాల్చిన చెక్క – ఒక చిన్న ముక్క, దంచిన యాల‌కులు – 2, అనాస‌పువ్వు- 1, బిర్యానీ ఆకు – 1, చిన్న‌గా తరిగిన ఉల్లిపాయ‌లు – 2, తరిగిన ప‌చ్చిమిర్చి – 3, క‌రివేపాకు – ఒక రెమ్మ, అల్లం వెల్లుల్లి పేస్ట్ – ఒక టీ స్పూన్, ప‌సుపు – పావు టీ స్పూన్, కారం – 2 టేబుల్ స్పూన్స్, చిలికిన పెరుగు – అర క‌ప్పు, జీల‌క‌ర్ర పొడి – పావు టీ స్పూన్, ధ‌నియాల పొడి – అర టీ స్పూన్, గ‌రం మ‌సాలా – అర టీ స్పూన్, నీళ్లు – 2 క‌ప్పులు, తరిగిన కొత్తిమీర- కొద్దిగా.
పునుగుల కుర్మా త‌యారీ విధానం..
ముందుగా పెస‌ర‌ప‌ప్పును పొట్టు పోయేలా శుభ్రంగా క‌డిగి జార్ లో వేసుకోవాలి. త‌రువాత కొద్దిగా నీళ్లు పోసి మెత్త‌గా మిక్సీ ప‌ట్టుకుని గిన్నెలోకి తీసుకోవాలి. త‌రువాత ఇందులో ఉప్పు వేసి క‌లుపుకోవాలి. ఇప్పుడు క‌ళాయిలో నూనె పోసి వేడి చేయాలి. నూనె వేడ‌య్యాక పిండిని తీసుకుని చిన్న చిన్న పునుగులుగా వేసుకోవాలి. వీటిని ఎర్ర‌గా అయ్యే వ‌ర‌కు కాల్చుకుని ప్లేట్ లోకి తీసుకుని ప‌క్క‌కు ఉంచాలి. త‌రువాత జార్ లో నాన‌బెట్టిన జీడిప‌ప్పు, గ‌స‌గ‌సాలు, ట‌మాటాలు, చింత‌పండు వేసి మెత్త‌గా మిక్సీ ప‌ట్టుకుని ప‌క్క‌కు ఉంచాలి. త‌రువాత క‌ళాయిలో నూనె వేసి వేడి చేయాలి. త‌రువాత మ‌సాలా దినుసులు వేసి వేయించాలి.
ఇవి వేగిన త‌రువాత ఉల్లిపాయ ముక్క‌లు, ప‌చ్చిమిర్చి, క‌రివేపాకు వేసి వేయించాలి. త‌రువాత అల్లం వెల్లుల్లి పేస్ట్, మిక్సీ ప‌ట్టుకున్న పేస్ట్ వేసి క‌ల‌పాలి. త‌రువాత దీనిని 4 నిమిషాల పాటు వేయించిన త‌రువాత ప‌సుపు, ఉప్పు, కారం, పెరుగు, జీల‌క‌ర్ర పొడి, ధ‌నియాల పొడి, గ‌రం మ‌సాలా వేసి క‌ల‌పాలి. దీనిని నూనె పైకి తేలే వ‌ర‌కు వేయించిన త‌రువాత నీళ్లు పోసి క‌ల‌పాలి. నీళ్లు మ‌రిగిన త‌రువాత పునుగులు వేసి క‌ల‌పాలి. త‌రువాత మూత పెట్టి మ‌రో 5 నుండి 6 నిమిషాల పాటు ఉడికించాలి. చివ‌ర‌గా కొత్తిమీర చ‌ల్లుకుని స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే పునుగుల కుర్మా త‌యార‌వుతుంది. దీనిని అన్నంతో తింటే చాలా రుచిగా ఉంటుంది. ఈ విధంగా త‌యారు చేసిన పునుగుల కుర్మాను అంద‌రూ ఎంతో ఇష్టంగా తింటారు.
