Multi Millet Upma : ప్ర‌స్తుత తరుణంలో చాలా మంది చిరు ధాన్యాల‌ను తిన‌డం మొద‌లు పెడుతున్నారు. అనేక అనారోగ్య స‌మ‌స్య‌ల కార‌ణంగా చాలా మంది చిరు ధాన్యాల‌ను తినేందుకే ఆస‌క్తిని చూపిస్తున్నారు. ఈ క్ర‌మంలోనే చిరు ధాన్యాల్లో రాగులు, జొన్న‌లు, స‌జ్జ‌లు, కొర్ర‌లు. అరికెలు, సామ‌లు.. వంటి వాటిని తింటున్నారు. అయితే వీటిని ఎలా తినాలో చాలా మందికి అర్థం కావ‌డం లేదు. కానీ వీటన్నింటినీ క‌లిపి ఉప్మాను చేసుకుని తిన‌వ‌చ్చు. ఇది ఎంతో రుచిగా ఉంటుంది. పైగా పోష‌కాలు, ఆరోగ్య‌క‌ర‌మైన ప్రయోజనాలు ల‌భిస్తాయి. ఇక మ‌ల్టీ మిల్లెట్ ఉప్మాను ఎలా త‌యారు చేయాలో ఇప్పుడు తెలుసుకుందాం.
మ‌ల్టీ మిల్లెట్ ఉప్మా త‌యారీకి కావ‌ల్సిన ప‌దార్థాలు..
మ‌ల్టీ మిల్లెట్ ర‌వ్వ – క‌ప్పు (నాన‌బెట్టాలి), తరిగిన ఉల్లిపాయ – ఒక‌టి, ప‌చ్చి మిర్చి – 5, జీల‌క‌ర్ర, తరిగిన వెల్లుల్లి, అల్లం – ఒక టీస్పూన్ చొప్పున, గ‌రం మ‌సాలా – పావు టీస్పూన్, కొత్తిమీర – కొద్దిగా, నెయ్యి, ఉప్పు – త‌గినంత, దాల్చిన చెక్క పొడి – అర టీస్పూన్, మిరియాల పొడి – పావు టీస్పూన్.
మ‌ల్టీ మిల్లెట్స్ ఉప్మా త‌యారు చేసే విధానం..
స్ట‌వ్ వెలిగించి క‌ళాయి పెట్టి నెయ్యి వేయాలి. అది కాగిన త‌రువాత ఉల్లిపాయ, ప‌చ్చి మిర్చి ముక్క‌లు, తరిగిన వెల్లుల్లి, అల్లం, జీల‌క‌ర్ర వేసి బాగా వేయించాలి. వీటిలోనే ర‌వ్వ‌ను వేసి కాసేపు వేయించాలి. ఆ త‌రువాత క‌ప్పు ర‌వ్వ‌కు రెండు క‌ప్పుల నీళ్లు పోయాలి. త‌గినంత ఉప్పు వేసి ఉడికించాలి. ఇందులోనే కొద్దిగా కొత్తిమీర వేసుకోవాలి. ఆ త‌రువాత మిరియాల పొడి, దాల్చిన చెక్క పొడి, గ‌రం మ‌సాలా వేసి మ‌రోసారి క‌ల‌పాలి. దీంతో రుచిక‌ర‌మైన మ‌ల్టీ మిల్లెట్స్ ఉప్మా రెడీ అవుతుంది. దీన్ని నేరుగా తిన‌వ‌చ్చు. లేదా ట‌మాటా చ‌ట్నీతో తిన‌వ‌చ్చు. ఎంతో రుచిగా ఉంటుంది. ఆరోగ్య‌క‌ర‌మైన ప్రయోజనాలు క‌లుగుతాయి.
