Covid 19 Anti Body Test : గత రెండేళ్ల నుంచి కరోనా వైరస్‌ ప్రపంచంపై దాడి చేస్తూనే ఉంది. అనేక వేరియెంట్ల రూపంలో మార్పులు చెంది.. పెద్ద ఎత్తున ప్రజలకు సోకింది. దీంతో కొన్ని కోట్ల మంది కరోనా కారణంగా అసువులు బాసిపోయారు. అయినప్పటికీ ఈ మహమ్మారి ప్రభావం ఇంకా పోలేదు.
ప్రస్తుతం ఒమిక్రాన్‌ రూపంలో కరోనా మరోమారు పంజా విసురుతోంది. ఇది అంత ప్రాణాంతకం కానట్లు తెలుస్తున్నప్పటికీ వైరస్‌ వ్యాప్తి గత వేరియెంట్ల కన్నా ఎక్కువగా ఉండడం కలవరపెడుతోంది. దీని వల్ల మరిన్ని వేరియెంట్లు పుట్టుకొచ్చే అవకాశం లేకపోలేదని నిపుణులు అంటున్నారు.
అయితే కరోనా నేపథ్యంలో మనకు తరచూ వినబడుతున్న మాట.. యాంటీ బాడీ టెస్టు. ఇంతకీ అసలు ఇదేమిటి ? దీన్ని ఎవరు చేయించుకోవాలి ? దీని వల్ల ఏం తెలుస్తుంది ? అన్న వివరాలను ఇప్పుడు తెలుసుకుందాం.
యాంటీ బాడీ టెస్టును ఎప్పుడైనా చేయించుకోవచ్చు. దీనికి ఉపవాసం ఉండాల్సిన పనిలేదు. రక్త నమూనా ఆధారంగా ఈ టెస్టు చేస్తారు. ఇందులో కోవిడ్‌ యాంటీ బాడీ ఐజీజీ, యాంటీ బాడీస్‌ టోటల్‌ అని రెండు టెస్టులు ఉంటాయి. ఒక టెస్టు చేస్తే రెండు రిజల్ట్స్‌ వస్తాయి. రిజల్ట్స్‌ వచ్చేందుకు సుమారుగా 24 నుంచి 48 గంటల సమయం పడుతుంది.
ప్రస్తుతం చాలా డయాగ్నస్టిక్‌ సెంటర్లలో, హెల్త్‌ యాప్‌లలో కోవిడ్‌ యాంటీ బాడీ టెస్టులను చేస్తున్నారు. హెల్త్‌ యాప్‌లలో అయితే డిస్కౌంట్‌లకే రూ.400 నుంచి రూ.600 వరకు ఈ టెస్టును చేస్తున్నారు. టెస్ట్‌ బుక్‌ చేస్తే యాప్‌కు చెందిన సిబ్బంది ఇంటికే వచ్చి శాంపిల్‌ తీసుకుంటారు. తరువాత 24 నుంచి 48 గంటల్లో రిపోర్టులను ఈ-మెయిల్‌కు పంపిస్తారు.
ఇక యాంటీ బాడీ టెస్టు వల్ల మన శరీరంలో యాంటీ బాడీలు ఉన్నాయా, లేదా.. అనే విషయాలు తెలుసుకోవచ్చు. కోవిడ్‌ నుంచి రికవరీ అయిన వారు తమలో యాంటీ బాడీలు ఉన్నాయా, లేదా అని తెలుసుకునేందుకు ఈ టెస్టును చేయించుకోవచ్చు.
అలాగే వ్యాక్సిన్‌ తీసుకున్న తరువాత యాంటీ బాడీలు తయారవుతాయి.. కనుక వ్యాక్సిన్‌ వేయించుకున్న వారు తమలో యాంటీ బాడీలు ఉన్నాయా, లేదా.. అని తెలుసుకునేందుకు ఈ టెస్టును చేయించుకోవచ్చు. యాంటీ బాడీలు ఉంటే వ్యాక్సిన్‌ పనిచేస్తుందని అర్థం. అయితే కొందరిలో యాంటీ బాడీలు ఏర్పడవు. దీంతో టెస్టుల్లో నెగెటివ్‌ వస్తుంది. అంతమాత్రం చేత వ్యాక్సిన్‌ పనిచేయడం లేదని అనుకోరాదు.
ఇక వ్యాక్సిన్‌ తీసుకోన‌ప్పటికీ.. తమకు కోవిడ్‌ వచ్చి పోయిందా.. అన్న విషయాన్ని నిర్దారించుకునేందుకు యాంటీ బాడీల టెస్టు చేయించుకోవచ్చు. అలాంటి వారిలో యాంటీ బాడీలు ఉంటే వారికి కోవిడ్‌ వచ్చి పోయిందని తెలుస్తుంది. అంటే.. వారిలో ఇమ్యూనిటీ బాగా ఉన్నట్లు లెక్క.
అయితే ఈ టెస్టు పూర్తి స్థాయిలో కచ్చితత్వంతో కూడుకున్నది కాదు. కానీ ఒక అంచనా కోసం ఈ టెస్టును చేయించుకోవచ్చు.
