Bheemla Nayak : ప‌వ‌న్ క‌ల్యాణ్ అభిమానుల‌కు ఆహా, హాట్ స్టార్ ఓటీటీ సంస్థ‌లు గుడ్ న్యూస్ చెప్పాయి. భీమ్లా నాయక్ సినిమాను అనుకున్న తేదీ క‌న్నా ఒక రోజు ముందుగానే స్ట్రీమ్ చేయాల‌ని నిర్ణ‌యించాయి. ఈ క్ర‌మంలోనే భీమ్లా నాయక్ సినిమాను ముందుగా అనుకున్న‌ట్లు మార్చి 25వ తేదీన కాకుండా మార్చి 24వ తేదీనే ఆయా యాప్‌లు స్ట్రీమ్ చేయ‌నున్నాయి. అయితే ఈ స‌డెన్ నిర్ణ‌యం తీసుకోవ‌డం వెనుక బ‌ల‌మైన కార‌ణమే ఉంద‌ని చెప్ప‌వ‌చ్చు.
ద‌ర్శ‌క ధీరుడు రాజ‌మౌళి తెర‌కెక్కించిన ఆర్ఆర్ఆర్ సినిమా ఈ నెల 25వ తేదీన ప్రపంచ వ్యాప్తంగా భారీ ఎత్తున థియేట‌ర్ల‌లో విడుద‌ల‌వుతోంది. అయితే అదే రోజు భీమ్లా నాయ‌క్‌ను ఓటీటీలో రిలీజ్ చేయాల‌ని ముందుగా నిర్ణ‌యించారు. దీంతో ఆహా, హాట్ స్టార్ సంస్థ‌లు రెండూ వేర్వేరు ప్ర‌క‌ట‌న‌ల్లో మార్చి 25వ తేదీన ఈ మూవీని స్ట్రీమ్ చేస్తామ‌ని తెలిపాయి. కానీ ఆ రోజు ఆర్ఆర్ఆర్ మూవీ విడుద‌ల ఉన్నందున ఒక రోజు ముందుగానే భీమ్లా నాయ‌క్‌ను స్ట్రీమ్ చేయాల‌ని నిర్ణ‌యించాయి. దీంతో మార్చి 24నే ఈ సినిమా ఓటీటీల్లోకి రానుంది.
ఆర్ఆర్ఆర్ సినిమాకు ఎలాంటి ఇబ్బంది క‌లిగించ‌కూడ‌ద‌నే ఉద్దేశంతోనే ఆహా, హాట్ స్టార్‌లు ఈ నిర్ణ‌యం తీసుకున్నాయ‌ని తెలుస్తోంది. ఇక ఆర్ఆర్ఆర్ సినిమా ఇప్ప‌టికే భారీగా ప్రీ రిలీజ్ బిజినెస్ చేసింది. అమెరికాలో 20 ల‌క్ష‌ల డాల‌ర్ల‌కు పైగా ప్రీమియ‌ర్‌ల ద్వారా వ‌సూలు చేసింది. ఈ క్ర‌మంలోనే మార్చి 25వ తేదీన సినిమా విడుద‌ల కోసం అభిమానులు ఎంతో ఆస‌క్తిగా ఎదురు చూస్తున్నారు. ఇక ఇప్ప‌టికే థియేట‌ర్ల వ‌ద్ద అటు ఎన్‌టీఆర్ ఫ్యాన్స్, ఇటు రామ్ చ‌ర‌ణ్ ఫ్యాన్స్ తెగ సంద‌డి చేస్తున్నారు.
