Healthy Green Kichdi : గ్రీన్ కిచిడీ.. ఆకుకూర‌లు, పెస‌ర్లు వేసి వండే ఈ కిచిడీ చాలా రుచిగా ఉంటుంది. అల్పాహారంగా తీసుకోవ‌డానికి, లంచ్ బాక్స్ లోకి తీసుకోవ‌డానికి ఇది చాలా చ‌క్క‌గా ఉంటుంది. అలాగే దీనిని తీసుకోవ‌డం వ‌ల్ల మ‌న ఆరోగ్యానికి కూడా ఎంతో మేలు క‌లుగుతుంది. బ‌రువు త‌గ్గాల‌నుకునే వారితో పాటు 6 నెల‌ల పిల్ల‌ల నుండి పెద్ద‌ల వ‌ర‌కు ఎవ‌రైనా దీనిని తీసుకోవ‌చ్చు. ఈ కిచిడీని త‌యారు చేసుకోవ‌డం చాలా సుల‌భం. చాలా రుచిగా ఎవ‌రైనా త‌యారు చేసుకోవ‌చ్చు. ఆరోగ్యానికి ఎంతో మేలు చేసే ఈ గ్రీన్ కిచిడీని ఎలా త‌యారు చేసుకోవాలి.. త‌యారీకి కావ‌ల్సిన ప‌దార్థాల గురించి ఇప్పుడు తెలుసుకుందాం.
గ్రీన్ కిచిడీ త‌యారీకి కావ‌ల్సిన ప‌దార్థాలు..
అర‌గంట పాటు నాన‌బెట్టిన బియ్యం – అర క‌ప్పు, 2 గంట‌ల పాటు నాన‌బెట్టిన పెస‌ర్లు – అర క‌ప్పు, ప‌చ్చిబ‌ఠాణీ – అర క‌ప్పు, నీళ్లు – 3 క‌ప్పులు, ఉప్పు – త‌గినంత, నెయ్యి – 2 టేబుల్ స్పూన్స్, జీల‌క‌ర్ర – ఒక టీ స్పూన్, ఇంగువ – చిటికెడు, చిన్న‌గా త‌రిగిన ఉల్లిపాయ ముక్క‌లు – ఒక క‌ప్పు, అల్లం వెల్లుల్లి పేస్ట్ – ఒక టీ స్పూన్, చిన్న‌గా త‌రిగిన ప‌చ్చిమిర్చి – 1, మెంతికూర ఆకులు – ఒక క‌ట్ట, చిన్న‌గా త‌రిగిన పాల‌కూర – ఒక క‌ట్ట, కారం – ఒక టీ స్పూన్, ప‌సుపు – అర టీ స్పూన్.
గ్రీన్ కిచిడీ త‌యారీ విధానం..
ముందుగా కుక్క‌ర్ లో బియ్యం, పెస‌ర్లు, ఉప్పు,నీళ్లు పోసి మూత పెట్టి 4 విజిల్స్ వ‌చ్చే వ‌ర‌కు ఉడికించాలి. దీనిని మెత్త‌గా ఉడికించుకున్న త‌రువాత క‌ళాయిలో నెయ్యి వేసి వేడి చేయాలి. నెయ్యి వేడ‌య్యాక జీల‌క‌ర్ర, ఇంగువ వేసి వేయించాలి. త‌రువాత ఉల్లిపాయ ముక్క‌లు వేసి వేయించాలి. ఇవి వేగిన త‌రువాత ప‌చ్చిమిర్చి, అల్లం వెల్లుల్లి పేస్ట్ వేసి వేయించాలి. అల్లం ప‌చ్చి వాస‌న పోయిన త‌రువాత మెంతికూర, పాల‌కూర వేసి వేయించాలి.వీటిని ద‌గ్గ‌ర ప‌డే వ‌ర‌కు వేయించిన త‌రువాత కారం, ప‌సుపు, ఉప్పు వేసి పూర్తిగా మ‌గ్గించాలి. ఆకుకూర‌లు మ‌గ్గిన త‌రువాత ఉడికించిన అన్నం వేసి క‌ల‌పాలి. అన్నంలోని త‌డి అంతా పోయే వ‌ర‌కు ఉడికించిన త‌రువాత కొత్తిమీర చ‌ల్లుకుని స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే గ్రీన్ కిచిడీ త‌యార‌వుతుంది. దీనిని చ‌ట్నీ, అప్పడం, రైతా వంటి వాటితో తింటే చాలా రుచిగా ఉంటుంది. ఈ గ్రీన్ కిచిడీని తిన‌డం వ‌ల్ల మ‌నం రుచితో పాటు ఆరోగ్యాన్ని కూడా పొంద‌వ‌చ్చు.
