Instant Ponganalu : మనం దోశ పిండితో పొంగ‌నాల‌ను కూడా త‌యారు చేసుకుని తింటూ ఉంటాం. ఎంతో కాలంగా ఈ పొంగ‌నాల‌ను త‌యారు చేసుకుని తింటూ ఉంటాం. వీటిని ఇష్టంగా తినే వారు కూడా మ‌న‌లో చాలా మంది ఉన్నారు. ఈ పొంగ‌నాల‌ను దోశ పిండితోనే కాకుండా అటుకుల‌ను ఉప‌యోగించి ఇన్ స్టాంట్ గా అప్పటికప్పుడు త‌యారు చేసుకుని తినవచ్చు. ఇన్ స్టాంట్ గా త‌యారు చేసే ఈ పొంగ‌నాలు కూడా చాలా రుచిగా ఉంటాయి. అటుకుల‌తో ఇన్ స్టాంట్ గా పొంగ‌నాల‌ను ఎలా త‌యారు చేసుకోవాలో ఇప్పుడు తెలుసుకుందాం.
ఇన్ స్టాంట్ పొంగ‌నాల త‌యారీకి కావ‌ల్సిన ప‌దార్థాలు..
అటుకులు – 2 క‌ప్పులు, బొంబాయి ర‌వ్వ – ఒక క‌ప్పు, పుల్ల‌టి పెరుగు – ఒక క‌ప్పు, నీళ్లు – ఒక క‌ప్పు, ఉప్పు – త‌గినంత, చిన్న‌గా తరిగిన ఉల్లిపాయ – 1, క్యారెట్ తురుము – 3 టేబుల్ స్పూన్స్, అల్లం తరుగు – ఒక టీ స్పూన్, తరిగిన కొత్తిమీర – కొద్దిగా, తరిగిన క‌రివేపాకు – ఒక రెమ్మ, చిన్న‌గా తరిగిన ప‌చ్చిమిర్చి – 2.
ఇన్ స్టాంట్ పొంగ‌నాల త‌యారీ విధానం..
ముందుగా ఒక గిన్నెలో అటుకులు తీసుకుని శుభ్రంగా క‌డుక్కోవాలి. త‌రువాత పెరుగు, ర‌వ్వ, నీళ్లు పోసి క‌లిపి మూత పెట్టి 10 నిమిషాల పాటు ప‌క్క‌కు ఉంచాలి. త‌రువాత ఈ అటుకుల మిశ్ర‌మాన్ని ఒక జార్ లోకి తీసుకుని త‌గిన‌న్ని నీళ్లు పోసి దోశ పిండిలా మిక్సీ ప‌ట్టుకుని ఒక గిన్నెలోకి తీసుకోవాలి. త‌రువాత ఇందులో మిగిలిన ప‌దార్థాల‌న్నీ వేసి బాగా క‌లుపుకోవాలి. ఇప్పుడు స్ట‌వ్ మీద పొంగ‌నాల పెన్నాన్ని ఉంచి అందులో నూనె వేసి వేడి చేయాలి. నూనె వేడ‌య్యాక పొంగ‌నాల గుంత‌ల్లో పిండిని వేసుకోవాలి. త‌రువాత దీనిపై మూత పెట్టి 2 నిమిషాల పాటు ఎర్ర‌గా అయ్యే వ‌ర‌కు కాల్చుకోవాలి. త‌రువాత మ‌రో వైపుకు తిప్పి మ‌రో రెండు నిమిషాల పాటు కాల్చుకుని ప్లేట్ లోకి తీసుకోవాలి.
ఇలా చేయ‌డం వ‌ల్ల ఎంతో రుచిగా ఉండే అటుకుల పొంగ‌నాలు త‌యారవుతాయి. వీటిని ప‌ల్లి చ‌ట్నీ, కొబ్బ‌రి చ‌ట్నీ వంటి వాటితో క‌లిపి తింటే చాలా రుచిగా ఉంటుంది. ఉద‌యం అల్పాహారంగా లేదా స్నాక్స్ గా ఇలా పొంగ‌నాల‌ను త‌యారు చేసుకుని తినవచ్చు. స‌మ‌యం త‌క్కువ‌గా ఉన్న‌వారు అప్పటికప్పుడు ఇలా అటుకుల‌తో పొంగ‌నాల‌ను త‌యారు చేసుకుని తినవచ్చు.
