Potlakaya Podi Pappu : మ‌నం ఆహారంగా తీసుకునే కూర‌గాయ‌ల్లో పొట్ల‌కాయ కూడా ఒక‌టి. కానీ చాలా మంది దీనిని తిన‌డానికి ఇష్ట‌ప‌డ‌రు. ఇత‌ర కూర‌గాయ‌ల వ‌లె పొట్ల‌కాయ కూడా మ‌న ఆరోగ్యానికి ఎంతో మేలు చేస్తుంది. బ‌రువు త‌గ్గ‌డంలో, గుండెను ఆరోగ్యంగా ఉంచ‌డంలో, జీర్ణ‌శ‌క్తిని మెరుగుప‌ర‌చ‌డంలో, మూత్ర‌పిండాల్లో మ‌లినాల‌ను తొల‌గించ‌డంలో ఇలా అనేక విధాలుగా పొట్ల‌కాయ మ‌న‌కు ఉప‌యోగ‌ప‌డుతుంది. పొట్ల‌కాయ‌తో చేసుకోద‌గిన వంట‌కాల్లో పొట్ల‌కాయ పొడిప‌ప్పు కూర కూడా ఒక‌టి. ఈ కూర చాలా రుచిగా ఉంటుంది. దీనిని త‌యారు చేయ‌డం కూడా చాలా తేలిక. రుచిగా, సుల‌భంగా పొట్ల‌కాయ‌తో పొడి ప‌ప్పు కూర‌ను ఎలా త‌యారు చేసుకోవాలి.. అన్న వివ‌రాల‌ను ఇప్పుడు తెలుసుకుందాం.
పొట్ల‌కాయ పొడి ప‌ప్పు త‌యారీకి కావ‌ల్సిన ప‌దార్థాలు..
నాన‌బెట్టిన కందిప‌ప్పు – ఒక‌టిన్న‌ర టీ గ్లాస్, ప‌సుపు – అర టీ స్పూన్, త‌రిగిన పొట్ల‌కాయ – 1, నూనె – రెండు టేబుల్ స్పూన్స్, క‌చ్చా ప‌చ్చాగా దంచిన వెల్లుల్లి రెబ్బ‌లు – 4, ఆవాలు – అర టీ స్పూన్, జీలకర్ర – అర టీ స్పూన్, ఎండుమిర్చి – 2, త‌రిగిన ప‌చ్చిమిర్చి – 3, క‌రివేపాకు – ఒక రెమ్మ, ఉప్పు – త‌గినంత, కారం – ఒక టీ స్పూన్.
పొట్ల‌కాయ పొడిప‌ప్పు త‌యారీ విధానం..
ముందుగా ఒక గిన్నెలో కందిప‌ప్పును తీసుకుని శుభ్రంగా క‌డ‌గాలి. త‌రువాత త‌గినన్ని నీళ్లు, ప‌సుపు వేసి ప‌ప్పును మెత్త‌గా ఉడికించాలి. త‌రువాత ప‌ప్పులో ఉండే నీటిని వ‌డ‌క‌ట్టి ప‌ప్పును ప‌క్క‌కు ఉంచాలి. అదే విధంగా పొట్ల‌కాయ‌ల‌ను కూడా ఉడికించి వ‌డ‌క‌ట్టుకుని ప‌క్క‌కు ఉంచాలి. ఇప్పుడు క‌ళాయిలో నూనె వేసి వేడి చేయాలి. నూనె వేడ‌య్యాక ఆవాలు, జీలకర్ర, వెల్లుల్లి రెబ్బ‌లు వేసి వేయించాలి. త‌రువాత ఎండుమిర్చి, ప‌చ్చిమిర్చి, క‌రివేపాకు, కొద్దిగా ప‌సుపు వేసి కలపాలి. తాళింపు చ‌క్క‌గా వేగిన త‌రువాత ఉడికించిన పొట్ల‌కాయ ముక్క‌ల‌ను వేసి కలపాలి. వీటిని రెండు నిమిషాల పాటు వేయించిన త‌రువాత ఉడికించిన ప‌ప్పు వేసి కలపాలి. త‌డి పోయే వ‌ర‌కు ఉడికించిన త‌రువాత ఉప్పు, కారం వేసి కలపాలి.
దీనిని మ‌రో నిమిషం పాటు ఉడికించి స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే పొట్ల‌కాయ పొడిప‌ప్పు కూర త‌యార‌వుతుంది. దీనిని అన్నం, చ‌పాతీ వంటి వాటితో క‌లిపి తింటే చాలా రుచిగా ఉంటుంది. పొట్ల‌కాయ‌ను తిన‌ని వారు కూడా ఈ కూర‌ను ఇష్టంగా తింటారు. ఈ విధంగా పొట్ల‌కాయ‌ల‌తో కూర‌ను త‌యారు చేసుకుని తిన‌డం వ‌ల్ల రుచితో పాటు చ‌క్క‌టి ఆరోగ్యాన్ని కూడా సొంతం చేసుకోవ‌చ్చు.
