Baahubali Making : ద‌ర్శ‌క ధీరుడు రాజమౌళి తెర‌కెక్కించిన మోస్ట్ క్రేజీ ప్రాజెక్ట్ బాహుబలి. రెండు భాగాలుగా రూపొందిన ఈ చిత్రం అంద‌రిచే అనేక ప్ర‌శంస‌లు అందుకుంది. అంతర్జాతీయంగా కూడా చాలామంది ఈ సినిమా గురించి సానుకూల అభిప్రాయాలను వెల్లడించారు. 1000 కోట్ల రూపాయల గ్రాస్ కలెక్షన్లను సొంతం చేసుకున్న సినిమాలలో ఈ సినిమా ఒకటి కావడం గమనార్హం.2015 సంవత్సరం జులై 10వ తేదీన ఈ సినిమా థియేటర్లలో విడుదలైంది. ఈ సినిమాకి సంబంధించి అనేక విష‌యాలు అభిమానుల‌కి ఆస‌క్తిని క‌లిగిస్తుంటాయి. బాహుబలి ది బిగినింగ్ సినిమాలో బాహుబలి విగ్రహాన్ని పైకి లేపిన తర్వాత ఇంటర్వెల్ సీన్ వస్తుందనే సంగతి తెలిసిందే.అయితే దర్శకుడు మొదట ఇంటర్వెల్ సీన్ ను మరో చోట వేద్దామని అనుకున్నారు.
కాని విగ్రహం పైకి లేపిన తర్వాత ఇంటర్వెల్ సీన్ వస్తే బాగుంటుందని చెప్పడంతో నిర్ణయాన్ని మార్చుకున్నారు.బాహుబలి ది బిగినింగ్ లో కోతి నగల మూట తీసుకొని వస్తే ఆ నగలను చూసి అవంతిక రూపం చెక్కేలా ఒక సీన్ ను రాజమౌళి రాసుకున్నారు.అయితే కోతి విషయంలో సెన్సార్ వాళ్ల నుంచి అభ్యంతరాలు రావడంతో ఆ సన్నివేశం విషయంలో మార్పులు జరిగాయని సమాచారం. ఈ సినిమా కోసం తమిళ రచయిత మదన్ కార్కి “కిలికిలి” లేదా “కిలికి” అనే పేరుతో ఓ కొత్త భాషను రూపొందించ‌గా, ఒక సినిమా కోసం ఓ భాషను రూపొందించడం భారతదేశంలో ఇదే మొదటిసారి.
ఈ సినిమా ప్రీ ప్రొడక్షన్ పనులు ఏడాది పాటు జరిగాయి. 15,000 స్టొరీ బోర్డు స్కెచ్చులు రూపొందించారు. ఓ భారతీయ సినిమాకు ఇంతటి ప్రీ ప్రొడక్షన్ పనులు చేయడం ఈ సినిమాకే మొదటిసారి అని చెప్పాలి. ఈ సినిమాలోని తమ పాత్రలకు అనుగుణంగా ప్రభాస్, అనుష్క, రానాలు కత్తిసాము నేర్చుకోగా, ప్రభాస్, రానాలు అదనంగా గుర్రపుస్వారీలు నేర్చుకోవడం జరిగింది. మొత్తం 15 విభాగాలలో ఈ సినిమాకి నంది అవార్డులు లభించాయి. ఇక ఈ మూవీ ఇంత మంచి విజ‌యం సాధించ‌డం వెన‌క అనేక వీఎఫ్ఎక్స్ కంపెనీలు ఉన్నాయి. రామోజీ ఫిలిం సిటీలో ఈ సినిమా కోసం అనేక భారీ సెట్స్ వేశారు. అంతేకాదు చిత్రం ఫైటింగ్ స‌మ‌యంలో ఎంతో మంది జూనియర్ ఆర్టిస్ట్‌ల‌ని ఉప‌యోగించారు.
