Egg Sherwa Recipe : కోడిగుడ్ల‌తో మ‌నం ర‌క‌ర‌కాల వంట‌కాల‌ను త‌యారు చేస్తూ ఉంటాము. కోడిగుడ్ల‌తో చేసుకోద‌గిన రుచిక‌ర‌మైన వంట‌కాల్లో ఎగ్ షేర్వా కూడా ఒక‌టి. ఎగ్ షేర్వా చాలా రుచిగా ఉంటుంది. అన్నం, రోటీ, చ‌పాతీ, పుల్కా, ప‌రోటా వంటి వాటితో తింటే చాలా రుచిగా ఉంటుంది. ఈ ఎగ్ షేర్వాను ఒక్క‌సారి రుచి చూస్తే మ‌ళ్లీ ఇదే కావాలంటారు. దీనిని త‌యారు చేసుకోవ‌డం కూడా చాలా సుల‌భం. ఎంతో రుచిగా ఉండేఎగ్ షేర్వాను ఎలా త‌యారు చేసుకోవాలి.. త‌యారీకి కావ‌ల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.
ఎగ్ షేర్వా త‌యారీకి కావ‌ల్సిన ప‌దార్థాలు..
ఉడికించిన కోడిగుడ్లు – 4 లేదా త‌గిన‌న్ని, ట‌మాట ముక్క‌లు – అర క‌ప్పు, నూనె – 3 టేబుల్ స్పూన్స్, బిర్యానీ ఆకు – 1, సోంపు గింజ‌లు – ఒక టీ స్పూన్, త‌రిగిన ఉల్లిపాయ – 1, త‌రిగిన ప‌చ్చిమిర్చి – 3, అల్లం వెల్లుల్లి పేస్ట్ – ఒక టీ స్పూన్, క‌రివేపాకు – ఒక రెమ్మ, ప‌సుపు – పావు టీ స్పూన్, కారం – 2 టీ స్పూన్స్ లేదా త‌గినంత, ధ‌నియాల పొడి – ఒక టీస్పూన్, ఉప్పు – త‌గినంత, నీళ్లు – ఒక‌టిన్న‌ర నుండి రెండు గ్లాసులు, త‌రిగిన కొత్తిమీర – కొద్దిగా, త‌రిగిన పుదీనా – కొద్దిగా, క‌సూరిమెంతి – అర టీ స్పూన్.
మ‌సాలా పేస్ట్ త‌యారీకి కావ‌ల్సిన ప‌దార్థాలు..
ఎండు కొబ్బ‌రి ముక్క‌లు – 2 టేబుల్ స్పూన్స్, జీడిప‌ప్పు – 8, దాల్చిన చెక్క – ఒక ఇంచు ముక్క, యాల‌కులు – 3, ల‌వంగాలు – 4, కొత్తిమీర – 2 టేబుల్ స్పూన్స్.
ఎగ్ షేర్వా త‌యారీ విధానం..
ముందుగా జార్ లో ఎండు కొబ్బ‌రి ముక్క‌ల‌తో పాటు మిగిలిన మ‌సాలా ప‌దార్థాలు వేసి మెత్త‌గా మిక్సీ ప‌ట్టుకుని గిన్నెలోకి తీసుకోవాలి. త‌రువాత అదే జార్ లో ట‌మాట ముక్క‌లు వేసి మెత్త‌గా మిక్సీ ప‌ట్టుకోవాలి. త‌రువాత క‌ళాయిలో నూనె వేసి వేడి చేయాలి. నూనె వేడ‌య్యాక బిర్యానీ ఆకు, సోంపు గింజ‌లు వేసి వేయించాలి. త‌రువాత ఉల్లిపాయ ముక్క‌లు, ప‌చ్చిమిర్చి వేసి వేయించాలి. ఇవి వేగిన త‌రువాత అల్లం వెల్లుల్లి పేస్ట్, క‌రివేపాకు వేసి వేయించాలి. త‌రువాత మిక్సీ ప‌ట్టుకున్న ట‌మాట పేస్ట్ వేసి వేయించాలి. దీనిని స‌గం వ‌ర‌కు వేయించిన త‌రువాత మిక్సీ ప‌ట్టుకున్న పేస్ట్ వేసి క‌ల‌పాలి.
త‌రువాత ఉప్పు, కారం, ప‌సుపు వేసి నూనె పైకి తేలే వ‌ర‌కు వేయించాలి. త‌రువాత త‌గిన‌న్ని నీళ్లు, కొత్తిమీర, పుదీనా వేసి క‌ల‌పాలి. నీళ్లు మ‌రిగి ఒక పొంగు వ‌చ్చిన త‌రువాత ఉడికించిన కోడిగుడ్ల‌కు గాట్లు పెట్టి వేసుకోవాలి. త‌రువాత దీనిపై మూత పెట్టి మ‌ధ్య మ‌ధ్య‌లో క‌లుపుతూ 8 నిమిషాల పాటు ఉడికించాలి. ఇలా ఉడికించిన త‌రువాత మ‌రికొద్దిగా కొత్తిమీర, క‌సూరిమెంతి వేసి క‌లిపి స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే ఎగ్ షేర్వా త‌యార‌వుతుంది. దీనిని దేనితో తిన్నా కూడా చాలా రుచిగా ఉంటుంది. ఈ విధంగా త‌యారు చేసిన ఎగ్ షేర్వాను అంద‌రూ ఎంతో ఇష్టంగా తింటారు.
