చాలామంది వారికి జీవితంలో ఏ విధమైనటువంటి కష్టాలు లేకుండా సుఖ సంతోషాలతో సాగిపోవాలని.. సంపదలు కలసి రావాలని భావిస్తారు. ఈ క్రమంలోనే డబ్బులను సంపాదిస్తుంటారు. ఇలా డబ్బులను సంపాదిస్తున్నప్పటికీ కొంత మంది దగ్గర ఏ మాత్రం డబ్బు నిల్వ ఉండదు. ఇలా చేతిలో డబ్బు నిల్వలేని వారు కొన్ని పనులను చేయటం వల్ల ఆర్థికంగా ఎంతో అభివృద్ధి సాధిస్తారని పండితులు చెబుతున్నారు. ముఖ్యంగా మనకు సంపద కలగాలని లక్ష్మీ దేవికి ప్రత్యేక పూజలు చేయడం మనం చూస్తూ ఉంటాము. మనకు ఆర్థిక ఇబ్బందులు తొలగిపోవడంతోపాటు అష్టైశ్వర్యాలు కలగాలంటే ఈ పనులు తప్పనిసరిగా చేయాలని పండితులు తెలియజేస్తున్నారు.
మహిళలు ప్రతి రోజూ ఉదయం లేవగానే పాలు కాచడం అలవాటుగా ఉంటుంది. పాలు కాచే ముందు నియమాలు పాటించడం వల్ల అష్టైశ్వర్యాలు కలుగుతాయని పండితులు చెబుతున్నారు. పాలసముద్రం నుంచి లక్ష్మీదేవి ఉద్భవించింది కనుక పాలను కూడా సాక్షాత్తు లక్ష్మీదేవిగా భావిస్తారు. ఈ క్రమంలోనే పాలను కాచే ముందు.. ముందుగా పొయ్యిని (స్టవ్‌ని) శుభ్రం చేసుకొని గంధం, పసుపు, కుంకుమలతో బొట్లు పెట్టి నమస్కరించుకోవాలి. ఇలా చేసిన అనంతరం పాలు కాచాలి.
అదే విధంగా చాలా మంది పాలను పొయ్యిపై పొంగిస్తుంటారు. ఇలా పాలు పొంగిన తర్వాత పాలలో రెండు బియ్యపు గింజలు వేస్తే అంతా శుభం జరుగుతుంది. అలాగే తొందరగా పాలు చల్లారాలని చాలా మంది పాలు కాగిన తర్వాత పాలపై ఉన్న మూతను తొలగిస్తారు. అలా చేయడం వల్ల పాల నుంచి ఆవిరి ఏ విధంగా అయితే బయటకు వెళ్తుందో అదే విధంగా మన ఇంట్లో ఉన్న సంపద మొత్తం వెళ్ళిపోతుందని పండితులు చెబుతున్నారు. కనుక పాలు కాచే సమయంలో ఈ నియమాలను పాటించడం వల్ల మనం సంపాదించుకున్న డబ్బు వృథా ఖర్చు కాకుండా మన సంపదను వృద్ధి చేసుకోవచ్చు.
