Gongura Pandumirapakaya Nilva Pachadi : మ‌నం గోంగూర‌తో నిల్వ ప‌చ్చ‌ళ్ల‌ను కూడా త‌యారు చేస్తూ ఉంటాము. గోంగూర‌తో చేసుకోద‌గిన రుచిక‌ర‌మైన నిల్వ ప‌చ్చ‌ళ్ల‌ల్లో గోంగూర పండుమిర్చి ప‌చ్చ‌డి కూడా ఒక‌టి. గోంగూర, పండుమిర్చి క‌లిపి చేసే ఈ ప‌చ్చ‌డి చాలా రుచిగా ఉంటుంది. ఒక్క‌సారి ఈ పచ్చడిని రుచి చూస్తే మ‌ళ్లీ మ‌ళ్లీ ఇదే కావాలంటారు. చాలా మంది ఈ పచ్చడిని ఇష్టంగా తింటారు. ఈ గోంగూర పచ్చడిని త‌యారు చేయ‌డం కూడా చాలా సుల‌భం. ప‌చ్చ‌డి పెట్ట‌డం రాని వారు కూడా ఈ పచ్చడిని సుల‌భంగా త‌యారు చేసుకోవ‌చ్చు. ఎంతో రుచిగా, క‌మ్మ‌గా ఉండే ఈ గోంగూర పండుమిర్చి నిల్వ పచ్చడిని ఎలా త‌యారు చేసుకోవాలో ఇప్పుడు తెలుసుకుందాం.
గోంగూర పండుమిర్చి నిల్వ ప‌చ్చ‌డి త‌యారీకి కావ‌ల్సిన ప‌దార్థాలు..
గోంగూర – 10 క‌ట్ట‌లు ( మ‌ధ్య‌స్థంగా ఉన్న‌వి), పండుమిర్చి – పావుకిలో, రాళ్ల ఉప్పు – 100 గ్రా., నూనె – 4 టేబుల్ స్పూన్స్, చింత‌పండు – నిమ్మ‌కాయంత, వెల్లుల్లి రెమ్మ‌లు – 20, వేయించిన మెంతుల‌పొడి – ఒక టీ స్పూన్.
గోంగూర పండుమిర్చి నిల్వ ప‌చ్చ‌డి త‌యారీ విధానం..
ముందుగా గోంగూర‌ను శుభ్రంగా క‌డిగి త‌డి లేకుండా ఆర‌బెట్టుకోవాలి. అలాగే పండుమిర్చిని కూడా శుభ్రం చేసుకుని ముక్క‌లుగా కట్ చేసుకోవాలి. త‌డి లేకుండా ఆర‌బెట్టుకోవాలి. ఇప్పుడు కళాయిలో నూనె వేసి వేడి చేయాలి. త‌రువాత గోంగూర వేసి క‌ల‌పాలి. ఇందులోనే చింత‌పండును కూడా వేసి మ‌గ్గించాలి. గోంగూర మ‌గ్గిన త‌రువాత స్ట‌వ్ ఆఫ్ చేసి చ‌ల్లారనివ్వాలి. ఇప్పుడు త‌డి లేకుండా శుభ్రం చేసుకున్న జార్ ను తీసుకుని అందులో ముక్క‌లుగా కట్ చేసిన పండుమిర్చిని, రాళ్ల ఉప్పును వేసి మరీ మెత్త‌గా కాకుండా కొద్దిగా బ‌ర‌క‌గా ఉండేలా మిక్సీ ప‌ట్టుకుని గిన్నెలోకి తీసుకోవాలి. త‌రువాత అదే జార్ లో మ‌గ్గించిన గోంగూర, వెల్లుల్లి రెమ్మ‌లు వేసి క‌చ్చా ప‌చ్చాగా మిక్సీ ప‌ట్టుకుని పండుమిర్చి మిశ్ర‌మంలో వేసి క‌ల‌పాలి.
త‌రువాత ఇందులోనే మెంతుల పొడి వేసి క‌ల‌పాలి. ఇలా త‌యారు చేసుకున్న పచ్చడిని త‌డి లేని గాజు సీసాలో లేదా జాడీలో వేసి నిల్వ చేసుకోవాలి. ఇలా చేయ‌డం వల్ల గోంగూర పండుమిర్చి నిల్వ ప‌చ్చ‌డి త‌యార‌వుతుంది. ఈ ప‌చ్చ‌డి ఆరు నెల‌ల‌కు పైగా నిల్వ ఉంటుంది. మ‌న‌కు కావ‌ల్సిన‌ప్పుడు త‌గినంత పచ్చడిని తీసుకుని తాళింపు వేసి స‌ర్వ్ చేసుకోవాలి. దీనిని వేడి వేడి అన్నం, నెయ్యితో తింటే చాలా రుచిగా ఉంటుంది. ఈ విధంగా చాలా సుల‌భంగా గోంగూర పండుమిర్చి పచ్చడిని త‌యారు చేసి తీసుకోవ‌చ్చు.
