Vegetable Soup : మ‌న‌కు ఒంట్లో బాగాలేన‌ప్పుడు లేదా వాతావ‌ర‌ణం చ‌ల్ల‌గా ఉన్న‌ప్పుడు వేడి వేడిగా సూప్ తాగాల‌నిపిస్తూ ఉంటుంది. ఇలా సూప్ తాగాల‌నిపించిన ప్ర‌తిసారీ మ‌నం బ‌య‌ట దొరికే సూప్ ప్యాకెట్ల మీద ఆధార‌ప‌డాల్సి వ‌స్తుంది. బ‌య‌ట వాటిని కొనుగోలు చేసే అవ‌స‌రం లేకుండా మ‌నం ఇంట్లోనే రుచిగా వెజిటెబుల్ సూప్ ను త‌యారు చేసుకుని తాగ‌వ‌చ్చు. ఇంట్లో ఏవిధంగా వెజిటెబుల్ సూప్ ను త‌యారు చేసుకోవాలి.. దాని త‌యారీకి కావ‌ల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.
మిక్స్డ్ వెజిటెబుల్ సూప్ త‌యారీకి కావ‌ల్సిన ప‌దార్థాలు..
వెన్న – అర టేబుల్ స్పూన్, చిన్న‌గా త‌రిగిన వెల్లుల్లి రెబ్బ‌లు – 3, త‌రిగిన స్ప్రింగ్ ఆనియ‌న్స్ – ఒక టేబుల్ స్పూన్, చిన్న‌గా త‌రిగిన క్యారెట్ ముక్క‌లు – 2 టేబుల్ స్పూన్ప్, చిన్న‌గా త‌రిగిన క్యాప్సికం ముక్క‌లు – ఒక టేబుల్ స్పూన్, చిన్న‌గా త‌రిగిన ఫ్రెంచ్ బీన్స్ – 2 టేబుల్ స్పూన్స్, క్యాబేజ్ తురుము – 2 టేబుల్ స్పూన్స్, ఉడికించిన స్వీట్ కార్న్ గింజ‌లు – ఒక టేబుల్ స్పూన్, నీళ్లు – 750 ఎంఎల్, ఉప్పు – త‌గినంత, మిరియాల పొడి – అర టీ స్పూన్, వెనిగ‌ర్ – ఒక టీ స్పూన్, గ్రీన్ చిల్లీ సాస్ – ఒక టీ స్పూన్, పంచ‌దార – ఒక టీ స్పూన్, కార్న్ ఫ్లోర్ – 3 టేబుల్ స్పూన్స్.
మిక్స్డ్ వెజిటెబుల్ సూప్ త‌యారీ విధానం..
ముందుగా ఒక క‌ళాయిలో వెన్న వేసి వేడి చేయాలి. వెన్న క‌రిగిన త‌రువాత వెల్లుల్లి రెబ్బ‌లు, స్ప్రింగ్ ఆనియ‌న్స్ వేసి వేయించుకోవాలి. త‌రువాత కూర‌గాయ ముక్క‌ల‌ను వేసి వేయించుకోవాలి. త‌రువాత స్వీట్ కార్న్ గింజ‌ల‌ను వేసి వేయించుకోవాలి. ఈ కూర‌గాయ ముక్క‌లు 50 శాతం వ‌ర‌కు ఉడికిన త‌రువాత నీళ్లు పోసి మ‌రిగించాలి. ఇందులోనే ఉప్పు, వెనిగ‌ర్, చిల్లీ సాస్, మిరియాల పొడి, పంచ‌దార వేసి కలుపుకోవాలి. త‌రువాత ఒక గిన్నెలో కార్న్ ఫ్లోర్ ను తీసుకుని అందులో 2 టేబుల్ స్పూన్ల నీళ్ల‌ను పోసి ఉండ‌లు లేకుండా కలుపుకోవాలి.
కూర‌గాయ ముక్క‌లు పూర్తిగా ఉడికిన త‌రువాత కార్న్ ఫ్లోర్ నీటిని పోసి కలుపుకోవాలి. త‌రువాత ఈ సూప్ ద‌గ్గ‌ర ప‌డేలా 5 నిమిషాల పాటు ఉడికించాలి. చివ‌ర‌గా కొద్దిగా త‌రిగిన స్ప్రింగ్ ఆనియ‌న్స్ ను చల్లి స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల రుచిగా రెస్టారెంట్ ల‌లో ల‌భించే విధంగా ఉండే వెజిటెబుల్ సూప్ త‌యార‌వుతుంది. వేడిగా ఉన్న‌ప్పుడే ఈ సూప్ ను తీసుకోవ‌డం వ‌ల్ల రుచితోపాటు ఆరోగ్యానికి కూడా మేలు క‌లుగుతుంది.
