అదేదో మన అమ్మకు తమ్ముడైనట్టు చంద్రుడిని మనం చందమామ అని పిలుచుకుంటుంటాం కదా.! అసలు చంద్రుడిని చందమామ అని ఎందుకు పిలుస్తారు. మామ అనే బంధుత్వాన్ని చంద్రుడికి ఎందుకు కలుపుతారు అనే డౌట్స్ ఎప్పుడైనా వచ్చాయా..? నాకు సడెన్ గా ఆ డౌట్ వచ్చి మా సార్ ను అడిగా ఏంటి సార్.? చంద్రుడిని మామ అని పిలిచే బంధుత్వం మనకెక్కడదీ అని…దానికి ఆయన నాకు చెప్పిన సమాధానం ఇక్కడ మీకోసం రాస్తున్నాను. మీకు ఉపయోగపడుతుందని.
వాస్తవానికి చంద్రుడిని సంస్కృతంలో చంద్రమాస్ అంటారు. కాలక్రమేణ…అదే పదం చంద్రమా…అని ఆ తర్వాత చందమా…అనే వారని అటు తర్వాత మన తెలుగు వాళ్ళకు మ అనే అక్షరం మీదున్న అతి ప్రేమ వల్ల చందమా ను కాస్త చందమామ చేశారని చెప్పుకొచ్చారు. సార్…ఇందులో లాజిక్ లేదు కాస్త లాజికల్గా చెప్పండి.అంటే ..దానిదేం భాగ్యం మనవాళ్లే దీనికి గట్టి లాజిక్ ను గతంలోనే చెప్పారు. ఇప్పుడు అది చెప్తా విను…అంటూ.
మన సాంప్రదాయం ప్రకారం లక్ష్మీ దేవతను జగన్మాతగా పిలుచుకుంటారు, అంటే లోకం మొత్తానికి తల్లి లాంటిదన్న మాట.! లక్ష్మీ దేవత క్షీర సాగరం నుండి పుట్టింది. సేమ్ టు సేమ్ అదే క్షీర సాగరం నుండి లక్ష్మీ దేవత తర్వాత చంద్రుడు పుట్టాడట. సో క్షీర సాగరం తల్లి అయితే మొదట పుట్టిన లక్ష్మీదేవి అక్క అవుతుంది, తర్వాత పుట్టిన చంద్రుడు తమ్ముడవుతాడు…ఇప్పుడు లక్ష్మీ దేవత లోకమాత అయితే…లక్ష్మీదేవత తమ్ముడు మనకు మామ అవుతాడుగా…! ఇది చంద్రుడిని చందమామ అనడం వెనుకున్న అసలు లాజిక్.!
