Bagara Rice Aloo Curry : బంగాళాదుంప‌ల‌తో ర‌క‌ర‌కాల వంట‌ల‌ను త‌యారు చేసి తీసుకుంటూ ఉంటాం. బంగాళాదుంప‌తో చేసే ప్ర‌తికూర కూడా చాలా రుచిగా ఉంటుంది. చ‌పాతీలోకి, పులావ్ లోకి, బ‌గారా అన్నంలోకి ర‌క‌ర‌కాలుగా బంగాళాదుంప‌ల‌తో వంట‌లు చేస్తూ ఉంటాం. అందులో భాగంగా ఈ బంగాళాదుంప‌ల‌తో బ‌గారా అన్నంలోకి రుచిగా కూర‌ను ఎలా త‌యారు చేసుకోవాలి.. త‌యారీకి కావ‌ల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.
ఆలూ బ‌గారా క‌ర్రీ త‌యారీకి కావ‌ల్సిన ప‌దార్థాలు..
ఉడికించిన బంగాళాదుంప‌లు – పావు కిలో, త‌రిగిన పెద్ద ఉల్ల‌పాయ – 1, అల్లం వెల్లుల్లి పేస్ట్ – ఒక టేబుల్ స్పూన్, ఎండు కొబ్బ‌రి పొడి – 2 టేబుల్ స్పూన్స్, ప‌ల్లీలు – 2 టేబుల్ స్పూన్స్, నువ్వులు – 2 టేబుల్ స్పూన్స్, గ‌స‌గ‌సాలు – ఒక టీ స్పూన్, గ‌రం మ‌సాలా – ఒక టీ స్పూన్, కారం – ఒక టేబుల్ స్పూన్, ఉప్పు – త‌గినంత, ప‌సుపు – అర టీ స్పూన్, ఎండుమిర్చి – 1, తాళింపు దినుసులు – ఒక టేబుల్ స్పూన్, క‌రివేపాకు – ఒక రెమ్మ, నాన‌బెట్టిన చింత‌పండు – చిన్న నిమ్మ‌కాయ ప‌రిమాణమంతా, నూనె – 2 టేబుల్ స్పూన్స్, త‌రిగిన కొత్తిమీర – కొద్దిగా.
మ‌సాలా దినుసులు..
ధ‌నియాలు – ఒక టేబుల్ స్పూన్, దాల్చిన చెక్క – ఒక ఇంచు ముక్క, యాల‌కులు – 3, ల‌వంగాలు – 4, సాజీరా – ఒక టీ స్పూన్.
ఆలూ బ‌గారా క‌ర్రీ త‌యారీ విధానం..
ముందుగా ఒక క‌ళాయిలో ఒక టీ స్పూన్ నూనె వేసి వేడి చేయాలి. నూనె వేడ‌య్యాక ప‌ల్లీలు, మ‌సాలా దినుసులు, నువ్వులు వేసి దోర‌గా వేయించాలి.. త‌రువాత గ‌స‌గ‌సాలు, ఎండుకొబ్బ‌రి పొడి వేసి వేయించాలి. త‌రువాత వీటిని ఒక జార్ లో వేసి మెత్త‌ని పొడిలా చేసుకోవాలి. త‌రువాత అర గ్లాస్ నీళ్లు పోసి మెత్త‌ని పేస్ట్ లా చేసుకోవాలి. ఇప్పుడు క‌ళాయిలో నూనె వేసి వేడి చేయాలి. నూనె వేడ‌య్యాక తాళింపు దినుసులు, ఎండుమిర్చి, క‌రివేపాకు వేసి వేయించాలి. ఇవి వేగిన త‌రువాత ఉల్లిపాయ ముక్క‌లు, ప‌చ్చిమిర్చి వేసి వేయించాలి. త‌రువాత అల్లం వెల్లుల్లి పేస్ట్ వేసి ప‌చ్చి వాస‌న పోయే వ‌ర‌కు వేయించాలి. త‌రువాత మిక్సీ ప‌ట్టుకున్న మ‌సాలా పేస్ట్, ఉప్పు, కారం, ప‌సుపు, గ‌రం మ‌సాలా వేసి క‌ల‌పాలి.
దీనిని నూనె పైకి తేలే వ‌ర‌కు వేయించాలి. త‌రువాత బంగాళాదుంప ముక్క‌లు, చింత‌పండు ర‌సం, ఒక గ్లాస్ నీళ్లు పోసి క‌ల‌పాలి. త‌రువాత దీనిపై మూత‌ను ఉంచి 15 నిమిషాల పాటు మ‌ధ్య‌స్థ మంట‌పై ఉడికించాలి. చివ‌ర‌గా కొత్తిమీర‌ను చ‌ల్లి స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే ఆలూ బ‌గారా క‌ర్రీ త‌యార‌వుతుంది. దీనిని బ‌గారా అన్నం, చ‌పాతీ, పులావ్ వంటి వాటితో క‌లిపి తింటే చాలా రుచిగా ఉంటుంది. త‌ర‌చూ చేసే బంగాళాదుంప కూర కంటే ఈ విధంగా చేసిన ఆలూ క‌ర్రీ మ‌రింత రుచిగా ఉంటుంది.
