Instant Crispy Rava Vada : మ‌నం అల్పాహారంగా తీసుకునే వాటిలో వ‌డ‌లు కూడా ఒక‌టి. వ‌డ‌లు క్రిస్పీగా చాలా రుచిగా ఉంటాయి. చాలా మంది వీటిని ఇష్టంగా తింటారు. సాధార‌ణంగా ఈ వ‌డ‌ల‌ను మిన‌ప‌ప్పుతో త‌యారు చేస్తూ ఉంటాము. మిన‌ప‌ప్పుతో చేసే వ‌డ‌లు రుచిగా ఉన్న‌ప్ప‌టికి వీటిని త‌యారు చేయ‌డానికి ఎక్కువ స‌మ‌యం ప‌డుతుంద‌ని చెప్ప‌వ‌చ్చు. ఇలా మిన‌పప్పుతోనే కాకుండా మ‌నం ర‌వ్వ‌తో కూడా వ‌డ‌ల‌ను త‌యారు చేసుకోవ‌చ్చు. అలాగే ఈ వ‌డ‌ల‌ను అర‌గంట‌లోనే త‌యారు చేసుకోవ‌చ్చు. ర‌వ్వ‌తో చేసే ఈ వ‌డ‌లు కూడా చాలా రుచిగా, క్రిస్పీగా ఉంటాయి. వీటిని త‌యారు చేయ‌డం కూడా చాలా తేలిక. ఉద‌యం పూట స‌మ‌యం త‌క్కువ‌గా ఉన్న‌ప్పుడు ఇలా ర‌వ్వ‌తో వ‌డ‌ల‌ను త‌యారు చేసి తీసుకోవ‌చ్చు. ఇన్ స్టాంట్ గా ర‌వ్వ‌తో వ‌డ‌ల‌ను ఎలా త‌యారు చేసుకోవాలి.. త‌యారీకి కావ‌ల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.
ఇన్ స్టాంట్ ర‌వ్వ వ‌డ‌ల త‌యారీకి కావ‌ల్సిన ప‌దార్థాలు..
బొంబాయి ర‌వ్వ – ఒక క‌ప్పు, అటుకులు – పావు క‌ప్పు, పెరుగు – ఒక క‌ప్పు, ఉప్పు – త‌గినంత, ఉడికించిన బంగాళాదుంప – 1, చిన్న‌గా త‌రిగిన ఉల్లిపాయ ముక్క‌లు – పావు క‌ప్పు, చిన్న‌గా త‌రిగిన ప‌చ్చిమిర్చి – 1, అల్లం త‌రుగు – ఒక టేబుల్ స్పూన్, త‌రిగిన క‌రివేపాకు – ఒక రెమ్మ, త‌రిగిన కొత్తిమీర – కొద్దిగా, వంట‌సోడా – పావు టీ స్పూన్, ఇంగువ – కొద్దిగా, నూనె – డీప్ ప్రైకు స‌రిప‌డా.
ఇన్ స్టాంట్ ర‌వ్వ వ‌డ‌ల త‌యారీ విధానం..
ముందుగా జార్ లో ర‌వ్వ, అటుకులు వేసి మెత్త‌గా మిక్సీ ప‌ట్టుకోవాలి. త‌రువాత ఈ పొడిని ఒక గిన్నెలోకి తీసుకోవాలి. త‌రువాత ఇందులో పెరుగు, ఉప్పు వేసిక‌ల‌పాలి. త‌రువాత ఈ ర‌వ్వ‌ను 20 నిమిషాల పాటు నాన‌బెట్టాలి. ర‌వ్వ నానిన త‌రువాత ఇందులో బ‌గాళాదుంప‌ను మెత్త‌గా చేసి వేసుకోవాలి. త‌రువాత నూనె త‌ప్ప మిగిలిన ప‌దార్థాలన్నీ వేసి బాగా క‌లుపుకోవాలి. త‌రువాత కళాయిలో నూనె పోసి వేడి చేయాలి. నూనె వేడ‌య్యాక చేతుల‌కు త‌డి చేసుకుని పిండిని తీసుకుని వ‌డ‌లాగా వత్తుకుని నూనెలో వేసుకోవాలి. చేత్తో చేయ‌డం రాని వారు ప్లాస్టిక్ క‌వ‌ర్ మీద లేదా టీ గంటెపై వ‌డ‌ల‌ను వత్తుకుని నూనెలో వేసుకోవాలి. వీటిని మ‌ధ్య‌స్థ మంట‌పై ఎర్ర‌గా అయ్యే వ‌ర‌కు వేయించి ప్లేట్ లోకి తీసుకోవాలి. ఇలా చేయ‌డం వ‌ల్ల ఎంతో రుచిగా ఉండే ఇన్ స్టాంట్ ర‌వ్వ వ‌డ‌లు త‌యార‌వుతాయి. వీటిని చట్నీతో తింటే చాలా రుచిగా ఉంటాయి. ఇలా త‌యారు చేసిన వ‌డ‌ల‌ను ఒక్కటి కూడా విడిచిపెట్ట‌కుండా అంద‌రూ ఎంతో ఇష్టంగా తింటారు.
