Onion Cutlet : ఉల్లిపాయ‌ల‌ను వంట్ల‌లో వాడ‌డంతో పాటు వీటితో మ‌నం వివిధ ర‌కాల చిరుతిళ్ల‌ను కూడా త‌యారు చేస్తూ ఉంటాము. ఉల్లిపాయ‌ల‌తో చేసుకోద‌గిన రుచిక‌ర‌మైన చిరుతిళ్ల‌ల్లో ఆనియ‌న్ కట్లెట్ కూడా ఒక‌టి. ఉల్లిపాయ‌లు, బియ్యంపిండి క‌లిపి చేసే ఈ కట్లెట్ క్రిస్పీగా, చాలా రుచిగా ఉంటాయి. స్నాక్స్ తినాల‌నిపించిన‌ప్పుడు ఇన్ స్టాంట్ గా ఈ కట్లెట్ లను త‌యారు చేసుకుని తిన‌వ‌చ్చు. కేవ‌లం 10 నిమిషాల్లోనే ఈ కట్లెట్ లను త‌యారు చేసుకోవ‌చ్చు. ఇన్ స్టాంట్ గా, సుల‌భంగా, రుచిగా, క్రిస్పీగా ఈ ఆనియ‌న్ కట్లెట్ లను ఎలా త‌యారు చేసుకోవాలి.. అన్న వివ‌రాల‌ను ఇప్పుడు తెలుసుకుందాం.
ఆనియ‌న్ కట్లెట్ త‌యారీకి కావ‌ల్సిన ప‌దార్థాలు..
స‌న్న‌గా పొడుగ్గా త‌రిగిన ఉల్లిపాయ‌లు – మ‌ధ్య‌స్థంగా ఉన్న‌వి 2, అల్లం వెల్లుల్లి పేస్ట్ – అర టీ స్పూన్, జీల‌క‌ర్ర – అర టీ స్పూన్, చిన్న‌గా త‌రిగిన ప‌చ్చిమిర్చి – 2, ఉప్పు – త‌గినంత, కొత్తిమీర త‌రుగు – ఒక టేబుల్ స్పూన్, కారం – అర టీ స్పూన్, నూనె – 2 టీ స్పూన్స్, బియ్యంపిండి – అర క‌ప్పు.
ఆనియ‌న్ కట్లెట్ త‌యారీ విధానం..
ముందుగా ఉల్లిపాయ ముక్క‌ల‌ను గిన్నెలోకి తీసుకుని విడివిడిగా చేసుకోవాలి. త‌రువాత ఇందులో మిగిలిన ప‌దార్థాల‌న్నీ వేసి క‌ల‌పాలి. త‌రువాత పైన కొద్దిగా నీటిని చ‌ల్లుతూ పిండిని గట్టిగా క‌లుపుకోవాలి. త‌రువాత చేతుల‌కు నూనె రాసుకుంటూ పిండిని తీసుకుని కట్లెట్ లాగా వ‌త్తుకుని ప్లేట్ లోకి తీసుకోవాలి. ఇలా అన్నింటిని త‌యారు చేసుకున్న త‌రువాత క‌ళాయిలో నూనె పోసి వేడి చేయాలి. నూనె మ‌ధ్య‌స్థంగా వేడ‌య్యాక కట్లెట్ లను వేసి వేయించాలి. వీటిని మ‌ధ్‌య‌స్థ మంట‌పై రెండు వైపులా ఎర్ర‌గా అయ్యే వ‌ర‌కు కాల్చుకుని ప్లేట్ లోకి తీసుకోవాలి. ఇలా చేయ‌డం వ‌ల్ల ఎంతో రుచిగా ఉండే ఆనియ‌న్ కట్లెట్ త‌యార‌వుతుంది. వీటిని ట‌మాట కిచ‌ప్ తో తింటే చాలా రుచిగా ఉంటాయి. స్నాక్స్ గా అప్పుడ‌ప్పుడూ ఇలా ఉల్లిపాయ‌ల‌తో కట్లెట్ లను త‌యారు చేసుకుని తినివ‌చ్చు. వీటిని అందరూ ఎంతో ఇష్టంగా తింటారు.
