ఇటీవ‌ల కాలంలో చాలా మంది దేశ, విదేశాల‌కి తెగ తిరిగేస్తున్నారు. ఒక దేశంలోని పౌరుడు మరో దేశానికి వెళ్లినప్పుడు పాస్ పోర్ట్,వీసా అవసరం. రాష్ట్రపతి నుండి ప్రధాన మంత్రి వరకు, వారు ఒక దేశం నుండి మరొక దేశానికి వెళ్ళేటప్పుడు వారు కూడా దౌత్య పాస్‌పోర్ట్ కలిగి ఉండాలి. వాస్తవానికి 1920వ సంవత్సరంలో అక్రమ వలసదారులు తమ దేశంలోకి ప్రవేశించకుండా నిరోధించడానికి ప్రపంచవ్యాప్తంగా పాస్ పోర్ట్ లాంటి వ్యవస్థను రూపొందించేందుకు యునైటెడ్ స్టేట్స్ చొరవ తీసుకుంది. ఇందులో భాగంగా… 1924లో యునైటెడ్ స్టేట్స్ తన కొత్త పాస్ పోర్ట్ విధానాన్ని జారీ చేసింది. దీంతో అప్పటి నుంచి ఇతర దేశాలకు వెళ్లాలంటే పాస్ పోర్టు వీసా తప్పనిసరి అయ్యింది.
పాస్ పోర్ట్‌లో ఆ వ్య‌క్తి పేరు, చిరునామా, వయస్సు, ఫోటోగ్రాఫ్, జాతీయత, సంతకం ఉంటాయి. అతను సందర్శించే దేశాన్ని గుర్తించడానికి కూడా ఇది సులభమైన మార్గంగా మారింది. ఇప్పుడు అన్ని దేశాలు ఈ-పాస్‌పోర్ట్‌లను జారీ చేస్తున్నాయి. అయితే ప్రపంచంలో ఎక్కడికైనా ప్రయాణించడానికి పాస్ పోర్ట్ అవసరం లేని ముగ్గురు ప్రత్యేక వ్యక్తులు ఇప్పటికీ ఉన్నారు. ఆ ముగ్గురు కూడా పాస్ పోర్ట్ లేకుండా ఎక్క‌డికైన ప్ర‌యాణించ‌వ‌చ్చు. మ‌రి ఆ ముగ్గురు మ‌రెవ‌రో కాదు బ్రిటన్ రాజు, జపాన్ రాజు – రాణి. ఈ ముగ్గురూ ప్రపంచంలో ఎక్కడికైనా వెళ్లగలరు. వాస్తవానికి చార్లెస్ బ్రిటన్ రాజు కాకముందు ఈ ప్రత్యేక హక్కు దివంగత క్వీన్ ఎలిజబెత్ కు ఉండేది.
రాణిగా ఉన్నప్పుడు ఎలిజబెత్ కు ప్రత్యేక హక్కు ఉంది.. కానీ ఆమె భర్త ప్రిన్స్ ఫిలిప్ దౌత్యపరమైన పాస్ పోర్ట్ కలిగి ఉండాలి. బ్రిటన్ లో సింహాసనంపై కూర్చున్న వ్యక్తికి మొదటి గౌరవం ఇవ్వబడుతుంది. చార్లెస్ బ్రిటన్ రాజు అయిన వెంటనే, అతని కార్యదర్శి తన దేశ విదేశాంగ కార్యాలయం ద్వారా.. “కింగ్ చార్లెస్ ఇప్పుడు బ్రిటీష్ రాజకుటుంబానికి అధిపతి, కాబట్టి అతను పూర్తి గౌరవంతో ఎక్కడికైనా వెళ్లడానికి అనుమతించాలి” అని అన్ని దేశాలకు సందేశాన్ని పంపారు. చార్లెస్ ప్రస్తుతం బ్రిటన్ రాజుగా ఉన్నందున, వివిధ ప్రాంతాలను గౌరవప్రదంగా సందర్శించడానికి అనుమతించాలని, ఎటువంటి ఆటంకాలు ఉండవని చెప్పబడింది. దీంతోపాటు ప్రొటోకాల్‌ కూడా పాటించాలి.
