హిందూ క్యాలెండర్ ప్రకారం కార్తీక మాసం అమావాస్య రోజున దీపావళి పండుగను ఎంతో అంగరంగ వైభవంగా జరుపుకుంటారు. దీపావళి పండుగను సాక్షాత్తూ లక్ష్మీదేవి పుట్టినరోజుగా భావించి అమ్మవారి అనుగ్రహం కోసం భక్తులు వివిధ రకాల నైవేద్యాలతో అమ్మవారికి పూజలు చేసి అమ్మవారి అనుగ్రహాన్ని కోరుతారు. ఇక హిందూ ఆచారాల ప్రకారం దీపావళి పండుగ రోజు కొత్త చీపురును కొనడం ఎంతో మంచిదని భావిస్తారు.
దీపావళి పండుగ రోజు కొత్త చీపురును కొనడానికి కారణం ఏమిటి అనే విషయానికి వస్తే.. సాధారణంగా చీపురును లక్ష్మీ స్వరూపంగా భావిస్తారు. అందుకోసమే లక్ష్మీ స్వరూపిణి అయిన చీపురును దీపావళి పండుగ రోజు కొనుగోలు చేయడం వల్ల సాక్షాత్తు లక్ష్మీదేవి మన ఇంటికి ఆహ్వానించినట్లని భావిస్తారు. ఇలా పండుగ రోజు చీపురు కొనడం వల్ల మన ఇంట్లో సిరి సంపదలు పెరుగుతాయని భావించి పూర్వ కాలం నుంచి ఈ పండుగ రోజు చీపురును కొనడం ఆనవాయితీగా వస్తోంది.
దీపావళి పండుగ రోజు చీపురు కొన్నవారు చీపురుకి పూజ చేసి ఉపయోగించాలి. లక్ష్మీ స్వరూపంగా భావించే చీపురును ఎలాంటి పరిస్థితులలో కూడా అవమానించకూడదు. చాలామంది చీపురును కాళ్లతో తన్నడం, తొక్కడం వంటివి చేస్తుంటారు. ఇలా చేయడం వల్ల పూర్తిగా అమ్మవారి ఆగ్రహానికి గురి కావాల్సి ఉంటుంది.
చీపురును కేవలం దీపావళి పండుగ రోజు మాత్రమే కాకుండా ఎల్లప్పుడూ ఎంతో పవిత్రమైన వస్తువుగా భావించాలి. ఇక దీపావళి రోజు దాన ధర్మాలు చేసే సమయంలో ఇతరులకు చీపురును దానం చేయడం ఎంతో మంచిదని పండితులు తెలియజేస్తున్నారు.
