చిరంజీవి నటించిన హిందీ సినిమాలలో ఆజ్ కా గుండా రాజ్, ప్రతిబంధ్ సినిమాలు మంచి హిట్స్. కానీ శంకర్ తమిళంలో తీసిన జెంటిల్ మేన్ సినిమా హిందీ రీమేక్‌లో చిరంజీవి నటించకుండా ఉండాల్సింది. ముఖ్యంగా దర్శకుడు మహేష్ భట్ ఈ సినిమాకి ఏ మాత్రం న్యాయం చేయలేకపోయారు. ఈ సినిమా తర్వాత మళ్లీ చిరు బాలీవుడ్ వైపు చూడనే చూడలేదు. ముఖ్యంగా “చికుబుకు చికుబుకు రైలే” లాంటి సూపర్ హిట్ పాటలో చిరంజీవి ఎనర్జీ కనిపించినా, డ్యాన్స్ చాలా కృత్రిమంగా ఉంటుంది. హీరో ఎంత ప్రతిభావంతుడైనా, రీమేక్ సమయాలలో కొన్ని కొన్ని క్లాసిక్స్ జోలికి పోకూడదు అనే దానికి ఇదే ఉదాహరణ.
ఇక తెలుగు సినిమాల విషయానికి వస్తే, 1986 లో విడుదలైన వేట సినిమా ఆ రోజులలో హాలీవుడ్ రేంజ్ చిత్రమని అభిమానులు చెప్పుకున్నారు. కానీ ప్రొడక్షన్ వాల్యూస్ బాగున్నా, సినిమా కథాపరంగా పెద్ద దెబ్బ కొట్టేసింది. ముఖ్యంగా సినిమాలో హీరోయిన్ హీరోని కాదని వేరెవరినో పెళ్లి చేసుకోవడం అభిమానులు జీర్ణించుకోలేకపోయారు. దీంతో సినిమా పెద్దగా ఆడలేదు. బహుశా ఈ సినిమా చిరు నటించకపోయుంటే బాగుండేదేమో.
ఇక అల్లుడా మజాకా సినిమా చిరంజీవి మాస్ ఇమేజ్‌ను పెంచుతుంది అనుకుంటే ఫలితం వేరేలా వచ్చింది. చిత్రంలోని డబుల్ మీనింగ్ డైలాగులు, కాస్త ఓవర్ యాక్షన్ సన్నివేశాలు ఎబ్బెట్టుగా ఉంటాయి. సినిమా హిట్టా. ఫట్టా అనే సంగతి పక్కన పెడితే, చిరు ఇలాంటి సినిమా చేయడం అప్పట్లో పెద్ద చర్చనీయాంశమైంది. ఇవివి ఈ సినిమాకి అనుకున్నంత స్థాయిలో న్యాయం చేయలేకపోయారని ఇప్పటికీ అనిపిస్తుంది. బహుశా ఈ సినిమాను కూడా చిరు చేయకుండా ఉండాల్సింది. ఇక విజయభాస్కర్ దర్శకత్వంలో వచ్చిన జై చిరంజీవ సినిమా చాలా సాధారణమైన సినిమా. చిరు స్థాయి సినిమా అసలు కాదిది. కానీ సినిమాలో హీరోలోని కామెడీ యాంగిల్‌ను ఎక్కువగా ఎలివేట్ చేయడానికి ప్రయత్నించారు దర్శకుడు. ఇలాంటి పాత్రలు ఎందుకో చిరుకి సూట్ కాదు అనిపిస్తుంది.
అలాగే శంకర్ దాదా ఎంబీబీఎస్ సినిమా చేసిన చిరు.. శంకర్ దాదా జిందాబాద్ సినిమాను చేయకుండా ఉండాల్సింది. సినిమాలో గాంధీగిరి అనే కాన్సెప్టును ఎలివేట్ చేయాల్సిన దర్శకుడు.. ఎక్కడో మెసేజ్‌ను రీమేక్‌లో సరిగ్గా convey చేయలేకపోయారని అనిపిస్తుంది. ముఖ్యంగా ప్రభుదేవా డైరెక్టర్‌గా ఈ సినిమాకు కరెక్ట్ కాదేమో? ఒక మంచి టీమ్‌తో చిరు ఈ సినిమా చేయాల్సింది. లగేరహో మున్నాభాయ్ స్థాయిని ఈ సినిమా ఎందుకో అందుకోలేకపోయింది.
