ఎర్ర కంది పప్పు (మసూర్ దాల్) ఆరోగ్యానికి చాలా రకాలుగా మేలు చేస్తుంది. ఇందులో ప్రొటీన్, ఫైబర్, ఫోలెట్, ఐరన్ సమృద్ధిగా ఉంటాయి. బరువు తగ్గే ప్రయత్నాల్లో ఉన్నవారు ఎర్ర కంది పప్పును డైట్‌లో చేర్చుకోవచ్చు. షుగర్‌ లెవల్స్‌ని కంట్రోల్‌ చేస్తుంది, రోగనిరోధక శక్తి పెంచుతుంది. రక్తహీనత నివారణ, గుండె, చర్మం, ఎముకల ఆరోగ్యానికి ఉపయోగపడుతుంది. ఇన్ని పోషకాలున్నాయని తరచూ ఎర్ర కంది పప్పు తింటే పొరపాటు. మసూర్ దాల్ ఎక్కువగా తీసుకుంటే ఆరోగ్యంపై దుష్ప్రభావాలు కనిపిస్తాయి. ప్రముఖ ఆయుర్వేద నిపుణుడు దీక్షా బౌసర్ ఎన్డీటీవీతో మాట్లాడుతూ.. కొన్ని రకాల ఆరోగ్య సమస్యలు ఉన్నవారు మసూర్ దాల్ వినియోగించకపోవడం మంచిదని సూచించారు. అలాగే అతిగా వినియోగించడం వల్ల వచ్చే అనారోగ్య సమస్యలపై విలువైన సమాచారాన్ని పంచుకున్నారు.
ఎర్ర కంది పప్పు వినియోగించడం వల్ల కొందరిలో అలెర్జీ సమస్యలు కలగవచ్చు. చర్మంపై దురద, ఇన్‌ఫ్లమేషన్, జీర్ణశయ సమస్యలు వంటివి ఏర్పడవచ్చు. బ్యాలెన్స్‌డ్ డైట్ అనుసరించకుండా మసూర్ దాల్‌ని అధికంగా తీసుకుంటే శరీరంలో పోషకాల సమత్యులత దెబ్బతింటుంది. ఇది అనేక రోగాలకు దారితీయవచ్చు. హై యూరిక్ యాసిడ్.. ఈ సమస్యతో బాధపడేవారు ఎర్ర కందిపప్పు తినకపోవడమే మంచిది. ఇందులో ప్యూరిన్ అనే కాంపౌండ్‌ అధికంగా ఉంటుంది. ఇది యూరిక్ యాసిడ్ లెవల్స్‌ను పెంచుతుంది. ఫలితంగా కీళ్ల నొప్పుల సమస్యకు దారితీయవచ్చు. కిడ్నీ వ్యాధిగ్రస్తులు ఎర్ర కంది పప్పు ఆహారంగా తీసుకోకూడదు. ఈ పప్పులో ఆక్సలేట్స్ అధికంగా ఉంటాయి. ఇవి కిడ్నీలో రాళ్లు ఏర్పడడానికి, ఇతర కిడ్నీ రోగాలకు కారణమవుతాయి. అందుకే కిడ్నీ రోగులు ఆహారంలో మసూర్ దాల్ చేర్చుకోకపోవడం బెటర్.
ఎర్ర కంది పప్పు అధికంగా వినియోగిస్తే అందులోని ఫైబర్ కొన్నిసార్లు గ్యాస్ సమస్యలకు దారితీయవచ్చు. అలాగే ఎసిడిటీ సమస్యలు ఉత్పన్నమయ్యే అవకాశం ఉంటుంది. మసూర్ పప్పులో ప్రొటీన్ కంటెంట్ కూడా అధికంగా లభిస్తుంది. ఇది శరీరంలో కొవ్వు పేరుకుపోయి అధిక బరువుకు దారితీయవచ్చు. మసూర్ పుప్పును తగిన పరిమాణంలో వినియోగిస్తే అనేక ఆరోగ్య ప్రయోజనాలు ఉంటాయి. ఇందులో ఉండే ప్రొటీన్ కండరాలను బలోపేతం చేస్తుంది. నాడీ వ్యవస్థ, మెదడు పనితీరును మెరుగుపరిచే ఖనిజాలు ఎర్ర కందిపప్పులో ఉంటాయి. మసూర్ దాల్ తినడం వల్ల శరీరంలో చెడు కొలెస్ట్రాల్ (LDL) లెవెల్స్ తగ్గుతాయి. గుండె, ధమనుల ఆరోగ్యం మెరుగుపడుతుంది. స్ట్రోక్ రిస్క్ తగ్గుతుంది. ఎర్ర కంది పప్పు తింటే చర్మం, జుట్టు ఆరోగ్యం బాగుపడుతుంది.
ఇందులోని విటమిన్లు, ఖనిజాలు చర్మ నిగారింపును పెంచుతాయి. విటమిన్లు పుష్కలంగా ఉండే ఎర్ర కందిపప్పు స్క్రబ్బింగ్‌, చర్మానికి క్లెన్సర్‌గా పని చేస్తుంది. చర్మంలోని మురికిని సులువుగా బయటకు పంపుతుంది. ముఖంపై ముడతలు, గీతలు, వృద్ధాప్య ఛాయలు దూరం చేస్తుంది.
