Beetroot Paratha : మ‌నం బీట్ రూట్ ను కూడా ఆహారంగా తీసుకుంటూ ఉంటాం. బీట్ రూట్ మ‌న ఆరోగ్యానికి ఎంతో మేలు చేస్తుంది. దీనిలో మ‌న శ‌రీరానికి అవ‌స‌ర‌మ‌య్యే ఎన్నో పోష‌కాలు ఉంటాయి. గుండె ఆరోగ్యాన్ని మెరుగుప‌ర‌చ‌డంలో, ర‌క్త‌హీన‌త‌ను త‌గ్గించ‌డంలో, ర‌క్త‌పోటును అదుపులో ఉంచ‌డంలో ఇలా అనేక విధాలుగా బీట్ రూట్ మ‌న‌కు స‌హాయ‌ప‌డుతుంది. మ‌నం సాధార‌ణంగా బీట్ రూట్ ను స‌లాడ్ గా, జ్యూస్ గా లేదా ఫ్రై లా త‌యారు చేసుకుని తింటూ ఉంటాం. ఇవే కాకుండా బీట్ రూట్ తో మ‌నం ఎంతో రుచిగా ఉండే ప‌రాటాల‌ను కూడా త‌యారు చేసుకుని తిన‌వ‌చ్చు. బీట్ రూట్ ప‌రాటాలు క‌ల‌ర్ ఫుల్ గా, చాలా రుచిగా ఉంటాయి. మ‌న ఆరోగ్యానికి మేలు చేసే బీట్ రూట్ తో ప‌రాటాల‌ను ఎలా త‌యారు చేసుకోవాలి.. అన్న వివ‌రాల‌ను ఇప్పుడు తెలుసుకుందాం.
బీట్ రూట్ ప‌రాటా త‌యారీకి కావ‌ల్సిన ప‌దార్థాలు..
త‌రిగిన బీట్ రూట్ – 1 ( పెద్ద‌ది), గోధుమ‌పిండి – మూడు క‌ప్పులు, పంచ‌దార – అర టీ స్పూన్, ఉప్పు – త‌గినంత, జీల‌క‌ర్ర – ఒక టీ స్పూన్, ప‌చ్చిమిర్చి పేస్ట్ – 2 టీ స్పూన్స్, నూనె – ఒక టేబుల్ స్పూన్.
బీట్ రూట్ ప‌రాటా త‌యారీ విధానం..
ముందుగా ఒక జార్ లో బీట్ రూట్ ముక్క‌లు , కొద్దిగా నీళ్లు వేసి మెత్త‌గా మిక్సీ పట్టుకోవాలి. త‌రువాత గోధుమ‌పిండిలో మిక్సీ ప‌ట్టుకున్న బీట్ రూట్ పేస్ట్ తో పాటు మిగిలిన ప‌దార్థాల‌న్నీ వేసి క‌లుపుకోవాలి. త‌రువాత దీనిపై మూత‌ను ఉంచి పిండిని 15 నిమిషాల పాటు నాన‌బెట్టుకోవాలి. త‌రువాత పిండిని మ‌రోసారి బాగా క‌లుపుకుని ఉండ‌లుగా చేసుకోవాలి. ఇప్పుడు ఒక్కో ఉండ‌ను తీసుకుంటూ పొడి పిండి చ‌ల్లుకుంటూ చ‌పాతీలా రుద్దుకోవాలి. ఇలా అన్నింటిని త‌యారు చేసుకున్న త‌రువాత ఒక్కో చ‌పాతీని పెనం మీద వేసి కాల్చుకోవాలి. వీటిని నూనె వేస్తూ రెండు వైపులా ఎర్ర‌గా అయ్యే వ‌ర‌కు కాల్చుకుని ప్లేట్ లోకి తీసుకోవాలి. ఇలా చేయ‌డం వ‌ల్ల ఎంతో రుచిగా ఉండే బీట్ రూట్ ప‌రాటా త‌యార‌వుతుంది. వీటిని ఏ కూర‌తో తిన్నా లేదా నేరుగా తిన్నా కూడా చాలా రుచిగా ఉంటుంది. ఈ విధంగా బీట్ రూట్ తో ప‌రాటాల‌ను చేసుకుని తినడం వ‌ల్ల మ‌నం రుచితో పాటు చ‌క్క‌టి ఆరోగ్యాన్ని కూడా సొంతం చేసుకోవ‌చ్చు. ఈ బీట్ రూట్ ప‌రాటాల‌ను పిల్ల‌లు ఎంతో ఇష్టంగా తింటారు.
