Crispy Buttermilk Vada : బ‌ట‌ర్ మిల్క్ వ‌డ.. అటుకులు, పెరుగు క‌లిపి చేసే ఈ వ‌డ‌లు చాలా రుచిగా ఉంటాయి. అలాగే చాలా క్రిస్పీగా కూడా ఉంటాయి. ఒక్క‌సారి ఈ వడలను రుచి చూస్తే మ‌ళ్లీ మ‌ళ్లీ ఇవే కావాలంటారు. అల్పాహారంగా తీసుకోవ‌డానికి, స్నాక్స్ గా తీసుకోవ‌డానికి ఇవి చాలా చ‌క్క‌గా ఉంటాయి. ఉద‌యం పూట స‌మ‌యం త‌క్కువ‌గా ఉన్న‌ప్పుడు లేదా సాయంత్రం స‌మ‌యంలో స్నాక్స్ తినాల‌నిపించిన‌ప్పుడు 10 నిమిషాల్లో ఈ వడలను త‌యారు చేసి తీసుకోవ‌చ్చు. ఎంతో రుచిగా, క్రిస్పీగా ఉండే ఈ బ‌ట‌ర్ మిల్క్ వడలను ఎలా త‌యారు చేసుకోవాలి.. అన్న వివ‌రాల‌ను ఇప్పుడు తెలుసుకుందాం.
ఇన్ స్టాంట్ బ‌ట‌ర్ మిల్క్ వ‌డ త‌యారీకి కావ‌ల్సిన ప‌దార్థాలు..
మందంగా ఉండే అటుకులు – 2 క‌ప్పులు, చిన్న‌గా త‌రిగిన ప‌చ్చిమిర్చి – 1, ఉప్పు – త‌గినంత, అల్లం త‌రుగు – ఒక టీ స్పూన్, ఇంగువ – పావు టీ స్పూన్, బియ్యంపిండి – 3 టీ స్పూన్స్, కొత్తిమీర – 2 టీ స్పూన్స్, పుల్ల‌టి పెరుగు – ఒక క‌ప్పు, జీల‌క‌ర్ర – ఒక టీ స్పూన్, నూనె – డీప్ ఫ్రైకు సరిప‌డా.
ఇన్ స్టాంట్ బ‌ట‌ర్ మిల్క్ వ‌డ త‌యారీ విధానం..
ముందుగా అటుకుల‌ను గిన్నెలో వేసి అవి మునిగే వ‌ర‌కు నీళ్లు పోసి 5 నిమిషాల పాటు నాన‌బెట్టాలి. త‌రువాత అటుకుల‌ను చేత్తో నీళ్లు పోయేలా గట్టిగా పిండి గిన్నెలోకి తీసుకోవాలి. త‌రువాత నూనె త‌ప్ప మిగిలిన ప‌దార్థాల‌ను ఒక్కొక్క‌టిగా వేసి చేత్తో వ‌త్తుతూ బాగా క‌ల‌పాలి. అంతా క‌లిసేలా బాగా క‌లుపుకున్న త‌రువాత క‌ళాయిలో నూనె పోసి వేడి చేయాలి. నూనె వేడ‌య్యాక చేతుల‌కు త‌డి చేసుకుంటూ పిండిని తీసుకుని వ‌డ‌లాగా వ‌త్తుకుని నూనెలో వేసుకోవాలి. వీటిని వేసిన వెంట‌నే గంటెతో క‌ద‌ప‌కుండా అలాగే ఉంచాలి. ఇవి కొద్దిగా కాలిన త‌రువాత అటూ ఇటూ తిప్పుతూ క్రిస్పీగా, ఎర్ర‌గా అయ్యే వ‌ర‌కు కాల్చుకుని ప్లేట్ లోకి తీసుకోవాలి. ఇలా చేయ‌డం వ‌ల్ల ఎంతో రుచిగా ఉండే బ‌ట‌ర్ మిల్క్ వ‌డ‌లు త‌యారవుతాయి. వీటిని చ‌ట్నీతో తింటే చాలా రుచిగా ఉంటాయి. ఈ విధంగా ఇన్ స్టాంట్ త‌యారు చేసిన ఈ వడలను అంద‌రూ ఎంతో ఇష్టంగా తింటారు.
