Gobi Roast : గోబి రోస్ట్.. క్యాలీప్ల‌వ‌ర్ తో చేసుకోద‌గిన రుచిక‌ర‌మైన వంట‌కాల్లో ఇది కూడా ఒక‌టి. డీప్ ఫ్రై లేకుండా చేసేఈ గోబి రోస్ట్ చాలా రుచిగా ఉంటుంది. అన్నం, చ‌పాతీ వంటి వాటితో తిన‌డానికి, సైడ్ డిష్ గా తిన‌డానికి ఇది చాలా చ‌క్క‌గా ఉంటుంది. దీనిని త‌యారు చేయ‌డం చాలా సుల‌భం. క్యాలీప్ల‌వ‌ర్ తో త‌రుచూ చేసే వంట‌కాల‌తో పాటు అప్పుడ‌ప్పుడూ ఇలా కూడా త‌యారు చేసి తీసుకోవ‌చ్చు. క్యాలీప్ల‌వ‌ర్ తో రుచిగా గోబి రోస్ట్ ను ఎలా త‌యారు చేసుకోవాలి.. అన్న వివ‌రాలను ఇప్పుడు తెలుసుకుందాం.
గోబి రోస్ట్ త‌యారీకి కావ‌ల్సిన ప‌దార్థాలు..
ముక్క‌లుగా క‌ట్ చేసిన క్యాలీప్ల‌వ‌ర్ – చిన్న‌ది ఒక‌టి, నూనె – ఒక టేబుల్ స్పూన్, ప‌సుపు – అర టీ స్పూన్, ఉప్పు – ఒక టీ స్పూన్, మిరియాల పొడి – అర టీ స్పూన్, క‌రివేపాకు – 2 రెమ్మ‌లు, దాల్చిన చెక్క – ఒక ఇంచు ముక్క, ల‌వంగాలు – 4, యాల‌కులు – 2, జీల‌క‌ర్ర – అర టీ స్పూన్, ఉల్లిపాయ ముక్క‌లు – అర క‌ప్పు, చిన్న‌గా త‌రిగిన ప‌చ్చిమిర్చి – 4, అల్లం వెల్లుల్లి పేస్ట్ – ఒక టీ స్పూన్, ట‌మాట – పెద్ద‌ది ఒక‌టి, కారం – ఒక‌టిన్న‌ర టీస్పూన్, ధ‌నియాల పొడి – ఒక టీ స్పూన్, జీల‌క‌ర్ర పొడి – పావు టీ స్పూన్, గ‌రం మ‌సాలా – అర టీ స్పూన్, త‌రిగిన కొత్తిమీర – కొద్దిగా, జీడిప‌ప్పు పులుకులు – కొద్దిగా.
గోబి రోస్ట్ త‌యారీ విధానం..
ముందుగా క్యాలీప్ల‌వ‌ర్ ముక్కలను వేడి నీటిలో వేసి 5 నిమిషాల పాటు ఉంచాలి. త‌రువాత క‌ళాయిలో నూనె వేసి వేడి చేయాలి. నూనె వేడ‌య్యాక క్యాలీప్ల‌వ‌ర్ ముక్కలను వ‌డ‌క‌ట్టి నూనెలో వేసుకోవాలి. ఇందులో ప‌సుపు, ఉప్పు వేసి క‌ల‌పాలి. ఈ క్యాలీప్ల‌వ‌ర్ ముక్కలను మధ్య మ‌ధ్య‌లో క‌లుపుతూ వేయించాలి. ముక్క‌లు పూర్తిగా మ‌గ్గిన త‌రువాత మిరియాల పొడి వేసి క‌ల‌పాలి. త‌రువాత క‌రివేపాకు వేసి క‌లిపి గిన్నెలోకి తీసుకోవాలి. త‌రువాత అదే క‌ళాయిలో మ‌రో 2 టేబుల్ స్పూన్ల నూనె వేసి వేడి చేయాలి. త‌రువాత మ‌సాలా దినుసులు, జీల‌క‌ర్ర వేసి వేయించాలి. త‌రువాత ఉల్లిపాయ ముక్క‌లు వేసి వేయించాలి.
ఇవి వేగిన త‌రువాత ప‌చ్చిమిర్చి, అల్లం వెల్లుల్లి పేస్ట్ వేసి వేయించాలి. త‌రువాత ట‌మాటాను ఫ్యూరీలాగా చేసి వేసుకోవాలి. దీనిని ప‌చ్చి వాస‌న పోయే వ‌ర‌కు వేయించిన త‌రువాత కారం, ఉప్పు, ప‌సుపు, ధ‌నియాల పొడి, జీల‌క‌ర్ర పొడి, గ‌రం మ‌సాలా వేసి క‌ల‌పాలి. త‌రువాత వేయించిన క్యాలీప్ల‌వ‌ర్ వేసి క‌ల‌పాలి. దీనిని మ‌రో రెండు నిమిషాల పాటు వేయించిన త‌రువాత జీడిప‌ప్పు, కొత్తిమీర చ‌ల్లుకుని స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే గోబి రోస్ట్ త‌యార‌వుతుంది. దీనిని అన్నంతో తిన్నా లేదా సైడ్ డిష్ గా తిన్నా చాలా రుచిగా ఉంటుంది. ఈ విధంగా త‌యారు చేసిన గోబి రోస్ట్ ను అంద‌రూ ఎంతో ఇష్టంగా తింటారు.
