Biscuits : ఓవెన్ లేకున్నా.. గుడ్డు ఉప‌యోగించ‌కుండా.. బిస్కెట్ల‌ను ఇలా త‌యారు చేయ‌వ‌చ్చు..

Biscuits : మ‌న‌కు బ‌య‌ట షాపుల్లో, బేక‌రీల్లో వివిధ రుచుల్లో అనేక ర‌కాల బిస్కెట్లు ల‌భ్య‌మ‌వుతుంటాయి. చాలా మంది వీటిని ఇష్టంగా తింటారు. బ‌య‌ట దొరికే విధంగా ఉండే ఈ బిస్కెట్ల‌ను మ‌నం చాలా సుల‌భంగా ఇంట్లో కూడా త‌యారు చేసుకోవ‌చ్చు. అయితే అంద‌రి ఇండ్లల్లో ఓవెన్ ఉండ‌దు. ఓవెన్ అవ‌స‌రం లేకుండా అదే విధంగా కోడిగుడ్డును ఉప‌యోగించ‌కుండా ఇంట్లో రుచిగా బిస్కెట్ల‌ను ఎలా త‌యారు చేసుకోవాలి.. వీటి త‌యారీకి కావ‌ల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.

బిస్కెట్ల త‌యారీకి కావ‌ల్సిన ప‌దార్థాలు..

మైదాపిండి – ఒక క‌ప్పు, శ‌న‌గ‌పిండి – పావు క‌ప్పు, బొంబాయి ర‌వ్వ – 2 టేబుల్ స్పూన్స్, పంచ‌దార పొడి – ముప్పావు క‌ప్పు, ఉప్పు – పావు టీ స్పూన్, బేకింగ్ పౌడ‌ర్ – పావు టీ స్పూన్, యాల‌కుల పొడి – పావు టీ స్పూన్, నెయ్యి – అర క‌ప్పు.

బిస్కెట్ల త‌యారీ విధానం..

ముందుగా ఒక గిన్నెలో నెయ్యి త‌ప్ప మిగిలిన ప‌దార్థాల‌న్నీ వేసి క‌లుపుకోవాలి. త‌రువాత నెయ్యిని వేసి పిండి ముద్ద‌లా అయ్యే విధంగా 5 నుండి 10 నిమిషాల పాటు బాగా క‌ల‌పాలి. త‌రువాత అడుగు భాగం మందంగా ఉండే ఒక గిన్నెను తీసుకుని స్ట‌వ్ మీద ఉంచాలి. ఈ గిన్నెలో ఒక స్టాండును ఉంచి వేడి బ‌య‌ట‌కు పోకుండా మూతను ఉంచి 5 నిమిషాల పాటు మ‌ధ్య‌స్థ మంట‌పై వేడి చేయాలి. త‌రువాత ముందుగా క‌లిపి పెట్టుకున్న పిండి నుండి కొద్ది కొద్దిగా పిండిని స‌మ‌భాగాల్లో తీసుకుంటూ ఉండ‌లుగా చేసుకోవాలి.

త‌రువాత ఈ ఉండ‌ల‌ను మందంగా బిస్కెట్ల ఆకారంలో వ‌త్తుకోవాలి. ఈ బిస్కెట్ల‌ను నెయ్యి రాసిన అల్యూమినియం ప్లేట్ లో లేదా గిన్నెలో ఉంచాలి. త‌రువాత ఈ బిస్కెట్ల పై మ‌న‌కు న‌చ్చిన ఆకారంలో గుర్తుల‌ను అదే విధంగా మ‌న‌కు న‌చ్చిన డ్రై ఫ్రూట్స్ తురుమును ఉంచాలి. ఇలా అన్నీ బిస్కెట్ల‌ను త‌యారు చేసుకున్న త‌రువాత ఈ బిస్కెట్ల పేట్ల్ ను ముందుగా వేడి చేసుకున్న గిన్నెలో స్టాండ్ పై ఉంచి వేడి బ‌య‌ట‌కు పోకుండా మూత పెట్టాలి. ఈ బిస్కెట్ల‌ను 10 నిమిషాల పాటు మ‌ధ్య‌స్థ మంట‌పై వేడి చేయాలి.

ఇలా వేడి చేసిన త‌రువాత బిస్కెట్లు పెద్ద‌గా అవ్వడంతోపాటు రంగు మార‌డాన్ని కూడా మనం గ‌మ‌నించ‌వ‌చ్చు. బిస్కెట్ల అడుగు భాగం కూడా ఎర్ర‌గా రంగు మారుతుంది. ఇప్పుడు స్ట‌వ్ ఆఫ్ చేసి బిస్కెట్ల‌ను బ‌య‌ట‌కు తీయాలి. ఈ బిస్కెట్ల‌ను చ‌ల్ల‌గా అయిన త‌రువాత వేరే ప్లేట్ లోకి లేదా గిన్నెలోకి తీసుకోవాలి. ఇలా చేయ‌డం వ‌ల్ల ఎంతో రుచిగా ఉండే బిస్కెట్లు త‌యార‌వుతాయి.

అడుగు భాగం ప‌లుచ‌గా ఉండే గిన్నెను తీసుకున్న వారు గిన్నెలో ఉప్పును లేదా ఇసుక‌ను ఉంచి దానిపై స్టాండ్ ను ఉంచాలి. ఈ విధంగా ఇంట్లో ఓవెన్ లేక‌పోయినా అలాగే కోడిగుడ్డును ఉప‌యోగించ‌కున్నా.. రుచిగా ఉండే బిస్కెట్ల‌ను మ‌నం చాలా సుల‌భంగా త‌యారు చేసుకోవ‌చ్చు. ఇలా త‌యారు చేసిన బిస్కెట్లు అచ్చం బ‌య‌ట దొరికే విధంగా ఉండే బిస్కెట్ల రుచిని క‌లిగి ఉంటాయి. అంద‌రూ ఈ బిస్కెట్ల‌ను ఎంతో ఇష్టంగా తింటారు.