NTR : రాజ‌మౌళి ద‌ర్శ‌క‌త్వంలో ఎన్టీఆర్, రామ్ చ‌ర‌ణ్ లు హీరోలుగా వ‌స్తున్న చిత్రం.. ఆర్ఆర్ఆర్. ఈ సినిమా ఈ నెల 25వ తేదీన ప్ర‌పంచ‌వ్యాప్తంగా భారీ ఎత్తున విడుద‌ల కానుంది. అందులో భాగంగానే చిత్ర యూనిట్ ప్ర‌స్తుతం ప్ర‌మోష‌న్ కార్య‌క్ర‌మాల‌ను వేగంగా నిర్వ‌హిస్తోంది. ఇక తాజాగా నిర్వ‌హించిన అలాంటి ఓ స‌మావేశంలో ఎన్టీఆర్ త‌న జీవితానికి సంబంధించి ప‌లు ఆస‌క్తిక‌ర‌మైన విష‌యాల‌ను వెల్ల‌డించారు. ఆర్ఆర్ఆర్ సినిమాకు గాను ఎన్టీఆర్ రూ.45 కోట్ల పారితోషికం తీసుకుంటున్న‌ట్లు వార్త‌లు వ‌స్తున్నాయి. అయితే ఈ వార్త‌ల‌పై మాత్రం వారు స్పందించ‌లేదు.
కాగా ఎన్టీఆర్ బాల‌న‌టుడిగానే రాణించిన విష‌యం విదిత‌మే. ఆయ‌న బాల రామాయ‌ణంతోపాటు బ్ర‌హ్ముర్షి విశ్వామిత్ర అనే మూవీలో న‌టించి ఆక‌ట్టుకున్నారు. ఇక ఆయ‌న హీరోగా నిన్ను చూడాల‌ని అనే మూవీతో వెండితెర‌కు ఎంట్రీ ఇచ్చారు. అయితే త‌న న‌ట‌న గురించి కేవ‌లం ఇద్ద‌రు మాత్రమే త‌న‌తో ఓపెన్‌గా చెబుతార‌ని.. వారు ఒక‌రు త‌న తండ్రి హ‌రికృష్ణ కాగా.. ఇంకొక‌రు రాజ‌మౌళి అని ఎన్టీఆర్ అన్నారు. రాజ‌మౌళి వ‌ల్లే తాను న‌టుడిగా ఈ రోజు ఈ స్థాయిలో ఉన్నాన‌ని తెలిపారు.
కాగా రాజ‌మౌళి ద‌ర్శ‌క‌త్వంలో ఇప్ప‌టి వ‌ర‌కు ఎన్టీఆర్ మొత్తం నాలుగు సినిమాలు చేశారు. స్టూడెంట్ నంబ‌ర్ 1, సింహాద్రి, య‌మ‌దొంగ, ఇప్పుడు ఆర్ఆర్ఆర్ మూవీ.. ఇలా వీరి కాంబినేష‌న్‌లో వ‌చ్చిన చిత్రాలు హిట్ అయ్యాయి. ఈ క్ర‌మంలోనే ఆర్ఆర్ఆర్ కూడా ఘ‌న విజ‌యం సాధించ‌డం ఖాయ‌మ‌ని అంటున్నారు. ఇక ఈ మూవీలో ఎన్టీఆర్ కొమురం భీమ్ పాత్ర‌లో క‌నిపించ‌నున్నారు. ఈ సినిమాకు మొత్తం రూ.336 కోట్ల బ‌డ్జెట్ అయింద‌ని తెలిపారు.
